ભારતીય સ્ટાર બેડમિન્ટન ખેલાડી પીવી સિંધુ જે હાલમાં ઇન્ડોનેશિયા માસ્ટર્સમાં ભાગ લઈ રહી છે, તેણે પ્રી-ક્વાર્ટર ફાઇનલમાં ડેનિશ ખેલાડી લાઇન હોઝમાર્ક કઝેરફેલ્ડ્ સામે સીધા સેટમાં વિજય મેળવીને ક્વાર્ટર ફાઇનલમાં પોતાનું સ્થાન સુરક્ષિત કર્યું. પીવી સિંધુએ ઇન્ડોનેશિયા માસ્ટર્સમાં પડકારજનક શરૂઆત કરી હતી, તેણીને પોતાનો પહેલો મેચ જીતવા માટે સખત મહેનત કરવી પડી હતી. પ્રી-ક્વાર્ટર ફાઇનલમાં સિંધુનો વિજય ઐતિહાસિક હતો જેણે એક એવો માઇલસ્ટોન હાંસલ કર્યો જે અગાઉ કોઈ અન્ય ભારતીય મહિલા બેડમિન્ટન ખેલાડીએ સિંગલ્સમાં હાંસલ કર્યો ન હતો.
પીવી સિંધુએ કારકિર્દીની 500 જીત પૂર્ણ કરી
ઇન્ડોનેશિયા માસ્ટર્સ સુપર 500 ટુર્નામેન્ટમાં પીવી સિંધુએ લાઇન હોઝમાર્ક કઝરફેલ્ડ સામે પ્રી-ક્વાર્ટર ફાઇનલ મેચ ફક્ત 43 મિનિટમાં જીતીને પ્રથમ સેટ 21-19થી જીતી લીધો. ત્યારબાદ તેણીએ બીજો સેટ 21-18થી જીતીને ક્વાર્ટર ફાઇનલમાં પોતાનું સ્થાન સુરક્ષિત કર્યું. આ મેચમાં પીવી સિંધુનો વિજય તેમની કારકિર્દીની ૫૦૦મી સિંગલ્સ જીત હતી જેનાથી તેઓ આ સિદ્ધિ મેળવનાર પ્રથમ ભારતીય મહિલા બેડમિન્ટન ખેલાડી બની. પીવી સિંધુ ૫૦૦ કે તેથી વધુ સિંગલ્સ મેચ જીતનાર વિશ્વની છઠ્ઠી મહિલા ખેલાડી પણ છે. પીવી સિંધુ હવે ઇન્ડોનેશિયા માસ્ટર્સના ક્વાર્ટર ફાઇનલમાં વિશ્વની ચોથી ક્રમાંકિત ચીનની ચેન યુ ફેઇનો સામનો કરશે. સિંધુ અને ફેઇ અત્યાર સુધીમાં ૧૩ વખત એકબીજાનો સામનો કરી ચૂક્યા છે જેમાં ફેઇએ ૭ મેચ જીતી છે જ્યારે સિંધુ ૬ મેચ જીતવામાં સફળ રહી છે.
લક્ષ્ય સેને પણ ક્વાર્ટર ફાઇનલમાં પ્રવેશ કર્યો છે. પીવી સિંધુ ઉપરાંત પુરુષ વર્ગમાં ભાગ લેનાર લક્ષ્ય સેને પણ ઇન્ડોનેશિયા માસ્ટર્સ ૫૦૦ના ક્વાર્ટર ફાઇનલમાં પોતાનું સ્થાન નિશ્ચિત કર્યું છે. પ્રી-ક્વાર્ટર ફાઇનલ મેચમાં લક્ષ્ય સેને હોંગકોંગના જેસન ગુણવાનને સીધા સેટમાં ૨૧-૧૦ અને ૨૧-૧૧થી હરાવ્યો હતો, જે લગભગ અડધા કલાક સુધી ચાલેલી મેચ હતી. હવે લક્ષ્ય સેન થાઇલેન્ડના પક્કાપોન તિરારાત્સાકુલનો સામનો કરશે.
