નવી દિલ્હી: નેશનલ ઈન્વેસ્ટિગેશન એજન્સી (NIA) એ ઉત્તર ભારતમાં (India) લગભગ 50 સ્થળો પર દરોડા (Raid) પાડ્યા છે. આ દરોડા દિલ્હી (Delhi) , રાજસ્થાન, હરિયાણા, પંજાબ, યુપી, ઉત્તરાખંડ અને હિમાચલ પ્રદેશમાં ગેંગસ્ટરો પર પાડવામાં આવ્યા છે. ભારતમાં અને વિદેશમાં સ્થિત આતંકવાદીઓ, ગેંગસ્ટરો અને ડ્રગ સ્મગલરો વચ્ચેની સાંઠગાંઠ તોડવા માટે દરોડા પાડવામાં આવ્યા હતા.
ગેંગસ્ટરના ઘરે, ઠેકાણાઓ પર તેમજ નજીકના લોકોની તપાસ ચાલી રહી છે. આ લોકોની મિલકત પણ જપ્ત કરી શકાય છે. પ્રાપ્ત માહિતી અનુસાર હરિયાણાના 10 જિલ્લા અને પંજાબના 3 થી 4 જિલ્લામાં NIAના દરોડા ચાલુ છે. કહેવામાં આવી રહ્યું છે કે આ દરોડા દરમિયાન ગેંગસ્ટર લોરેન્સ બિશ્નોઈ અને બંબીહા જૂથના સભ્યો નિશાના પર છે.
આ સ્થળો પર પણ દરોડા?
NIAએ ઝજ્જરમાં ગેંગસ્ટર નરેશ સેઠીના ઠેકાણા પર દરોડા પાડ્યા છે. સવારે 4 વાગ્યે NIAની ટીમ સ્થાનિક પોલીસની સાથે નરેશ સેઠીના ઘરે પહોંચી. સેઠીની ગેરકાયદેસર સંપત્તિ અને બેંકની વિગતો શોધી રહી છે. પરિવારજનોની પણ પૂછપરછ કરવામાં આવી રહી છે. ગેંગસ્ટર સેઠી હત્યા, ખંડણી સહિત અન્ય અનેક ગંભીર કેસોમાં સંડોવાયેલો છે. હાલ તે તિહાર જેલમાં બંધ છે. NIAએ ભટિંડાના ગામ જંડિયામાં દરોડા પાડ્યા છે. અહીં જગ્ગા જંડિયાના ઘરે રેડ પાડવામાં આવી હતી.
12 સપ્ટેમ્બરે 50 સ્થળો પર દરોડા પાડવામાં આવ્યા હતા
આ અગાઉ 12 સપ્ટેમ્બરે NIAએ પંજાબ, હરિયાણા, રાજસ્થાન, દિલ્હી-NCRમાં 50થી વધુ સ્થળો પર દરોડા પાડ્યા હતા. આ વર્ષે 26 ઓગસ્ટે દિલ્હી પોલીસે બે કેસ નોંધ્યા હતા. આ કેસોમાં NIAએ તપાસ સંભાળ્યા બાદ આ દરોડા પાડ્યા હતા. ભારતમાં અને વિદેશમાં રહેતા કેટલાક ગેંગસ્ટરો દેશમાં આતંકવાદી અને ગુનાહિત પ્રવૃત્તિઓ કરી રહ્યા છે. આવા ગુંડાઓની ઓળખ કર્યા બાદ કેસ નોંધવામાં આવ્યો હતો. NIAની તપાસમાં એ પણ બહાર આવ્યું છે કે દેશમાં અનેક ગુનાહિત ઘટનાઓ બની હતી, જે આતંકવાદીઓ, ગેંગસ્ટરો અને ડ્રગની દાણચોરી કરતી ગેંગ અને નેટવર્ક વચ્ચેનું ઊંડું કાવતરું હતું, જે દેશની અંદર અને બહારથી કાર્યરત હતા.
સપ્ટેમ્બરમાં NIAએ PFI વિરુદ્ધ કાર્યવાહી કરી હતી
સપ્ટેમ્બરની શરૂઆતમાં, NIAની આગેવાની હેઠળની અનેક એજન્સીઓએ 15 રાજ્યોમાં 93 સ્થળોએ એક સાથે દરોડા પાડ્યા હતા અને પોપ્યુલર ફ્રન્ટ ઓફ ઈન્ડિયા (PFI)ના 106 નેતાઓ અને કાર્યકરોની ધરપકડ કરી હતી, જેઓ દેશમાં આતંકવાદને ભંડોળ પૂરું પાડવામાં કથિત રીતે સામેલ હતા. અધિકારીઓએ કહ્યું હતું કે કેરળમાં સૌથી વધુ 22 PFI કાર્યકરોની ધરપકડ કરવામાં આવી છે. તેણે જણાવ્યું હતું કે ધરપકડ કરાયેલા લોકોમાં તેના પ્રમુખ ઓએમએ સલામ પણ સામેલ છે. અધિકારીઓએ તેને પીએફઆઈ સામેનું અત્યાર સુધીનું સૌથી મોટું ઓપરેશન ગણાવ્યું હતું.
સૌથી વધુ ધરપકડ કેરળમાંથી કરવામાં આવી છે
અધિકારીઓએ જણાવ્યું કે ધરપકડ NIA, એન્ફોર્સમેન્ટ ડિરેક્ટોરેટ (ED) અને સંબંધિત રાજ્યોના પોલીસ દળો દ્વારા કરવામાં આવી હતી. તેમણે જણાવ્યું હતું કે 15 રાજ્યોમાં જ્યાં 93 સ્થળોએ આ દરોડા પાડવામાં આવ્યા છે તેમાં કેરળ, તમિલનાડુ, કર્ણાટક, આંધ્ર પ્રદેશ, તેલંગાણા, ઉત્તર પ્રદેશ, રાજસ્થાન, દિલ્હી, આસામ, મધ્યપ્રદેશ, મહારાષ્ટ્ર, ગોવા, પશ્ચિમ બંગાળ, બિહાર અને મણિપુરનો સમાવેશ થાય છે. અધિકારીઓએ જણાવ્યું કે કેરળમાં સૌથી વધુ 22 લોકોની ધરપકડ કરવામાં આવી છે. આ ઉપરાંત મહારાષ્ટ્ર (20), કર્ણાટક (20), તમિલનાડુ (10), આસામ (9), ઉત્તર પ્રદેશ (8), આંધ્રપ્રદેશ (5), મધ્યપ્રદેશ (4), પુડુચેરી (3), દિલ્હી ( 3) અને રાજસ્થાનમાંથી 2 લોકોની ધરપકડ કરવામાં આવી હતી. તેમણે જણાવ્યું હતું કે દરોડા સવારે 3:30 વાગ્યે શરૂ થયા હતા અને દેશભરની વિવિધ કચેરીઓના કુલ 300 NIA અધિકારીઓ સામેલ હતા.
