અયોધ્યામાં (Ayodhya) 22 જાન્યુઆરી, 2024 ના રોજ ભગવાન શ્રી રામના નવનિર્મિત મંદિરનો (Ram Mandir) અભિષેક કરવામાં આવશે. રામ નગરીમાં આ અંગેની તૈયારીઓ જોરશોરથી ચાલી રહી છે. રામ મંદિરના અભિષેક બાદ ભગવાનના ચરણ પણ ત્યાં રાખવામાં આવશે. હાલમાં આ પાદુકાઓનું દેશભરમાં પરિભ્રમણ કરવામાં આવી રહ્યું છે. પાદુકાઓ પ્રાણ-પ્રતિષ્ઠા મહોત્સવ પહેલા 19 જાન્યુઆરીએ અયોધ્યા પહોંચશે.
આ પાદુકા હૈદરાબાદના શ્રીચલ શ્રીનિવાસ શાસ્ત્રીએ બનાવી છે. ગત રવિવારે (17 ડિસેમ્બર) તેને રામેશ્વર ધામથી અમદાવાદ લાવવામાં આવ્યો હતો. તેને એસ.જી. હાઈવે પર સ્થિત તિરુપતિ બાલાજી મંદિરમાં દર્શન માટે રાખવામાં આવ્યો છે. અહીંથી સોમનાથ જ્યોતિર્લિંગ ધામ, દ્વારકાધીશ અને પછી બદ્રીનાથ જેવા ધામમાં લઈ જવામાં આવશે.
તમને જણાવી દઈએ કે આ ચરણ પાદુકા એક કિલો સોના અને સાત કિલો ચાંદીમાંથી બનાવવામાં આવી છે. આમાં કિંમતી રત્નોનો પણ ઉપયોગ કરવામાં આવ્યો છે. અમદાવાદ પહોંચેલા પાદુકાઓને બાલાજી મંદિરના ટ્રસ્ટી કે. સુબ્બારાયુડુએ તેને પોતાના માથા પર મૂકી મંદિરની અંદર લઈ ગયા અને શ્રી બાલાજી મંદિરના પંડિતોએ વિશેષ પૂજા કરી. જે બાદ અનેક ભક્તોએ શ્રી રામ પાદુકાના દર્શન કર્યા હતા. કેટલાક ભક્તોએ તેને માથે ધારણ કરવાનો લહાવો પણ મેળવ્યો હતો.
શ્રીચલ શ્રીનિવાસ શાસ્ત્રીએ આ શ્રી રામ પાદુકાઓ સાથે 41 દિવસ સુધી અયોધ્યાની પરિક્રમા કરી હતી. તે પછી, છેલ્લા બે વર્ષથી, આ પાદુકાઓને રામેશ્વરમથી બદ્રીનાથ સુધીના તમામ પ્રખ્યાત મંદિરોમાં લઈ જવામાં આવી રહી છે અને વિશેષ પૂજા કરવામાં આવી રહી છે. હવે આ ચરણ પાદુકા અમદાવાદથી સોમનાથ, દ્વારકા લઈ જવામાં આવશે, જ્યાંથી આ ચરણ પાદુકા બદ્રીનાથ મંદિર પહોંચશે. ત્યારબાદ અયોધ્યાના શ્રી રામ મંદિરમાં પાદુકા સ્થાપિત કરવામાં આવશે.
અયોધ્યામાં રામ મંદિરનો પહેલો માળ લગભગ તૈયાર છે. હવે ભોંયતળિયા પરના પથ્થરને પીસવાની અને થાંભલાઓ પર કોતરણીને આખરી ઓપ આપવામાં આવી રહ્યો છે. રામ મંદિર ટ્રસ્ટે દાવો કર્યો છે કે પ્રથમ માળનું ફિનિશિંગ અને બાંધકામ ડિસેમ્બરના અંત સુધીમાં પૂર્ણ થઈ જશે. એન્જિનિયરોની દેખરેખ હેઠળ, મંદિરનું નિર્માણ કાર્ય આઠ કલાકની 3 શિફ્ટમાં ખૂબ જ ઝડપી ગતિએ ચાલી રહ્યું છે.
