બિહાર વિધાનસભા ચૂંટણીમાં કારમી હાર બાદ જન સૂરાજ પાર્ટી (JSP)ને માટે પૈસા ભેગા કરવા પાર્ટીના સુપ્રીમો પ્રશાંત કિશોરે કેટલાક નિર્ણયો લીધા છે, જેમાં તેમની સાથેની મુલાકાતનો રેટ પણ નક્કી થયો છે. પ્રશાંત કિશોરને મળવા માટે અઘોષિત ફીની જાહેરાત કરાઈ છે, જેમાં મિલકત અને કમાણીનું દાન પણ સામેલ છે.
પ્રશાંત કિશોરે કહ્યું છે કે તેઓ બિહારમાં વ્યવસ્થા પરિવર્તન માટેના તેમના આંદોલનને પૈસાના અભાવે બંધ થવા દેશે નહીં અને જન સૂરાજ પાર્ટી 15 જાન્યુઆરીથી એક નવી ઝુંબેશ શરૂ કરશે. તેમણે કહ્યું છે કે હવેથી તેઓ ફક્ત એવા લોકોને જ મળશે જે એક વર્ષમાં જન સૂરાજ પાર્ટીને ઓછામાં ઓછા એક હજાર રૂપિયાનું દાન કરશે.
બિહાર વિધાનસભાની 238 બેઠકો પર ચૂંટણી લડનાર જન સૂરાજ પાર્ટીને 3.34 ટકા મત મળ્યા પરંતુ તે એક પણ બેઠક જીતી શકી નહીં. 243 બેઠકો પર ચૂંટણી લડી રહેલા ઉમેદવારોમાંથી 5 ઉમેદવારોએ ઉમેદવારી પાછી ખેંચી લીધી અથવા તેમના ઉમેદવારી પત્રો રદ કરવામાં આવ્યા. પાર્ટી 1 બેઠક પર બીજા ક્રમે, 129 બેઠકો પર ત્રીજા ક્રમે અને 73 બેઠકો પર ચોથા ક્રમે રહી. જન સૂરાજ પાર્ટીને 35 બેઠકો પર જીત કે હારના માર્જિન કરતાં વધુ મત મળ્યા.
ચૂંટણીમાં પાર્ટીની હારનો પસ્તાવો કરવા માટે પ્રશાંતે ચંપારણના ગાંધી આશ્રમમાં 24 કલાકના ઉપવાસ કર્યા હતા. ઉપવાસ સમાપ્ત થયા પછી પ્રશાંત કિશોરે મીડિયા સાથે વાત કરતી વખતે જાહેરાતો કરી.
પોતાની સંપત્તિ પાર્ટીને દાનમાં આપી
પ્રશાંત કિશોરે કહ્યું કે તેઓ છેલ્લા 20 વર્ષમાં મેળવેલી તેમની બધી જંગમ અને સ્થાવર સંપત્તિ જન સૂરજ પાર્ટીને દાનમાં આપી રહ્યા છે. તેમણે કહ્યું કે તેમની બધી સંપત્તિમાંથી તેઓ દિલ્હીમાં તેમના પરિવાર માટે એક ઘર રાખી રહ્યા છે.
પ્રશાંતે એવી પણ જાહેરાત કરી કે તેઓ આગામી પાંચ વર્ષમાં સલાહકાર કાર્યમાંથી થતી તેમની આવકનો 90 ટકા હિસ્સો જન સૂરાજ પાર્ટીને દાન કરશે. તેમણે કહ્યું કે જન સૂરાજ પાર્ટીના કાર્યકરો 15 જાન્યુઆરીથી બિહારના દરેક વોર્ડની મુલાકાત લેશે અને સરકારના વચનો મુજબ મહિલાઓ પાસેથી 10,000 રૂપિયા અને 2 લાખ રૂપિયાના ફોર્મ ભરવા અને સબમિટ કરાવવામાં આવશે.
