લગ્નેત્તર સંબંધો ઘરસંસારમાં તિરાડ પાડે છે. આવો જ એક કિસ્સો તાતીથૈયામાં પ્રકાશમાં આવ્યો હતો. પતિને બીજી પત્ની સાથે લફરું હોવાની જાણ થતાં રણચંડી બનેલી પત્નીએ લફરાવાળી યુવતીને પકડી પાડી વાળ કાપ્યાનો વિડીયો સોશિયલ મીડિયામાં વાયરલ થતાં ચકચાર મચી ગઈ છે. આ બનાવમાં પોલીસે બે મહિલાની અટક કરી તપાસ હાથ ધરી છે.
પ્રાપ્ત માહિતી અનુસાર પલસાણાના તાતીથૈયા ગામે આવેલા સોની પાર્ક વિસ્તારમાં રહેતા અને મૂળ મધ્યપ્રદેશના ધાન જિલ્લાના એક ગામમાં રહેતા પરિણીત અને ત્રણ સંતાનના પિતાએ ગામની જ એક યુવતી સાથે લફરું કર્યું હતું અને પતિના આ લફરાની જાણ તેની પત્નીને અગાઉથી જ હતી. જેથી યુવતીને પતિએ સોનીપાર્કમાં લાવી અન્ય રૂમમાં રાખી હોવાની જાણ થતાં પત્ની રણચંડી બની હતી અને તેણે તાંતીથૈયા ગામના સોની પાર્ક વિસ્તારમાં પતિ સાથે લફરું કરનાર યુવતીને પકડી જાહેરમાં ઘસડી તેના માથાના વાળ કાપી નાંખ્યા હતા અને જાહેરમાં ઝપાઝપી પણ કરી હતી.
આ બનાવ અંગેનો વિડીયો કોઈ ઇસમે ઉતારી સોશિયલ મીડિયામાં ફરતો કરતાં ભારે રમૂજ સાથે ચર્ચાનો વિષય બન્યો હતો. જાહેરમાં યુવતીના વાળ કાપતાં જ લોકોની ભારે ભીડ જામી હતી. આ લખાય છે ત્યારે આ વાતની જાણ કડોદરા પોલીસને થતાં તે સોની પાર્કમાં જઈ વાળ કાપનાર મહિલા અને મદદ કરનાર અન્ય મહિલાને કડોદરા પોલીસ મથકે લાવી તપાસ હાથ ધરી હોવાનું જાણવા મળે છે.
અગાઉ સમાધાન થયું હતું
મધ્યપ્રદેશના ધાન જિલ્લાના એક ગામમાં પરિણીત રહેતો હતો. તે જ ગામમાં આ કુંવારી યુવતી પણ રહેતી હતી અને અગાઉ તેના ગામમાં પણ આ બંને પકડાઈ ગયાં હતાં અને આ મામલો ધાન પોલીસમથક સુધી પહોંચ્યો હતો. જ્યાં સમાધાન થયું હોવાનું પણ જાણવા મળે છે.
પતિએ સોની પાર્ક બિલ્ડિંગ નજીક જ રહેવાની સગવડ કરી હતી
આ યુવતી સાથે લફરું ચાલતું હતું એટલે તે પરિણીત યુવક એક દિવસ અગાઉ જ તાંતીથૈયા લાવ્યો હતો અને પોતે જે સોની પાર્ક બિલ્ડિંગમાં રહેતો હતો ત્યાં નજીકમાં આવેલી બિલ્ડિંગમાં રાખી હતી. પરંતુ પરિણીત યુવકની પત્નીને આ વાતની ગંધ આવી જતાં તે ત્યાં પહોંચી હતી અને રૂમની બહાર યુવતીને ખેંચી લાવી ઝપાઝપી કરી હતી અને ત્યાં નજીકમાં જ પડેલી કાતર લઈ પોતાની સોતનસમાન યુવતીના વાળ કાપી નાંખ્યા હતા.
