સોમવારે ઈરાન દ્વારા સાઉદી અરેબિયાની સૌથી મોટી તેલ કંપની, અરામકોની રાસ તનુરા રિફાઇનરી પર ડ્રોન હુમલો કરવામાં આવ્યો છે. હુમલાની સાથે રિફાઇનરીના કેટલાક વિસ્તારોમાં આગ લાગી, જેના કારણે તનુરા રિફાઇનરીને તાત્કાલિક બંધ કરવું પડ્યું. જોકે આગ નાના વિસ્તારમાં મર્યાદિત રહી અને થોડા જ સમયમાં કાબૂમાં લેવામાં આવી હતી. અત્યાર સુધી કોઈ જાનહાનિ અથવા ગંભીર નુકસાનની માહિતી સામે આવી નથી. રાસ તનુરા સાઉદી અરેબિયાની મુખ્ય તેલ નિકાસ રિફાઇનરી છે, જે વિશ્વભરના તેલ પુરવઠામાં મહત્વનો ભાગ ભજવે છે. હાલની પરિસ્થિતિમાં સાઉદી અરેબિયાએ આ હુમલાનો કોઈ જવાબ આપ્યો નથી. સોશિયલ મીડિયા પર ઘણી પોસ્ટ્સ અનુસાર, સોમવારે સવારે સાઉદી અરેબિયાના મુખ્ય ઉર્જા કેન્દ્ર રાસ તનુરામાં સાઉદી અરામકોના તેલ શુદ્ધિકરણ પ્લાન્ટ પર ઈરાની શાહેદ-136 ડ્રોને હુમલો કર્યો હતો. તાજેતરમાં અમેરિકા અને ઇઝરાયલ દ્વારા ઇરાન પર હુમલો કરવામાં આવ્યો છે, ત્યારબાદ ઇરાન દ્વારા ગલ્ફ દેશો અને ઇઝરાયલ પર મિસાઇલ અને ડ્રોન હુમલા કરવામાં આવ્યા છે.
વિશ્વના બજારો હોર્મુઝ સ્ટ્રેટ નજીકથી બધી નજર રાખી રહ્યા છે, કારણ કે વૈશ્વિક તેલ પુરવઠાનો આશરે 20 ટકા તેમાંથી પસાર થાય છે. જો આગળના દિવસોમાં અન્ય રિફાઇનરીઓ અથવા તેલ ટર્મિનલ્સ પર સમાન હુમલા થાય, તો વૈશ્વિક તેલ સંકટ સર્જાઈ શકે છે અને ભાવો વધવા શરૂ થઈ શકે છે. રાસ તનુરાની પ્રોસેસિંગ ક્ષમતા આશરે 550,000 બેરલ પ્રતિ દિવસ (bpd) છે. જો આ રિફાઇનરી લાંબા સમય સુધી બંધ રહે તો પેટ્રોલ, ડીઝલ અને જેટ ઇંધણના પુરવઠામાં ઘટાડો થઈ શકે છે, જેના કારણે તેલના ભાવોમાં તાત્કાલિક વધારો જોવા મળી શકે છે. વર્તમાન પરિસ્થિતિ, મધ્યપૂર્વમાં અમેરિકા, ઈઝરાયલ અને ઈરાન વચ્ચે વધતા તણાવના સંજોગોમાં વૈશ્વિક માળખાકીય અસરો ઉભી કરી શકે છે, અને તેલ ઉદ્યોગ પર વિશ્વવ્યાપી અસર પડી શકે છે.
