નવી દિલ્હી: હાલમાં દેશમાં ફુગાવો છેલ્લાં કેટલાંક વર્ષોના ઊંચા સ્તર પર છે. જેના લીધે રિઝર્વ બેંકને (RBI) ટૂંકા સમયમાં બીજી વાર રેપો રેટ (Repo Rate) વધારવાની ફરજ પડી છે. રિઝર્વ બેંકે રેપો રેટમાં વધારો કરતાની સાથે જ બેંકોએ (Bank) વ્યાજદરમાં (Interest Rate ) વધારો કરવાનું શરૂ કરી દીધું છે. વ્યાજદરમાં વધારાને કારણે લોનની (Loan) EMI સતત વધી રહી છે.
બેકાબૂ મોંઘવારી પર અંકુશ મેળવવા માટે રિઝર્વ બેંક એક મહિનામાં બીજીવાર રેપો રેટ વધાર્યો છે. આ અગાઉ રિઝર્વ બેંકે મે મહિનામાં રેપો રેટમાં 0.40 ટકાનો વધારો કર્યો હતો. તે પછી જૂનમાં યોજાયેલી MPC મીટિંગ (RBI MPC મીટ જૂન 2022) પછી, કેન્દ્રીય બેંકે ફરીથી રેપો રેટમાં 0.50 ટકાનો વધારો જાહેર કર્યો છે. આ રીતે મે-જૂનમાં રેપો રેટ 0.90 ટકા વધીને 4.90 ટકા થયો છે. રેપો રેટમાં નવીનતમ વધારો આ અઠવાડિયે બુધવારે તા. 8મી જૂનના રોજ થયો હતો. આ પછી માત્ર 24 કલાકમાં 7 બેંકોએ વ્યાજદરમાં વધારો કરવાની જાહેરાત કરી.
ICICI બેંકઃ રિઝર્વ બેંકની જાહેરાત બાદ ખાનગી ક્ષેત્રની આ બીજી સૌથી મોટી બેંક ગ્રાહકો પર વધેલા દરનો બોજ નાખવામાં આગળ હતી. ICICI બેન્કે ગુરુવારે બેન્ચમાર્ક ધિરાણ દર 0.50 ટકા વધારીને 8.60 ટકા કર્યો છે. ICICI બેંકની વેબસાઈટ પર એક નોટિફિકેશનમાં આપવામાં આવેલી માહિતી અનુસાર, એક્સટર્નલ બેન્ચમાર્ક લેન્ડિંગ રેટ (EBLR)ના વધેલા દર 8 જૂનથી લાગુ થઈ ગયા છે. આ સાથે બેંકે MCLRમાં પણ વધારો કર્યો છે. MCLRના વધેલા દરો 01 જૂનથી અમલી બન્યા છે. બેંકે કહ્યું કે રાતોરાત, એક મહિના અને ત્રણ મહિના માટે MCLR હવે અનુક્રમે 7.30 ટકા અને 7.35 ટકા છે. એ જ રીતે, સુધારેલ MCLR છ મહિના માટે 7.50 ટકા અને એક વર્ષ માટે 7.55 ટકા છે.
બેંક ઓફ બરોડા: બેંક ઓફ બરોડાએ બરોડા રેપો લિંક્ડ લેન્ડિંગ રેટ (BRLLR) વધારવાની જાહેરાત કરી છે. બેંકે કહ્યું કે હવે આ દર વધીને 7.40 ટકા થઈ ગયો છે. આમાં 4.90 ટકા આરબીઆઈના રેપો રેટનો ભાગ છે. આ સિવાય બેંકે 2.50 ટકા માર્ક અપ ઉમેર્યો છે. બેંક ઓફ બરોડાએ ગુરુવારે જણાવ્યું હતું કે નવા દરો 09 જૂનથી લાગુ થઈ ગયા છે.
પંજાબ નેશનલ બેંકઃ પંજાબ નેશનલ બેંકે રેપો લિંક્ડ લેન્ડિંગ રેટ (RLLR) વધાર્યો છે. જાહેર ક્ષેત્રની બીજી સૌથી મોટી બેંકે કહ્યું કે તેણે હવે રેપો લિંક્ડ લેન્ડિંગ રેટ (RLLR) વધારીને 7.40 ટકા કર્યો છે. PNBના વધેલા વ્યાજ દરો પણ 9 જૂનથી અમલમાં આવી ગયા છે.
બેંક ઓફ ઈન્ડિયાઃ બેંક ઓફ ઈન્ડિયાએ પણ પોતાની વેબસાઈટ પર વ્યાજ દરો વધારવાની માહિતી આપી છે. બેંક ઓફ બરોડાએ કહ્યું કે તેણે હવે રેપો આધારિત લેન્ડિંગ રેટ (RBLR) વધારીને 7.75 ટકા કર્યો છે. બેંક ઓફ ઈન્ડિયાએ કહ્યું કે, રિઝર્વ બેંકે રેપો રેટ વધારીને 4.90 ટકા કર્યા બાદ તેણે વ્યાજદરમાં વધારો કરવાનો નિર્ણય લીધો છે.
HDFC લિમિટેડ: HDFC લિમિટેડ દેશની સૌથી મોટી હાઉસિંગ ફાઇનાન્સ કંપની છે. HDFC લિમિટેડે કહ્યું કે તેણે હાઉસિંગ લોન માટે બેન્ચમાર્ક રિટેલ પ્રાઇમ લેન્ડિંગ રેટ (RPLR) વધાર્યો છે. HDFC લિમિટેડની એડજસ્ટેબલ રેટ હોમ લોન (ARHL) આ દર પર આધારિત છે. કંપનીએ આ દરમાં 0.50 ટકાનો વધારો કર્યો છે. કંપનીએ BSEને જણાવ્યું કે વધેલા દરો 10 જૂનથી લાગુ થઈ ગયા છે.
ઈન્ડિયન ઓવરસીઝ બેંકઃ ઈન્ડિયન ઓવરસીઝ બેંકે પણ રેગ્યુલેટરી ફાઈલિંગમાં વ્યાજ દરો વધારવાની માહિતી આપી છે. ઈન્ડિયન ઓવરસીઝ બેંકે કહ્યું કે તેણે રેપો લિંક્ડ લેન્ડિંગ રેટ (RLLR) વધારીને 7.75 ટકા કરવાનો નિર્ણય કર્યો છે. જેમાં 4.90 ટકા રેપો રેટ અને 2.85 ટકા માર્જિન સામેલ છે. બેંકે કહ્યું કે વધેલા વ્યાજ દરો 10 જૂનથી લાગુ થઈ ગયા છે.
HDFC બેંકઃ દેશની સૌથી મોટી ખાનગી બેંકે હાઉસિંગ લોનથી લઈને કાર લોન અને પર્સનલ લોન પરના વ્યાજદરમાં વધારો કર્યો છે. જોકે, આ બેંકે આરબીઆઈની જાહેરાત પહેલા જ વ્યાજદરમાં વધારો કરી દીધો હતો. બેંકે રેપો લિંક્ડ લેન્ડિંગ રેટ (RLLR) 0.50 ટકા વધારીને 7.40 ટકા કર્યો છે. આ સિવાય આરએલએલઆર પર આધારિત ન હોય તેવી અન્ય લોનના વ્યાજ દરમાં 0.35 ટકાનો વધારો કરવામાં આવ્યો છે
