નવી દિલ્હીઃ ભારતીય અબજોપતિ અને અદાણી ગ્રુપના ચેરમેન ગૌતમ અદાણીને અમેરિકા તરફથી મોટો ઝટકો લાગ્યો છે. તેમની કંપની પર યુએસમાં રોકાણકારો સાથે છેતરપિંડી કરવાનો અને સોલાર એનર્જી કોન્ટ્રાક્ટ મેળવવા માટે ભારતીય અધિકારીઓને હજારો કરોડ રૂપિયાની લાંચ આપવાનો આરોપ છે.
આ સમગ્ર મામલો અદાણી ગ્રીન એનર્જી અને અન્ય કંપનીઓ સાથે સંબંધિત છે. આ સમાચાર આવતાં જ ગુરુવારે શેરબજારમાં અરાજકતા જોવા મળી હતી અને ગૌતમ અદાણીની તમામ કંપનીઓના શેર તૂટ્યા હતા. આ દરમિયાન અદાણી ગ્રુપ દ્વારા એક મોટું નિવેદન બહાર પાડવામાં આવ્યું છે.
અમેરિકામાં અદાણી પર શું છે આરોપ?
રિપોર્ટ્સ અનુસાર અમેરિકામાં ગૌતમ અદાણી અને તેમની કંપની અદાણી ગ્રીન એનર્જી પર ગંભીર આરોપો લગાવવામાં આવ્યા છે. એવો દાવો કરવામાં આવ્યો છે કે 2020 અને 2024 ની સમયગાળા દરમિયાન અદાણી ગ્રીન અને એઝ્યુર પાવર ગ્લોબલને આ સોલાર પ્રોજેક્ટ મેળવવા માટે ભારતીય અધિકારીઓને લાંચ આપવામાં આવી હતી.
ગૌતમ અદાણી પર ભારતીય અધિકારીઓને $265 મિલિયન (આશરે રૂ. 2236 કરોડ)ની લાંચ આપવાનો અને તેમની કંપની અદાણી ગ્રીન એનર્જી લિમિટેડ માટે યુએસમાં સોલાર એનર્જી પ્રોજેક્ટ માટે કોન્ટ્રાક્ટ મેળવવા માટે તેને છુપાવવાનો આરોપ છે.
આ કોન્ટ્રાક્ટ દ્વારા 20 વર્ષમાં બે અબજ ડોલરથી વધુનો નફો થવાનો અંદાજ હતો અને તેનો લાભ લેવા માટે ખોટા દાવા કરીને લોન અને બોન્ડ ઉભા કરવામાં આવ્યા હતા. હિંડનબર્ગની અસરમાંથી બહાર આવેલા ગૌતમ અદાણી માટે આ મોટો ફટકો માનવામાં આવી રહ્યો છે.
શેરબજારમાં અદાણીની કંપનીઓના શેર્સ તૂટ્યાં
આ સમાચાર બહાર આવતાની સાથે જ શેરબજારમાં અદાણી ગ્રૂપની લિસ્ટેડ કંપનીઓના શેરોમાં ભૂકંપ આવી ગયો હતો અને તે ખરાબ રીતે તૂટ્યા હતા. સૌથી મોટો ઘટાડો અદાણી ગ્રીન એનર્જી અને અદાણી એનર્જી સોલ્યુશન્સના શેરમાં થયો હતો, જે 20 ટકા ઘટ્યો હતો.
આ સિવાય અદાણી પાવર (13.75%), અદાણી પોર્ટ્સ (10.00%), અદાણી વિલ્મર (9.51%), અદાણી એન્ટરપ્રાઇઝ (10%), અદાણી ટોટલ ગેસ 14.70%, ACC લિમિટેડ 14.35%, અંબુજા સિમેન્ટ્સ 10.00% અને એનડીટીવી શેર 12.29% સુધી ઘટ્યો હતો.
અદાણી ગ્રીને ખુલાસો જાહેર કર્યો
આ સમગ્ર મામલે અદાણી ગ્રુપનું નિવેદન પણ આવ્યું છે. તેમાં કહેવામાં આવ્યું છે કે યુએસ ડિપાર્ટમેન્ટ ઑફ જસ્ટિસ અને એસઈસીએ અમારા બોર્ડના સભ્યો ગૌતમ અદાણી અને સાગર અદાણી વિરુદ્ધ ઈસ્ટર્ન ડિસ્ટ્રિક્ટ ઑફ ન્યૂ યોર્ક માટે યુએસ ડિસ્ટ્રિક્ટ કોર્ટમાં આરોપ જારી કર્યો છે સભ્ય વિનીત જૈન પણ આમાં સામેલ છે.
આ ડેવલપમેન્ટને જોતાં અમારી પેટા કંપનીઓએ તે સમય માટે સૂચિત યુએસડી ડિનોમિનેટેડ બોન્ડ ઓફરિંગ સાથે આગળ ન વધવાનું નક્કી કર્યું છે. બ્લૂમબર્ગના જણાવ્યા અનુસાર, અમેરિકાના આરોપો બાદ અદાણી ગ્રૂપની કંપનીઓએ $600 મિલિયનના બોન્ડ્સ રદ કર્યા છે.
