દિલ્હી-એનસીઆરમાં રખડતા કૂતરાઓને શેલ્ટર હોમ્સમાં મોકલવાના સુપ્રીમ કોર્ટના આદેશ પર હોબાળો મચી ગયો છે. સુપ્રીમ કોર્ટના ત્રણ ન્યાયાધીશોની ખાસ બેન્ચે આજે તા. 14 ઓગસ્ટે આ મામલે દાખલ અરજીઓ પર સુનાવણી કરી.
દિલ્હી સરકાર વતી હાજર રહેલા સોલિસિટર જનરલ તુષાર મહેતાએ જણાવ્યું હતું કે કૂતરાઓના હુમલાથી બાળકો મૃત્યુ પામી રહ્યા છે. નસબંધીને કારણે કૂતરા કરડવાની ઘટનાઓ અટકી રહી નથી. દેશમાં આવા ઘણા ચોંકાવનારા કિસ્સાઓ છે. અમે ફક્ત એટલું જ કહેવા માંગીએ છીએ કે કોઈ પણ પ્રાણીઓને નફરત કરતું નથી પરંતુ સુરક્ષા જરૂરી છે.
કોર્ટ સમક્ષ દલીલ કરતા સોલિસિટર જનરલે કહ્યું કે કોઈ કૂતરાઓને મારવાનું કહી રહ્યું નથી. અમે ફક્ત તેમને માનવ વસ્તીથી દૂર રાખવાનું કહી રહ્યા છીએ. લોકો તેમના બાળકોને બહાર મોકલતા ડરે છે. નિયમો સમસ્યાનો ઉકેલ લાવશે નહીં. કોર્ટે હસ્તક્ષેપ કરવો પડશે.
તેમણે કહ્યું કે કોઈપણ દેશમાં બે પક્ષ હોય છે. બહુમતી એવી હોય છે જે ખુલ્લેઆમ બોલે છે પણ બીજી બાજુ ચૂપચાપ સહન કરે છે. પરંતુ અહીં એક મૌન લઘુમતી છે, જે ચિકન ખાય છે અને હવે પ્રાણી પ્રેમી બની ગઈ છે.
સિનીયર વકીલ કપિલ સિબ્બલે કહ્યું કે કોર્ટના નિર્દેશોમાં જણાવાયું છે કે નસબંધી પછી કૂતરાઓને છોડવામાં આવશે નહીં. તો પછી તેઓ ક્યાં જશે? આ નિયમોની વિરુદ્ધ છે. આ બંધ થવું જોઈએ. જ્યારે મોટી સંખ્યામાં કૂતરાઓને આશ્રયસ્થાનમાં એકસાથે રાખવામાં આવે છે, ત્યારે તેઓ એકબીજા પર હુમલો કરશે. આનાથી મનુષ્યો પર પણ અસર થશે.
રસ્તા પરથી કૂતરા ઉપાડવા પર પ્રતિબંધ મૂકવો જોઈએ
અરજદારો તરફથી હાજર રહેલા સિનિયર વકીલ સિબ્બલે કોર્ટને જણાવ્યું હતું કે રસ્તાઓ પરથી કૂતરા ઉપાડવાનો નિર્ણય હાલ પૂરતો બંધ કરવો જોઈએ અને અમને જવાબ આપવા માટે સમય આપવો જોઈએ. આ દરમિયાન કોર્ટને કહેવામાં આવ્યું હતું કે સુપ્રીમ કોર્ટનો આ નિર્ણય ગુરુવારે સાંજે અપલોડ કરવામાં આવ્યો હતો પરંતુ તે પહેલાં જ રસ્તાઓ પરથી કૂતરા ઉપાડવાનું શરૂ થઈ ગયું હતું.
આના પર કોર્ટે પૂછ્યું કે આ કેવી રીતે થઈ રહ્યું છે, જેના પર સિબ્બલે કહ્યું કે વહીવટીતંત્રે કૂતરા ઉપાડવાનું શરૂ કરી દીધું છે. સિબ્બલે કહ્યું કે કૂતરાઓને ક્યાં રાખવામાં આવશે? કૂતરાઓને નસબંધી કરીને કાયમ માટે આશ્રયસ્થાનમાં કેવી રીતે રાખી શકાય? આ અંગે કોર્ટે અરજદારોને સોગંદનામું દાખલ કરવા જણાવ્યું છે.
સુપ્રીમ કોર્ટે કહ્યું કે તે આજે કેસ બંધ કરશે નહીં. તે ફક્ત જોશે કે નિર્ણયના કયા ભાગો વાંધાજનક છે અને તેના પર સ્ટે આપવો જોઈએ કે નહીં. કોર્ટે કહ્યું કે ઉકેલ શોધવો મહત્વપૂર્ણ છે. ઉકેલ શોધવો જોઈએ અને વિવાદ વધારવો જોઈએ નહીં. આમ કહીને કોર્ટે હાલ પૂરતો પોતાનો નિર્ણય અનામત રાખ્યો છે.
