પિન્ક બોલ ટેસ્ટ : ભારત પ્રથમ દાવ 145, રોહિત શર્મા 66, જો રૂટ 8/5, જેક લીચ 54/4, ઇંગ્લેન્ડ બીજો દાવ 81, સ્ટોક્સ 23, અક્ષર 32/5, અશ્વિન 48/4 ભારત અને ઇંગ્લેન્ડ વચ્ચે અહીંના નરેન્દ્ર મોદી સ્ટેડિયમાં રમાયેલી ડે એન્ડ નાઇટ ત્રીજી ટેસ્ટમાં બંને ટીમના સ્પિનરોનું પ્રદર્શન જોરદાર રહ્યું હતું. ઇંગ્લેન્ડના પહેલા દાવમાં ભારતના સ્પિનર અક્ષર પટેલે 6 અને રવિચંદ્રન અશ્વિને 5 વિકેટ ઉપાડયા પછી, ભારતીય ટીમના પ્રધમ દાવમાં મોડેથી બોલિંગ કરવા આવેલા જો રૂટે 6.2-3-8-5નો જોરદાર સ્પેલ ફેંકીને ભારતીય ટીમનો પહેલો દાવ 145 રનમાં સમેટી નાંખ્યો હતો.
જો કે તે પછી ઇંગ્લેન્ડના બીજા દાવમાં ફરી એકવાર અક્ષર પટેલ ત્રાટક્યો હતો અને તેણે ફરી જોરદાર બોલિંગ કરીને 32 રનમાં 5 વિકેટ ઉપાડી હતી અને અશ્વિને પણ 48 રનમાં 4 વિકેટ ઉપાડીને તેને સારો સાથ આપ્યો હતો, આ બંનેની જુગલબંધીને કારણે ઇંગ્લેન્ડની ટીમનો બીજો દાવ માત્ર 81 રનમાં સમેટાઇ ગયો હતો. બેન સ્ટોક્સ અને જો રૂટે થોડો પ્રતિકાર કર્યો હતો, જો કે તેમનો પ્રતિકાર પણ ક્ષણજીવી રહ્યો હતો.
માત્ર 81 રને ઓલઆઉટ થવાની સાથે ઇંગ્લેન્ડની ટીમે ભારત સામે ટેસ્ટ ક્રિકેટમાં સૌથી નીમ્ન સ્કોર કરવાનો શરમજનક રેકોર્ડ બનાવ્યો હતો. આ પહેલા ઇંગ્લેન્ડની ટીમ ભારતીય ટીમ સામે 1971માં ઓવલના મેદાન પર 101 રને ઓલઆઉટ થઇ હતી, જે તેમનો ભારત સામે અત્યાર સુધીનો નીચો સ્કોર રહ્યો હતો. હવે 30 વર્ષ પછી તેમણે 81 રને ઓલઆઉટ થઇને એ રેકોર્ડ તોડી નાંખ્યો હતો. આ ટેસ્ટના પહેલા દાવમાં પણ ઇંગ્લેન્ડની ટીમ 112 રને ઓલઆઉટ થઇ તે તેમનો ભારત સામે પાંચમો સૌથી નીચો સ્કોર રહ્યો હતો.
ટેસ્ટ ક્રિકેટમાં ભારત સામે ઇંગ્લેન્ડના સૌથી નીચા સ્કોર
સ્થળ સ્કોર વર્ષ
અમદાવાદ 81 2021
ઓવલ 101 1971
મુંબઇ 102 1980
લીડ્સ 102 1986
અમદાવાદ 112 2021
