શ્રીલંકા: શ્રીલંકાના (Sri Lanka) આર્થિક-રાજકીય સંકટ વચ્ચે રાષ્ટ્રપતિ (President) ગોટબાયા રાજપક્ષે (Gotbaya Rajapaksa) અડધી રાત્રે દેશ (Country) છોડીને ભાગી ગયા છે. શ્રીલંકામાં ચાલી રહેલા વિરોધ પ્રદર્શન વચ્ચે રાજપક્ષે પરિવાર સાથે માલદીવ પહોંચી ગયા છે. ત્યાં તેઓ થોડા દિવસ રોકાશે. ત્યાર બાદ તેઓ દુબઈ જઈ શકે છે. રાજપક્ષેએ રાજીનામું આપ્યું છે કે નહીં તે અંગે હજુ પણ મૂંઝવણ છે. ત્યારે રાષ્ટ્રપતિના દેશ છોડ્યાના સમાચારથી પ્રદર્શનકારીઓ વધુ ભડકી ગયા હતા. હજારો વિરોધીઓ સંસદ અને વડાપ્રધાન કાર્યાલય પહોંચ્યા છે. સેના અને વિરોધીઓ આમને-સામને છે. દરમિયાન, શ્રીલંકામાં કટોકટી લાગુ કરવામાં આવી છે. પ્રદર્શનકારીઓ વડાપ્રધાનના ઘરની દિવાલ પર ચઢી ગયા છે. તેમને રોકવા માટે સુરક્ષાકર્મીઓ ટીયર ગેસના શેલ છોડી રહ્યા છે.
રાષ્ટ્રપતિ ગયા શુક્રવારથી ગુમ હતા, તેઓ કોઈપણ જાહેર મંચ પર જોવા મળ્યા ન હતા. દરમિયાન, 20 જુલાઈએ નવા રાષ્ટ્રપતિની નિમણૂકની તૈયારીઓ ચાલી રહી છે. તાજેતરની માહિતી અનુસાર, ગોટબાયા સુરક્ષિત સ્થળે પહોંચ્યા બાદ જ રાજીનામું આપશે. તેઓ માલદીવથી દક્ષિણ એશિયાના કોઈ દેશમાં જશે. જેના વિશે અત્યાર સુધી કંઈ સ્પષ્ટ નથી.
એરફોર્સે કહ્યું- સંરક્ષણ મંત્રાલયે પ્લેન પહોંચાડવાનો આદેશ આપ્યો હતો
રાજપક્ષેને વાયુસેનાના વિમાન દ્વારા માલદીવ જવા રવાના કરવામાં આવ્યા છે. આના પર પણ સવાલો ઉભા થઈ રહ્યા છે, જેના પર શ્રીલંકા એરફોર્સ (SLAF)એ સ્પષ્ટતા આપી છે. SLAFએ કહ્યું કે તેમને વિમાન આપવા માટે સંરક્ષણ મંત્રાલય તરફથી આદેશ મળ્યો હતો, જેનું પાલન કરવું પડ્યું. આ દરમિયાન ઇમિગ્રેશન વિભાગે તેની સ્પષ્ટતામાં કહ્યું કે વર્તમાન રાષ્ટ્રપતિને દેશ છોડતા અટકાવવા માટે એવો કોઈ કાયદો નથી. એવા પણ અહેવાલ હતા કે ભારતે રાજપક્ષેને દેશ છોડવામાં મદદ કરી હતી. ભારતીય હાઈ કમિશને આવી વાતોને અફવા ગણાવી છે, જેમાં કોઈ સત્ય નથી. તમને જણાવી દઈએ કે રાજપક્ષે સાથે તેમની પત્ની સહિત કુલ પરિવારના 5 સભ્યો હતા. આ સિવાય સ્ટાફના ત્રણ લોકો પણ તેમની સાથે છે.
છેલ્લી માહિતી અનુસાર રાજપક્ષે માલદીવની રાજધાની માલે પહોંચી ગયા છે. ત્યાં તેઓ એશિયાના અન્ય કોઈપણ દેશમાં જઈ શકે છે. એવું કહેવામાં આવી રહ્યું છે. એવા પણ અહેવાલ છે કે તેઓ દુબઈ જઈ શકે છે. અગાઉ એવું કહેવામાં આવ્યું હતું કે રાજપક્ષેએ મંગળવારે જ રાજીનામું આપી દીધું છે, જેની જાહેરાત આજે કરવામાં આવશે. પરંતુ હવે એ વાત પણ સામે આવી છે કે સ્પીકરને હજુ સુધી રાજપક્ષેનું રાજીનામું મળ્યું નથી.
ઉલ્લેખનીય છે કે શ્રીલંકાની કથળતી આર્થિક સ્થિતિને કારણે રાજપક્ષેએ રાજીનામું આપવું પડશે, જેને સંભાળવામાં તેમની સરકાર ખરાબ રીતે નિષ્ફળ રહી છે. શ્રીલંકાના લોકો વધતી મોંઘવારી અને વસ્તુઓની અછતથી ત્રસ્ત હતા. મામલો એટલો બગડી ગયો હતો કે હજારો વિરોધીઓ રાષ્ટ્રપતિ ભવનમાં ઘૂસી ગયા હતા. સાથે જ પીએમના નિવાસસ્થાને પણ આગ લગાવી દેવામાં આવી હતી. હવે શ્રીલંકામાં નવી સરકારની રચના થવાની કરવામાં આવશે.
શ્રીલંકામાં હવે શું થશે?
શ્રીલંકાના કાયદા અનુસાર, જો કોઈ રાષ્ટ્રપતિ તેના કાર્યકાળના અંત પહેલા ખુરશી છોડી દે છે, તો સંસદના સભ્યને તે પદ પર બેસાડવામાં આવે છે. રાષ્ટ્રપતિના રાજીનામાના એક મહિનામાં આ કામ કરવાનું હોય છે. રાષ્ટ્રપતિ સંમતિ આપે તે પછી ત્રણ દિવસમાં સંસદનું સત્ર બોલાવવાનું હોય છે. પછી એક દિવસ નક્કી થાય છે કે જ્યારે રાષ્ટ્રપતિ પદ માટે નોમિનેશન થશે. જો એક કરતા વધુ વ્યક્તિ રાષ્ટ્રપતિ બનવા માંગે છે, તો ગુપ્ત મતદાન દ્વારા મતદાન કરવામાં આવે છે. નવા પ્રમુખ ચૂંટાય ત્યાં સુધી કાર્યકારી પ્રમુખ કારોબારનું ધ્યાન રાખે છે. કાર્યકારી રાષ્ટ્રપતિને હંમેશા વડાપ્રધાન બનાવવામાં આવે છે. હવે રાજપક્ષેની વિદાય બાદ રાનિલ વિક્રમસિંઘે કાર્યવાહક પ્રમુખ બનશે.
