ભારતીય કેપ્ટન રોહિત શર્મા બીજી વખત પિતા બન્યો છે. મીડિયા રિપોર્ટ્સ અનુસાર રોહિતની પત્ની રિતિકાએ એક પુત્રને જન્મ આપ્યો છે. છેલ્લાં ઘણાં દિવસોથી સમાચાર આવી રહ્યા હતા કે રોહિતના ઘરે જલ્દી સારા સમાચાર આવવાના છે. રોહિત અને રિતિકાનું આ બીજું સંતાન છે. આ પહેલા તેને એક દીકરી સમાયરા પણ છે. સમાયરાનો જન્મ 30 ડિસેમ્બર 2018ના રોજ થયો હતો.
ભારતીય કેપ્ટન રોહિત શર્મા અને તેની પત્ની રિતિકાએ તેમના બીજા બાળકના જન્મની માહિતી શેર કરી છે. રોહિતે ઈન્સ્ટાગ્રામ પર પોસ્ટ કર્યું કે તેનો ત્રણ જણનો પરિવાર હવે ચારનો થઈ ગયો છે. તેણે તેના કેપ્શનમાં તારીખ 15 નવેમ્બર 2024 લખી છે, જે દર્શાવે છે કે તેના બીજા બાળકનો જન્મ આ તારીખે થયો હતો. શુક્રવારે રાત્રે સમાચાર આવ્યા કે રોહિત બીજી વખત પિતા બન્યો છે અને રિતિકાએ પુત્રને જન્મ આપ્યો છે.
અગાઉ આ વાતની પુષ્ટિ રોહિત કે રિતિકા દ્વારા કરવામાં આવી ન હતી, પરંતુ હવે રોહિતે પોતે તેના ઓફિશિયલ ઈન્સ્ટાગ્રામ એકાઉન્ટ પર આ વાતની પુષ્ટિ કરી છે. પોતાના બીજા બાળકના જન્મને કારણે રોહિત હજુ સુધી ભારતીય ટીમ સાથે ઓસ્ટ્રેલિયા પ્રવાસ પર ગયો નથી.
રોહિત પહેલી ટેસ્ટ રમવા ઓસ્ટ્રેલિયા જશે કે નહીં?
ભારત અને ઓસ્ટ્રેલિયા વચ્ચે પાંચ મેચની બોર્ડર-ગાવસ્કર ટ્રોફીની પ્રથમ ટેસ્ટ 22 નવેમ્બરથી પર્થમાં રમાશે. આ સિરિઝ શરૂ થવામાં એક સપ્તાહથી પણ ઓછો સમય બાકી છે પરંતુ રોહિત પ્રથમ ટેસ્ટ મેચ માટે ટીમ સાથે જોડાશે કે નહીં તે અંગે હજુ સુધી નિર્ણય લેવામાં આવ્યો નથી.
રોહિત બીજી વખત પિતા બન્યા બાદ તે જોવાનું રસપ્રદ રહેશે કે તે પહેલી મેચ રમવા ઓસ્ટ્રેલિયા જાય છે કે પછી પરિવાર સાથે થોડો સમય વિતાવવા માંગે છે. જો કે હજુ સુધી એ વાતની પુષ્ટિ થઈ નથી કે તે પહેલી ટેસ્ટમાં રમશે. ઓસ્ટ્રેલિયા જતા પહેલા મુખ્ય કોચ ગૌતમ ગંભીરે કહ્યું હતું કે રોહિત પ્રથમ મેચ માટે ઉપલબ્ધ રહેશે કે નહીં તે અંગે તેમની પાસે કોઈ ચોક્કસ માહિતી નથી.
રોહિત મુંબઈમાં પ્રેક્ટિસ કરતો જોવા મળ્યો હતો
જોકે ટીમથી દૂર હોવા છતાં રોહિત ઓસ્ટ્રેલિયા ગયો નથી, તે આ સિરીઝ માટે પોતાને તૈયાર કરી રહ્યો છે. થોડા દિવસો પહેલા રોહિતનો એક વીડિયો સોશિયલ મીડિયા પર વાયરલ થયો હતો જેમાં તે મુંબઈમાં નેટ પર સમય પસાર કરતો જોવા મળ્યો હતો.
