વલસાડ: ગુજરાત સરકાર નિર્મિત અને શહેરના પોશ વિસ્તાર ગણાતા ‘સરદાર હાઈટ્સ’ (ગુજરાત હાઉસિંગ બોર્ડ) સંકુલમાં લિફ્ટની દુર્ઘટનાઓ અટકવાનું નામ લેતી નથી. સોમવારે અહીંના એક રહીશ વત્સલભાઇ પાંચાલ લિફ્ટમાંથી ઉતરે એ પહેલાં જ લિફ્ટ ઉપર જતી રહી હોવાની ઘટના બની હતી, જેમાં વત્સલભાઈ એકાદ સેકન્ડ મોડા પડ્યા હોત તો ય જીવલેણ દુર્ઘટના થાત! એ પછી મંગળવારે દૂધવાળા સાથે પણ એવી જ ઘટના બની. લિફ્ટનો દરવાજો ખુલતાની સાથે જ લિફ્ટ ઉપરના માળ તરફ જતી રહી! દૂધવાળાભાઈની સમયસૂચકતાને કારણે એમનો જીવ બચ્યો હતો. એ પછી ધુળેટીના દિવસે તો બે નાની બાળકીઓ લિફ્ટમાં ફસાઈ ગઈ હતી! આ ત્રણેય દુર્ઘટનાઓના સીસીટીવી ફૂટેજ જોયા પછી સરદાર હાઈટ્સમાં વસતા આશરે છ હજાર રહીશો ફફડી ઉઠયા છે. સાથે જ લિફ્ટનુ મેઈન્ટેનન્સ કરતી ઓમેગા એલીવેટર્સ કંપની સામે પણ આક્રોશ ફાટી નીકળ્યો છે. આજે સોસાયટીના વહીવટદારોએ કંપનીના પ્રતિનિધિને બોલાવીને આડે હાથે લીધા હતા. જો કે પ્રતિનિધીએ એ સામે પોતાનો લૂલો બચાવ રજૂ કર્યો હતો.
લાખોનો કોન્ટ્રાક્ટ: પણ પૈસા મેઈન્ટેનન્સ માટે આપવાના કે દુર્ઘટનાઓ માટે?
સોસાયટીના વહીવટદારોએ તાત્કાલિક બોલાવેલી બેઠકમાં ઓમેગા એલીવેટર્સ કંપનીના પ્રતિનિધિ તરીકે શૈલેષભાઈ હાજર રહ્યા હતા, જેણે તમામ લિફ્ટનું ઝીણવટભર્યું ચેકિંગ કરવાની વાત કરી હતી. સાથે જ લૂલો બચાવ કરતા એવી આશંકા રજૂ કરી હતી કે લિફ્ટનું સ્ટોપ બટન કોઇ ત્રાહિત વ્યક્તિએ દબાવ્યું હોઈ શકે. જો કે પ્રેક્ટિકલી આવું થવાની શક્યતા નહિવત જણાય છે.
નોંધનીય છે કે સરદાર હાઇટ્સ સોસાયટી દ્વારા ઓમેગા એલિવેટર્સને લિફ્ટના મેન્ટેનન્સનો વાર્ષિક રૂ. 11 લાખની માતબર રકમનો મેન્ટેન્સ કોન્ટ્રાક્ટ અપાયો છે. દર મહિને એક લિફ્ટના અઢી હજાર પૈકી 36 લિફ્ટના રૂ. 91 હજાર મેન્ટેનન્સ પેટે ચૂકવાઇ રહ્યા છે. જોકે, તેમાં સ્પેરપાર્ટ્સની જરૂર હોય તો તેનો ચાર્જ જુદો રહે છે. રહીશોની ફરિયાદ મુજબ આટલા રૂપિયા ખર્ચવા છતાં લિફ્ટનું મેન્ટેનન્સ થતું જ નથી. જ્યારે કોઇ તકલીફ આવે અને ફરિયાદ કરીએ તો જ એની મરામત થાય છે. ત્યારે આ કોન્ટ્રાક્ટ સામે પણ સવાલો ઉઠી રહ્યા છે.
જુઓ વિડીયો
