નવી દિલ્હી: આવતીકાલે તા. 4 જૂનના રોજ લોકસભા ચૂંટણીના પરિણામો જાહેર થવાના છે, તે પહેલાં આજે તા. 3 જૂનના રોજ મુખ્ય ચૂંટણી કમિશનર રાજીવ કુમારે એક પત્રકાર પરિષદને સંબોધી હતી.
રાજીવ કુમારે કહ્યું કે, દોઢ મહિના સુધી સાત તબક્કામાં યોજાયેલી લોકસભાની ચૂંટણીમાં અનેક રેકોર્ડ બન્યા છે. તેમણે કહ્યું કે ભારતમાં 642 મિલિયન મતદારો છે. આ સંખ્યા વિશ્વના 27 દેશોના વોટર્સની સરખામણીએ પાંચ ગણી વધારે છે. ચૂંટણી કમિશનરે ક્યું કે, આ વખતે ચૂંટણીમાં ભારતમાં 64 કરોડથી વધુ મતદારોએ મતદાન કર્યું છે, જે એક વર્લ્ડ રેકોર્ડ બન્યો છે.
મુખ્ય ચૂંટણી કમિશનર રાજીવ કુમારે કહ્યું કે અમે ભારતના મતદારોને સ્ટેન્ડિંગ ઓવેશન આપીએ છીએ. અમે વૃદ્ધોના ઘરે જઈને તેમના મત લીધા છે. 85 વર્ષથી વધુ વયના મતદારોએ ઘરેથી મતદાન કર્યું હતું. 1.5 કરોડ મતદારો અને સુરક્ષા કર્મચારીઓના પરિવહન માટે 135 વિશેષ ટ્રેનો, 4 લાખ વાહનો અને 1692 ફ્લેટનો ઉપયોગ કરવામાં આવ્યો હતો. 68763 મોનિટરિંગ ટીમો ચૂંટણી પર દેખરેખમાં રોકાયેલી હતી.
મતદાન કર્મચારીઓને પડતી મુશ્કેલીઓનો ઉલ્લેખ કરતા મુખ્ય ચૂંટણી કમિશનરે પત્રકાર પરિષદ દરમિયાન એક વીડિયો બતાવ્યો. પછી તેમણે કહ્યું કે, મતદાન કર્મચારીઓ જ્યારે મતદાન કરવા જાય છે ત્યારે તેમને ઘણી મુશ્કેલીઓનો સામનો કરવો પડે છે. જ્યારે તેઓની પ્રામાણિકતા પર સવાલ ઉઠાવવામાં આવે છે, ત્યારે કલ્પના કરો કે તેમના તેમના મનમાં શું અસર થાય છે.
તેમણે કહ્યું કે જમ્મુ-કાશ્મીરમાં 4 દાયકામાં સૌથી વધુ મતદાન નોંધાયું છે. ખીણમાં 58.58% અને જમ્મુમાં 51.05% મતદાન થયું હતું. અમે આ પાયા પર વધુ વિધાનસભા ચૂંટણીઓ યોજવાનું નક્કી કર્યું છે. તેમણે કહ્યું કે મણિપુરમાં પણ એક સક્સેસ સ્ટોરી લખાઈ છે.
આ વખતે ચૂંટણીમાં દારૂ-રૂપિયા નહીં વહેંચાયા, ચૂંટણી કમિશનરનો દાવો
મુખ્ય ચૂંટણી કમિશનરે કહ્યું, તમને યાદ હશે કે અગાઉ ચૂંટણીને પ્રભાવિત કરવા માટે પૈસા અને સામાનની વહેંચણી કરવામાં આવી હતી. આ વખતે ન તો સાડીનું વિતરણ થયું, ન તો કૂકરનું વિતરણ થયું, ન તો દારૂ કે પૈસાનું વિતરણ થયું. અલગ-અલગ ઘટનાઓને બાદ કરતાં સમગ્ર દેશમાં ચૂંટણી પ્રક્રિયા શાંતિપૂર્ણ રહી હતી.
10 હજાર કરોડ રૂપિયા જપ્ત કરાયા
એવું કોઈ બાકી નથી કે જેના હેલિકોપ્ટરની તપાસ ન થઈ હોય. અમારા તરફથી ચૂંટણી અધિકારીઓને સંદેશ હતો કે તેમણે તેમનું કામ કરવાનું છે અને કોઈનાથી ડરવાનું નથી. પરિણામે, 10 હજાર કરોડ રૂપિયાની રકમ જપ્ત કરવામાં આવી હતી, જે 2019 માં જપ્ત કરવામાં આવેલી કિંમત કરતાં લગભગ 3 ગણી વધારે છે. આ તૈયારી પાછળ બે વર્ષની મહેનત હતી. તમને આ બધું કહેવાનો હેતુ એ હતો કે અમારી મહેનત વ્યર્થ ન જાય.
મતદારોએ ઉદાસીનતાને બદલે લોકશાહીમાં ભાગીદારી પસંદ કરી
મુખ્ય ચૂંટણી કમિશનરે કહ્યું કે આ IPL દરમિયાન લોકોમાં મતદાનને લઈને જાગૃતિ ફેલાવવામાં આવી હતી. સચિન તેંડુલકર અને અન્ય મોટી હસ્તીઓએ અમને ચૂંટણી જાગૃતિમાં મદદ કરી. અમે 26 વિશેષ મતદાન મથકો બનાવ્યા અને લોકોને મતદાન કરવાનું શીખવ્યું. આ વખતે માત્ર 39 સ્થળોએ જ પુનઃ મતદાન જરૂરી હતું, જ્યારે 2019માં 540 બૂથ પર પુનઃ મતદાન થયું હતું.
64 કરોડથી વધુ મતદારોએ ઉદાસીનતાને બદલે લોકશાહીમાં ભાગ લેવાનું પસંદ કર્યું. શંકા પર વિશ્વાસ પસંદ કર્યો અને કેટલાક કિસ્સાઓમાં બુલેટને બદલે મતપત્ર પસંદ કર્યો. લોકશાહીની આ ઉજવણીમાં ભાગ લેનાર દરેક મતદાતાનો અમે આભાર વ્યક્ત કરીએ છીએ.
પહેલીવાર મતગણતરી પહેલાં ચૂંટણી પંચે પત્રકાર પરિષદ યોજી
આ પહેલીવાર છે જ્યારે કેન્દ્રીય ચૂંટણી પંચે સામાન્ય ચૂંટણીમાં મતગણતરી પહેલા પત્રકાર પરિષદ યોજી હતી. 1952 પછીની કોઈપણ લોકસભા ચૂંટણી દરમિયાન, પંચે મતદાન પછી અથવા પરિણામો પહેલાં પત્રકાર પરિષદ યોજી ન હતી. અગાઉ ચૂંટણી પંચે 16 માર્ચે એક પ્રેસ કોન્ફરન્સ કરી હતી. જે દિવસે લોકસભા ચૂંટણી 2024 અને 4 રાજ્યોમાં વિધાનસભા ચૂંટણીની તારીખો જાહેર કરવામાં આવી હતી.
તમને જણાવી દઈએ કે આ વખતે દેશમાં સામાન્ય ચૂંટણી સાત તબક્કામાં યોજાઈ હતી. દેશના વિવિધ રાજ્યોમાં અનુક્રમે 19, 26 એપ્રિલ, 7, 15, 20 અને 25 મે અને 1 જૂનના રોજ મતદાન થયું હતું. 4 જૂને પરિણામ જાહેર થશે.
