વડોદરા: રણોલી બ્રિજ પાસે આજે જાહેર માર્ગ પર એક સગીર વિદ્યાર્થિની પર ચાકુના ઘા મારીને ખૂની હુમલો કરવાનો બનાવ બનતાં પોલીસે હુમલાખોરને ઝડપી પાડી આગળની કાર્યવાહી હાથ ધરી છે. બનાવની વિગત એવી છે કે, રણોલી બ્રિજ પાસે સર્વિસ રોડ પર સગીરા એક વાહનમાંથી ઉતરીને ઘર તરફ જઇ રહી હતી. ત્યારે તેના એક તરફી પ્રેમમાં પાગલ યુવક અજય રાઠોડ વાહનમાંથી ઉતરેલી સગીર વયની યુવતી પીછો કરવા લાગ્યો હતો. આગળ જતા અજય રાઠોડ નામનો યુવક એકાએક સગીરાની નજીક આવી ગયો હતો. જેના કારણે સગીરા ગભરાઇ ગઇ હતી.
સગીરાના એક તરફી પ્રેમમાં પડેલા યુવકે તેને તું મારી સાથે કેમ આવતી નથી તેમ કહી પરેશાન કરવાન શરૂ કર્યું હતું પરંતુ સગીરાને યુવકને કોઇ મચક આપી નહતી. જેના કારણે યુવક ઉશ્કેરાયો હતો અને તેના પાસે રાખેલા ચાકુના ત્રણેક ઘા સગીરાના હાથે ઝીંકી દીધા હતા. જેથી સગીરાને ઈજા પહોંચતા તેને નજીકના દવાખાનામાં સારવાર માટે લઇ જવામાં આવી હતી. છાણી પોલીસમાં ફરિયાદ નોંધાતા પોલીસે અંગે ગુનો નોંધી હુમલાખોરને ઝડપી પાડી આગળની કાર્યવાહી હાથ ધરવામાં આવી છે.
