નવી દિલ્હી: ગયા વર્ષે જ શરૂ થયેલી અકાસા એરલાઇન્સ (Akasa airlines) પર બંધ થવાના સંકટ દેખાઇ રહ્યા છે. શેરબજારના બિગ બુલ (Big Bull) તરીકે ઓળખાતા રાકેશ ઝુનઝુનવાલાએ રોકાણ કરેલી એરલાઈન્સ (Airlines) અકાસા એરલાઈન્સ પર કટોકટી વધુ ઘેરી બની છે. ખાનગી ક્ષેત્રની આ ઉડ્ડયન કંપનીના 43 પાઈલટોએ (Pilots) અચાનક રાજીનામું આપી દીધું છે અને એરલાઈન્સે પોતે આ માહિતી દિલ્હી હાઈકોર્ટને (Delhi Highcourt) આપી છે. આ પાઈલટોના રાજીનામાને કારણે કંપની મુશ્કેલીમાં છે અને બંધ પણ થઈ શકે છે.
એરલાઇનના વકીલે જસ્ટિસ મનમીત પ્રીતમ સિંહ અરોરાને જણાવ્યું હતું કે છ મહિના (પ્રથમ અધિકારીઓ માટે) અને એક વર્ષ (પાયલોટ્સ માટે) નો ફરજિયાત નોટિસ સમયગાળો પૂર્ણ કર્યો ન હોવાથી, અકાસા એરને દરરોજ ઘણી ફ્લાઇટ્સ રદ કરવાની ફરજ પડી હતી. પાઇલટ્સના અચાનક જવાને કારણે એરલાઇન્સને સપ્ટેમ્બરમાં દરરોજ લગભગ 24 ફ્લાઇટ્સ કેન્સલ કરવી પડી છે અને તેના કારણે કંપનીને મોટું નુકસાન પણ થઈ રહ્યું છે.
એરલાઇન કંપની દ્વારા કહેવામાં આવ્યું હતું કે અમે ઓગસ્ટમાં લગભગ 600 ફ્લાઇટ્સ કેન્સલ કરી છે અને જો પાઇલોટ્સ આ રીતે એરલાઇન્સ છોડવાનું ચાલુ રાખશે તો સપ્ટેમ્બરમાં પણ 600 થી 700 ફ્લાઇટ્સ કેન્સલ કરવી પડી શકે છે. નોંધનીય છે કે અકાસા એર વિવિધ હવાઈ માર્ગો પર દરરોજ લગભગ 120 ફ્લાઈટ્સનું સંચાલન કરે છે. વકીલ દ્વારા એવી દલીલ કરવામાં આવી હતી કે કોઈ પણ પાઈલટ અચાનક કંપની છોડી દે તો તેના સ્થાને તાત્કાલિક તૈનાત કરવી મુશ્કેલ છે.
આ મામલે એરલાઈને કહ્યું હતું કે તે પાઇલોટ્સ સામે કાનૂની કાર્યવાહીની માંગ કરી રહી છે જેઓ તેમના કરારની નોટિસ અવધિ પૂર્ણ કર્યા વિના નીકળી ગયા હતા. અકાસા એરના પ્રવક્તાએ જણાવ્યું હતું કે, ‘અમે માત્ર પાઇલટ્સના એક નાના જૂથ સામે કાનૂની કાર્યવાહીની માંગ કરી છે જેમણે તેમની ફરજો છોડી દીધી હતી અને તેમની ફરજિયાત કોન્ટ્રાક્ટ નોટિસ અવધિ પૂર્ણ કર્યા વિના છોડી દીધી હતી. આ માત્ર તેમના કરારનું જ નહીં પરંતુ દેશના નાગરિક ઉડ્ડયન નિયમનનું પણ ઉલ્લંઘન હતું. આ માત્ર કાયદાની દૃષ્ટિએ ગેરકાયદેસર નથી પણ એક અનૈતિક અને સ્વાર્થી કૃત્ય પણ છે, જેણે ઓગસ્ટમાં ફ્લાઈટ્સને વિક્ષેપિત કરી હતી, જેના કારણે છેલ્લી ઘડીએ કેન્સલેશન થયું હતું, હજારો ગ્રાહકો ફસાયા હતા, જેના કારણે પ્રવાસી જનતાને ભારે અસુવિધા થઈ હતી.
