સોમવારે તા. 10 નવેમ્બરની સાંજે 6:52 વાગ્યે રાજધાની દિલ્હીમાં લાલ કિલ્લા પાસે થયેલા આતંકવાદી વિસ્ફોટના નવા સીસીટીવી ફૂટેજ સામે આવ્યા છે. સીસીટીવી ફૂટેજમાં જોવા મળી રહ્યું છે કે સિગ્નલ પર વિસ્ફોટ થતાં જ કેમેરા પણ તૂટી ગયા હતા. સ્ક્રીન પર આ વીડિયો જોનારા પણ ધ્રુજી ગયા હતા.
પોલીસના જણાવ્યા અનુસાર, આ સીસીટીવી ફૂટેજ વિસ્ફોટના એક મિનિટ પહેલા લેવામાં આવ્યો હતો. સોમવારે સાંજે 6:51 વાગ્યે વિસ્ફોટના સ્થળે ભારે ટ્રાફિક હતો. બીજી જ મિનિટે એક શક્તિશાળી વિસ્ફોટ થયો, જેનાથી અનેક વાહનોને અસર થઈ.
આ આતંકવાદી હુમલામાં અત્યાર સુધીમાં 10 લોકોના મોત થયા છે, જ્યારે 26 લોકો ઘાયલ થયા છે. વધુમાં, ઘણા વાહનો બળીને રાખ થઈ ગયા હતા. વધુમાં ઘટનાસ્થળથી 100 મીટર દૂર શરીરના ભાગો મળી આવ્યા હતા. આ ભયાનક દ્રશ્ય જોનાર કોઈપણ વ્યક્તિ ભયભીત થઈ ગયો હતો.
પોલીસના જણાવ્યા અનુસાર, લાલ કિલ્લા પાસે વિસ્ફોટ થયેલી કારમાં આતંકવાદી ડૉ. ઉમર નબી મુસાફરી કરી રહ્યો હતો. i20 કારનો રજીસ્ટ્રેશન નંબર ( HR 26CE7674) હરિયાણાનો હતો.
ધમાકા પહેલા કાર ક્યાં હતી?, તપાસમાં ખુલાસો
દિલ્હીમાં લાલ કિલ્લા પાસે સોમવારે સાંજે થયેલા બોમ્બ વિસ્ફોટની તપાસમાં અનેક નવા ખુલાસા થયા છે. પોલીસે કાર અને તેના ડ્રાઇવર ઉમર વિશે વિગતો મેળવી છે, જેમાં દિલ્હીમાં તે પહેલી વાર ક્યાં જોવા મળી હતી તે પણ શામેલ છે. સફેદ હ્યુન્ડાઇ 120 વિસ્ફોટના કલાકો પહેલા કનોટ પ્લેસ અને મયુર વિહાર જેવા ભીડવાળા વિસ્તારોમાં જોવા મળી હતી. બાદમાં, ડો. ઉમર નબીએ ચાંદની ચોકમાં સુનહેરી મસ્જિદ પાર્કિંગમાં કાર પાર્ક કરી હતી.
સૂત્રોના જણાવ્યા અનુસાર, કાર 10 નવેમ્બરના રોજ બપોરે 3:19 વાગ્યે પાર્કિંગમાં પ્રવેશી હતી અને લગભગ 6:30 વાગ્યે નીકળી ગઈ હતી. તપાસમાં જાણવા મળ્યું છે કે કાર 29 ઓક્ટોબરથી 10 નવેમ્બર દરમિયાન અલીગઢના અલ-ફલાહ યુનિવર્સિટી કેમ્પસમાં પાર્ક કરવામાં આવી હતી, તે જ જગ્યાએ જ્યાં એક સ્વિફ્ટ ડિઝાયર કાર પણ પાર્ક કરવામાં આવી હતી. સ્વિફ્ટ કાર ડૉ. મુઝમ્મિલ શકીલના નામે નોંધાયેલી છે. હરિયાણાના ફરીદાબાદમાં 2,900 કિલો વિસ્ફોટકો જપ્ત કરવાના સંબંધમાં શકીલની ધરપકડ કરવામાં આવી છે.
પોલીસ સૂત્રોએ જણાવ્યું હતું કે આ કાર ડૉ. શાહીન સઈદના નામે નોંધાયેલી હતી. તેમના ઠેકાણામાંથી એસોલ્ટ રાઈફલ્સ અને દારૂગોળો પણ મળી આવ્યો હતો. તપાસ એજન્સીઓને શંકા છે કે વિસ્ફોટમાં એમોનિયમ નાઈટ્રેટ સહિત ઉચ્ચ કક્ષાના લશ્કરી વિસ્ફોટકોનો ઉપયોગ કરવામાં આવ્યો હતો.
ઓમર તેના સાથીઓની ધરપકડથી ગભરાઈ ગયો હતો
સૂત્રો કહે છે કે આત્મઘાતી બોમ્બર ડો. ઉમર નબી ગભરાઈ ગયો હતો કારણ કે તેના બે સાથીઓ, ડૉ. મુઝમ્મિલ શકીલ અને ડૉ. આદિલ રઝાની પોલીસે ધરપકડ કરી હતી અને મોટી માત્રામાં વિસ્ફોટકો જપ્ત કરવામાં આવ્યા હતા. આ ગભરાટમાં, તેણે સમય પહેલા જ પોતાની કારમાં બોમ્બ વિસ્ફોટ કરી દીધો.
IED ખોટી રીતે એસેમ્બલ કરાયું હતું
પ્રારંભિક તારણો સૂચવે છે કે IED ખોટી રીતે એસેમ્બલ કરવામાં આવ્યું હતું, જેના કારણે વિસ્ફોટ તેની પૂરી ક્ષમતા સાથે થયો નહોતો. ઘટનાસ્થળે કોઈ બ્લાસ્ટ ખાડો મળ્યો નથી, કે કોઈ હથિયારના નિશાન પણ મળ્યા નથી, જેના કારણે એવું માનવામાં આવે છે કે વિસ્ફોટ આંશિક હતો. ગુપ્તચર સૂત્રો કહે છે કે તપાસ એજન્સીઓ નેટવર્કના વિદેશી જોડાણોની પણ તપાસ કરી રહી છે, કારણ કે મોડ્યુલનો હેન્ડલર વિદેશથી કાર્યરત હતો.
