નવી દિલ્હી: ચૂંટણી વચ્ચે પોતાના જામીનની રાહ જોઈ રહેલા દિલ્હીના મુખ્યમંત્રી અરવિંદ કેજરીવાલ માટે સારા સમાચાર આવ્યા છે. સુપ્રિમ કોર્ટે આજે તા. 10 મી મેના રોજ કેજરીવાલના વચગાળાના જામીન પર પોતાનો આદેશ આપ્યો છે. કોર્ટે કેજરીવાલને તા. 1 જૂન સુધીના વચગાળાના જામીન આપ્યા છે.
અરવિંદ કેજરીવાલને સુપ્રિમ કોર્ટમાંથી 1 જૂન સુધી વચગાળાના જામીન મળ્યા છે. કોર્ટે માત્ર પાંચ જ મિનિટ માં ચૂકાદો સંભળાવી દીધો હતો. આ સાથે જ અરવિંદ કેજરીવાલનો જેલમાંથી બહાર નીકળવાનો રસ્તો સાફ થયો છે. દિલ્હી લિકર પોલિસી કેસમાં કેજરીવાલ 40 દિવસથી તિહાર જેલમાં બંધ હતા.
કેજરીવાલ જામીન પર છૂટ્યા બાદ ચૂંટણી પ્રચાર કરી શકશે પરંતુ તેઓ મુખ્યમંત્રી તરીકે નિયમિત મુખ્યમંત્રી કચેરી પર જઈ શકશે નહીં. કોર્ટે વચગાળાના જામીન આપતા પહેલાં કડક શરતો નક્કી કરી છે.
આ શરતો પર કેજરીવાલને મળ્યાં જામીન
- કેજરીવાલ મુખ્યમંત્રી કાર્યાલય અને દિલ્હી સચિવાલયમાં જઈ શકશે નહીં.
- કેજરીવાલ તેમના દ્વારા આપવામાં આવેલા નિવેદનથી બંધાયેલા રહેશે કે જ્યાં સુધી દિલ્હીના લેફ્ટનન્ટ ગવર્નરની મંજૂરી/મંજૂરી મેળવવાની આવશ્યકતા ન હોય ત્યાં સુધી તેઓ સત્તાવાર ફાઇલો પર સહી નહીં કરે.
- કેજરીવાલ હાલના કેસમાં તેમની ભૂમિકા અંગે કોઈ ટિપ્પણી કરશે નહીં.
- કેજરીવાલ કોઈપણ સાક્ષીઓ સાથે વાત કરશે નહીં અને કેસ સંબંધિત કોઈપણ સત્તાવાર ફાઈલો સુધી પહોંચશે નહીં.
2 જૂને કેજરીવાલે આત્મસમર્પણ કરવું પડશે
વચગાળાના જામીનની અવધિ પૂરી થયા બાદ કેજરીવાલે તા. 2 જૂને આત્મસમર્પણ કરવું પડશે. પ્રચારના સવાલ પર અરવિંદ કેજરીવાલ જેલમાંથી બહાર આવશે. ઈડીએ માત્ર વચગાળાના જામીનનો વિરોધ કર્યો ન હતો પરંતુ પૂરક ચાર્જશીટ પણ દાખલ કરી હતી અને કેજરીવાલ અને તેમની આમ આદમી પાર્ટીને ઘેરવાની સંપૂર્ણ યોજના તૈયાર કરી હતી. ઇડી કેજરીવાલને દારૂ કૌભાંડનો મુખ્ય પાત્ર ગણાવી રહી હતી.
ઈડીએ જામીન રોકવાના ઘણા પ્રયાસ કર્યાં
આ અગાઉ તા. 7મી મેના રોજ સુનાવણીમાં કોર્ટે કેજરીવાલની જામીનની શરતો નક્કી કરી હતી. કોર્ટે ઈડીને કહ્યું હતું કે, ચૂંટણી 5 વર્ષમાં એકવાર આવે છે. જો ચૂંટણી નહીં હોત તો વચગાળાના જામીનનો પ્રશ્ન નહોતો. કેજરીવાલ મુખ્યમંત્રી છે તેથી વચગાળાના જામીન આપી રહ્યાં છે.
આ અગાઉ આજે સુનાવણી દરમિયાન એન્ફોર્સમેન્ટ ડિરેક્ટોરેટ (ED)એ કેજરીવાલના વચગાળાના જામીનનો વિરોધ કરવા સાથે પૂરક ચાર્જશીટ પણ દાખલ કરી હતી અને કેજરીવાલ અને તેમની આમ આદમી પાર્ટી પર ચારે તરફથી દબાણ ઉભું કરવાની તૈયારી કરી હતી.
ગઈ તા. 21 માર્ચે કેજરીવાલની ધરપકડ થઈ હતી
લિકર પોલિસી કેસમાં ઈડીએ કેજરીવાલની ગઈ તા. 21 માર્ચે ધરપકડ કરી હતી. ઈડીએ 22 માર્ચે કેજરીવાલને રાઉઝ એવન્યુ કોર્ટમાં રજૂ કર્યા હતા. કોર્ટે દિલ્હીના મુખ્યમંત્રીને 28 માર્ચ સુધી રિમાન્ડ પર મોકલ્યા હતા, ત્યાર બાદ તે 1 એપ્રિલ સુધી લંબાવાયા હતા. 1 એપ્રિલે કોર્ટે તેમને 15 એપ્રિલ સુધી જ્યુડિશિયલ કસ્ટડીમાં તિહાર જેલમાં મોકલ્યા હતા. ત્યારથી તે જેલમાં જ હતા. 40 દિવસ બાદ આજે તેઓ જેલની બહાર નીકળશે.
