ભારતીય ક્રિકેટ કન્ટ્રોલ બોર્ડ (બીસીસીઆઇ) દ્વારા આજે જાહેર કરવામાં આવેલા સેન્ટ્રલ કોન્ટ્રાક્ટમાં ભારતીય કેપ્ટન વિરાટ કોહલી, વ્હાઇટ બોલ ક્રિકેટમાં તેના ડેપ્યુટી રોહિત શર્મા અને ઝડપી બોલર જસપ્રીત બુમરાહને એ પ્લસની કેટેગરીમાં જાળવી રાખવામાં આવ્યા છે. આ ગ્રેડમાં સામેલ ખેલાડીઓને વાર્ષિક રૂ. 7 કરોડ મળે છે.
બીસીસીઆઇએ જાહેર કરેલા સેન્ટ્રલ કોન્ટ્રાક્ટની ચાર કેટેગરીમાં કુલ 28 ખેલાડીનો સમાવેશ કરીને કેટલાક યુવા ક્રિકેટરોને પણ સામેલ કરવામાં આવ્યા છે. આ ચાર કેટેગરીમાં એ પ્લસ ગ્રેડમાં રૂ. 7 કરોડ, એ ગ્રેડમાં 5, બી ગ્રેડમાં 3 અને સી ગ્રેડમાં 1 કરોડ મળશે.
ઓલરાઉન્ડર હાર્દિક પંડ્યાને પ્રમોટ કરીને એ ગ્રેડમાં સમાવાયો છે. જ્યારે શુભમન ગીલ અને મહંમદ સિરાજને જે પહેલો સેન્ટ્રલ કોન્ટ્રાક્ટ મળ્યો છે તે સી ગ્રેડનો છે, જેમાં ખેલાડીને વાર્ષિક 1 કરોડ મળે છે. કેટલાક ખેલાડીઓનો દરજ્જો ઘટાડી દેવાયો છે, જેમાં ભુવનેશ્વર કુમારને બી ગ્રેડમાં મુકાયો છે જ્યારે કેદાર જાદવ અને મનિષ પાંડેને સેન્ટ્રલ કોન્ટ્રાક્ટમાંથી આ વખતે બહાર મુકવામાં આવ્યા છે. એ પ્લસ ગ્રેડમાં 3, એ ગ્રેડમાં 10, બી ગ્રેડમાં 5 અને સી ગ્રેડમાં 10 ખેલાડી સામેલ છે.
બીસીસીઆઇના સેન્ટ્રલ કોન્ટ્રાક્ટમાં સામેલ ખેલાડીઓ
A+ ગ્રેડ : વિરાટ કોહલી, રોહિત શર્મા, જસપ્રીત બુમરાહ
A ગ્રેડ : રવિચંદ્રન અશ્વિન, રવિન્દ્ર જાડેજા, ચેતેશ્વર પુજારા, અજિંકેય રહાણે, શિખર ધવન, લોકેશ રાહુલસસ, મહંમદ શમી, ઇશાંત શર્મા, ઋષભ પંત અને હાર્દિક પંડ્યા.
B ગ્રેડ : રિદ્ધિમાન સાહા, ઉમેશ યાદવ, ભુવનેશ્વર કુમાર, શાર્દુલ ઠાકુર અને મયંક અગ્રવાલ
C ગ્રેડ : કુલદીપ યાદવ, નવદીપ સૈની, દીપક ચાહર, શુભમન ગીલ, હનુમા વિહારી, અક્ષર પટેલ, શ્રેયસ ઐય્યર, વોશિંગ્ટન સુંદર, યજુવેન્દ્ર ચહલ અને મહંમદ સિરાજ
