મોડી રાતથી વહેલી સવાર સુધીમાં લાઇટો ગુલ
સ્થાનિકો આખી રાત ગરમીમાં શેકાતા રોષે ભરાયા
( પ્રતિનિધિ )વડોદરા,તા.2
વડોદરાના હરણી વિસ્તારમાં આવેલી મોટા ભાગની સોસાયટી – ફ્લેટમાં ગત મોડીરાત્રે 12 વાગ્યાની આસપાસ લાઇટો ગુલ થઇ ગઇ હતી. સામાન્ય રીતે વરસાદ કે વાવાઝોડા સમયે વિજળી ગુલ થતી હોય છે. પરંતુ ગઇ કાલે વરસાદ પડ્યો નથી કે વાવાઝોડું આવ્યું નથી. છતાં વિજળી ગુલ થતા વહેલી સવાર સુધી વીજ પુરવઠો પુનઃ કાર્યરત નહીં થતા લોકો ગરમીમાં હેરાન પરેશાન થઈ ઉઠ્યા હતા. આ દરમિયાન વિજ કચેરીએ પહોંચેલા સ્થાનિકોના હાથે અધિકારી લાગતા તેનો બરાબરનો ઉધડો લઇ નાંખ્યો હતો. સ્થાનિકોની ઉગ્ર દલીલો સામે અધિકારીએ તમારી આ સમસ્યાનો કાયમી ઉકેલ આવી જશે. નવી લાઇન નાંખવામાં આવશે તેમ જણાવ્યું હતું.
વડોદરામાં સામાન્ય રીતે વરસાદ કે વાવાઝોડા સમયે વિજળી ગુલ થવાની ઘટનાઓ બનતી હોય છે. જો કે, તે બાદ થોડાક કલાકોમાં વિજળી પરત આવી જતી હોય છે. પરંતુ ગતરોજ વરસાદ કે વાવાઝોડા જેવું કંઇ ના હોવા છતાં શહેરના હરણી વિસ્તારમાં વિજળી ગુલ થઇ હતી. હરણીની મોટા ભાગની સોસાયટીમાં રાત્રે 12 વાગ્યે અચાનક વિજળી ગુલ થઇ ગઇ હતી. કલાકો વિત્યા છતાં વિજળી પરત નહીં આવતા સ્થાનિકો એકત્ર થઇને વિજ કચેરીએ પહોંચ્યા હતા. વિજ કચેરીએ સ્થાનિકોનો ભેટો અધિકારીને થતા તેમણે પહેલા જ કહી દીધું કે, હમણાં ચાર્જ સંભાળ્યો છે. બાદમાં સ્થાનિકોએ પોતાની વાત મુકતા જણાવ્યું હતું કે, તમે ચાર્જમાં આવ્યા છો, તો આ હરણી વિસ્તારનું જોજો, અને સમસ્યાનું નિવારણ લાવજો. તમારે જે કરવું હોય તે કરો અમને હેરાન ના કરો. હવે આ કાયમની સમસ્યા થઇ ગઇ છે. હરણી વિસ્તારની દશા બેઠી છે, સહેજ પવન આવે કે બે ઝાપટા પડે તરત જ લાઇટો જતી રહે છે, અધિકારીઓ શું કરી રહ્યા છે..! બીજી તરફ સ્થાનિકોના આક્રોષ ઠાલવ્યા બાદ અધિકારીઓ કહ્યું કે, મેં હમણાં ચાર્જ સંભાળ્યો છે. તમારી આ સમસ્યાનો કાયમી ઉકેલ આવી જશે. નવી લાઇન નાંખવામાં આવશે, આ અંગે ટેન્ડર પ્રક્રિયા કરવામાં આવનાર છે. જો કે, સ્થાનિકો દ્વારા ટેન્ડર પ્રક્રિયા બાદ સમયસર કામગીરી પૂર્ણ થવા અંગે અવિશ્વાસ દર્શાવ્યો હતો.
