નવી દિલ્હીઃ ખેડૂતો છેલ્લા 10 મહિનાથી હરિયાણાની શંભુ બોર્ડર પર ઉભા છે. ત્યાં ખેડૂત નેતા જગજીત સિંહ દલ્લેવાલ 35 દિવસથી ભૂખ હડતાળ પર છે. તેમની તબિયત સતત બગડી રહી છે. આ મામલામાં મંગળવારે સુપ્રીમ કોર્ટની સ્પેશિયલ બેન્ચે ફરી એકવાર સુનાવણી કરી જે દરમિયાન ખેડૂતો વતી કોર્ટમાં એવું કહેવામાં આવ્યું કે જો કેન્દ્ર સરકાર વાત કરવા તૈયાર હશે તો જ ખેડૂત નેતા જગજીત સિંહ દલ્લેવાલ તબીબી મદદ લેશે.
સુપ્રીમ કોર્ટમાં જસ્ટિસ સૂર્યકાન્ત અને જસ્ટિસ સુધાંશુ ધુલિયાની સ્પેશિયલ વેકેશન બેન્ચે મંગળવારે સુનાવણી હાથ ધરી હતી અને પંજાબ સરકારને દલ્લેવાલને મેડિકલ સહાય પૂરી પાડવાના નિર્દેશોનું પાલન કરવા માટે વધુ સમય આપ્યો હતો. અગાઉ 28 ડિસેમ્બરે સુનાવણી દરમિયાન સુપ્રીમ કોર્ટે પંજાબ સરકારને દલ્લેવાલને તબીબી સહાય પૂરી પાડવાના નિર્દેશોને લાગુ ન કરવા બદલ સખત ઠપકો આપ્યો હતો. હવે વિશેષ બેન્ચે પંજાબ સરકારને દલ્લેવાલના સ્વાસ્થ્ય અંગે ચર્ચા કરવા અને ખેડૂતો સાથે બેઠક કરીને યોગ્ય ઉકેલ શોધવા માટે બે દિવસનો સમય આપ્યો છે.
ઓર્ડરનું પાલન કરવું આવશ્યક છે
સુપ્રીમ કોર્ટે કહ્યું કે અમારા આદેશોનું દરેક કિંમતે પાલન થવું જોઈએ અને કેન્દ્ર સરકાર શક્ય તમામ મદદ કરશે. સુપ્રીમ કોર્ટે પંજાબ સરકારને પૂછ્યું કે તે શા માટે વધુ સમય માંગી રહી છે. પંજાબ સરકારના એડવોકેટ જનરલે કોર્ટને જણાવ્યું કે કેટલાક જવાબદાર લોકો દલ્લેવાલ સાથે વાત કરવા ગયા હતા.
ગઈ કાલે બે ઘટના બની. પહેલા પંજાબ બંધનું એલાન કરવામાં આવ્યું હતું, જેના કારણે સમગ્ર પંજાબમાં નાકાબંધી કરવામાં આવી હતી. બીજી વાત એ છે કે કેન્દ્ર સરકારને એવો પ્રસ્તાવ મુકવામાં આવ્યો છે કે જો દલ્લેવાલને વાતચીતનો પ્રસ્તાવ મળે તો તેઓ મેડિકલ મદદ લેવા તૈયાર છે.
સુનાવણી દરમિયાન એડવોકેટ જનરલ ગુરવિંદર સિંહે બેંચને જણાવ્યું હતું કે દરમિયાનગીરી કરનારાઓ વિરોધ સ્થળ પર ગયા હતા અને કોર્ટના આદેશનું પાલન કરાવવાનો પ્રયાસ કર્યો હતો. વિરોધ કરી રહેલા ખેડૂતોએ પ્રસ્તાવ મૂક્યો છે કે જો કેન્દ્ર તેમની સાથે વાત કરવા તૈયાર હોય અને આમંત્રણ આપવામાં આવે તો દલ્લેવાલ તબીબી મદદ લેશે.
ડીજીપી વીડિયો કોન્ફરન્સિંગ દ્વારા હાજર રહ્યા
સુનાવણી દરમિયાન સુપ્રીમ કોર્ટે પંજાબ સરકારની માંગ પર સમય લંબાવ્યો અને કહ્યું કે આગામી સુનાવણી 2 જાન્યુઆરી 2025 ના રોજ થશે. મંગળવારની સુનાવણી દરમિયાન પંજાબના મુખ્ય સચિવ અને ડીજીપી પણ વીડિયો કોન્ફરન્સિંગ દ્વારા હાજર રહ્યા હતા. સુપ્રીમ કોર્ટે પંજાબના મુખ્ય સચિવ અને ડીજીપીને આગામી સુનાવણીમાં પણ વર્ચ્યુઅલ રીતે હાજર રહેવા જણાવ્યું છે.
તમને જણાવી દઈએ કે સુપ્રીમ કોર્ટ દલ્લેવાલને મેડિકલ સહાય આપવાના કોર્ટના આદેશનું પાલન ન કરવા બદલ મુખ્ય સચિવ અને ડીજીપી વિરુદ્ધ અવમાનનાની અરજી પર સુનાવણી કરી રહી છે. પંજાબ અને હરિયાણા રાજ્યો વચ્ચે શંભુ બોર્ડર ખોલવાના પંજાબ અને હરિયાણા હાઈકોર્ટના નિર્દેશ વિરુદ્ધ હરિયાણાની અરજી પર પણ સુપ્રીમ કોર્ટ સુનાવણી કરી રહી છે.
