ઈરાન અને ઈઝરાયેલ (Iran-Israel war) વચ્ચે વધી રહેલા તણાવ વચ્ચે એવી અટકળો લગાવવામાં આવી રહી છે કે આગામી 48 કલાકમાં બંને દેશો વચ્ચે યુદ્ધ (War) થઈ શકે છે. અમેરિકા પહેલાથી જ ઈરાનને ખુલ્લેઆમ ધમકી આપી ચુક્યું છે કે જો તે ઈઝરાયેલ પર હુમલો કરશે તો તેના ગંભીર પરિણામો ભોગવવા પડશે. ઈઝરાયેલ-ઈરાન સંઘર્ષમાં અમેરિકાની (America) સક્રિય ભૂમિકાને જોતા મધ્ય પૂર્વના બે મોટા દેશો કતાર અને કુવૈતે અમેરિકાને મોટો ઝટકો આપ્યો છે.
ઈરાન ઓબ્ઝર્વર અને ગ્લોબ આઈ ન્યૂઝના અહેવાલો અનુસાર કતાર અને કુવૈતે અમેરિકાને સ્પષ્ટ કરી દીધું છે કે જો ઈરાન-ઈઝરાયલ યુદ્ધની સ્થિતિ સર્જાશે તો તેઓ અમેરિકાને ઈઝરાયલની મદદ માટે તેમના દેશમાં તેમના બેઝનો ઉપયોગ કરવા દેશે નહીં. એવું પણ કહેવામાં આવ્યું હતું કે આ વિવાદ દરમિયાન અમેરિકા તેમની એરસ્પેસનો ઉપયોગ કરી શકશે નહીં. તમને જણાવી દઈએ કે કતાર અને કુવૈતમાં અમેરિકાના મોટા સૈન્ય મથકો છે. અમેરિકા પણ આ દેશોને લાંબા સમયથી સુરક્ષા આપી રહ્યું છે. જો કે આ બંને દેશો ઇઝરાયેલ અને ઇરાન વચ્ચેના યુદ્ધ દરમિયાન તેમના નજીકના પાડોશી ઇરાન સાથે દુશ્મની લેવા માંગતા નથી.
ઈઝરાયલ-હમાસ યુદ્ધ વચ્ચે વધુ એક મોટા યુદ્ધની દહેશતથી દુનિયા ડરી ગઈ છે. વિશ્વના પ્રખ્યાત અખબાર વોલ સ્ટ્રીટ જર્નલનો દાવો છે કે ઈરાન આગામી 48 કલાકમાં ઈઝરાયેલ પર હુમલો કરી શકે છે. વોલ સ્ટ્રીટ જર્નલના આ અહેવાલે સમગ્ર વિશ્વમાં હલચલ મચાવી દીધી છે. અખબારના અહેવાલ મુજબ ઈઝરાયેલ પણ ઈરાન તરફથી નિકટવર્તી સીધા હુમલાની તૈયારી કરી રહ્યું છે. સૂત્રોના જણાવ્યા અનુસાર ઈરાને ઈઝરાયલથી બદલો લેવા માટે સંપૂર્ણ પ્લાન પણ બનાવી લીધો છે. પરંતુ એ નથી જણાવવામાં આવ્યું કે ઈરાન 48 કલાકમાં કયા સમયે હુમલો કરી શકે છે. એટલું જ કહેવામાં આવ્યું છે કે ઈરાન આગામી 2 દિવસમાં ઈઝરાયેલ પર હુમલો કરી શકે છે.
