અખિલ ભારતીય ઈમામ સંઘના (All India Imam Organization) મુખ્ય ઈમામ ડૉ.ઈલ્યાસીનું કહેવું છે કે રાષ્ટ્રીય સ્વયંસેવક સંઘના વડા મોહન ભાગવત (RSS Head Mohan Bhagvat) રાષ્ટ્રપિતા (Rastra Pita) છે. તેમણે કહ્યું કે તેઓ રાષ્ટ્રઋષિ પણ છે. આ પહેલા સંઘ પ્રમુખ ભાગવતે દિલ્હીના કસ્તુરબા ગાંધી માર્ગ પર સ્થિત મસ્જિદમાં ડૉ. ઇલ્યાસી સાથે મુલાકાત કરી હતી. ડૉ. ઇલ્યાસીએ કહ્યું કે તેમની મસ્જિદની મુલાકાતથી સારો સંદેશ જશે. આપણી પૂજા કરવાની રીત અલગ છે પણ સૌથી મોટો ધર્મ માનવતા છે. અમે દેશને પ્રથમ (Nation First) સ્થાન આપીએ છીએ. ભાગવત કસ્તુરબા ગાંધી માર્ગ પર સ્થિત મસ્જિદમાં (Masjid) ગયા અને પછી ઉત્તર દિલ્હી સ્થિત તાજવીદુલ કુરાન મદરેસાની મુલાકાત લીધી હતી. તેમની સાથે આવેલા સંઘના એક અધિકારીએ જણાવ્યું કે ભાગવત પહેલીવાર મદરેસામાં ગયા છે.
અખિલ ભારતીય ઈમામ સંગઠનના વડા ઉમર અહેમદ ઈલ્યાસીએ રાષ્ટ્રીય સ્વયંસેવક સંઘ (આરએસએસ)ના વડા મોહન ભાગવત સાથે મુલાકાત કર્યા બાદ કહ્યું હતું કે આપણો ડીએનએ એક જ છે, માત્ર ભગવાનની પૂજા કરવાની આપણી રીત અલગ છે. ઇલ્યાસીએ ભાગવતને ‘રાષ્ટ્રપિતા’ પણ કહ્યા અને કહ્યું કે આપણે ભારત અને ભારતીયતાને મજબૂત બનાવવાની છે. ઇલ્યાસીએ કહ્યું કે આરએસએસના વડાએ તેમના આમંત્રણ પર ઉત્તર દિલ્હીમાં મદરેસા તાજવીદુલ કુરાનની મુલાકાત લીધી હતી અને ત્યાંના બાળકો સાથે વાતચીત કરી હતી. તેમણે કહ્યું કે આપણે બધા જ માનીએ છીએ કે રાષ્ટ્ર પ્રથમ આવે છે.
ભાગવત મારી વિનંતી પર મદરેસામાં ગયા- ઇલ્યાસી
ભાગવત ગુરુવારે દિલ્હીની એક મસ્જિદમાં ઈમામ ઉમર અહેમદ ઈલ્યાસીને મળ્યા હતા. આ બેઠક કસ્તુરબા ગાંધી માર્ગ મસ્જિદ ખાતે બંધ રૂમમાં એક કલાકથી વધુ સમય સુધી ચાલી હતી. ઓલ ઈન્ડિયા ઈમામ ઓર્ગેનાઈઝેશનની ઓફિસ અહીં આવેલી છે. ભાગવતની સાથે આરએસએસના વરિષ્ઠ કાર્યકર્તા કૃષ્ણ ગોપાલ, રામ લાલ અને ઈન્દ્રેશ કુમાર પણ હતા. રામ લાલ અગાઉ ભાજપના સંગઠન સચિવ હતા જ્યારે કુમાર મુસ્લિમ રાષ્ટ્રીય મંચના સંરક્ષક છે. મીટિંગની વિગતો શેર કરતા અહેમદ ઇલ્યાસીના ભાઈ સુહૈબ ઇલ્યાસીએ કહ્યું કે તે ખૂબ જ સારી વાત છે કે ભાગવત અમારા પિતાની પુણ્યતિથિ પર અમારા આમંત્રણ પર આવ્યા હતા. તેનાથી દેશને એક સારો સંદેશ પણ ગયો છે.
ભાગવત મુસ્લિમ બૌદ્ધિકોને મળ્યા
સાંપ્રદાયિક સૌહાર્દને મજબૂત કરવા માટે આરએસએસ પ્રમુખે મુસ્લિમ બૌદ્ધિકો સાથે ચર્ચા કરી હતી. તેઓ તાજેતરમાં દિલ્હીના ભૂતપૂર્વ લેફ્ટનન્ટ ગવર્નર નજીબ જંગ, ભૂતપૂર્વ મુખ્ય ચૂંટણી કમિશનર એસવાય કુરેશી, અલીગઢ મુસ્લિમ યુનિવર્સિટીના ભૂતપૂર્વ વાઇસ ચાન્સેલર લેફ્ટનન્ટ જનરલ ઝમીરુદ્દીન શાહ, ભૂતપૂર્વ સાંસદ શાહિદ સિદ્દીકી અને ઉદ્યોગપતિ સઈદ શેરવાનીને મળ્યા હતા. આ બેઠકમાં ભાગવતે હિંદુઓ માટે ‘કાફિર’ શબ્દનો ઉપયોગ કરવાનો મુદ્દો ઉઠાવ્યો હતો અને કહ્યું હતું કે આનાથી સારો સંદેશ નથી મળતો.
તમામ હિંદુઓ અને મુસ્લિમોના ડીએનએ સમાન છે – ભાગવત
મુસ્લિમ બૌદ્ધિકોએ કેટલાક દક્ષિણપંથી સંગઠનો દ્વારા મુસ્લિમોને “જેહાદી” અને “પાકિસ્તાની” તરીકે લેબલ કરવા સામે વાંધો ઉઠાવ્યો હતો. મુસ્લિમ બૌદ્ધિકોએ ભાગવતને એમ પણ કહ્યું હતું કે ‘કાફિર’ શબ્દના ઉપયોગ પાછળ કોઈ અન્ય હેતુ હતો પરંતુ કેટલાક વિભાગોમાં હવે તેનો ઉપયોગ “અશિષ્ટ શબ્દ” તરીકે થઈ રહ્યો છે. બૌદ્ધિકોની ચિંતાઓને સમજતા આરએસએસના વડાએ કહ્યું કે “તમામ હિંદુ અને મુસ્લિમોના ડીએનએ સમાન છે.” આ સતત ચાલી રહેલી સંવાદ પ્રક્રિયાનો એક ભાગ છે.
