સિક્કિમ વિધાનસભા ચૂંટણીના પરિણામો (Election Result) જાહેર થઈ ગયા છે. સિક્કિમ (Sikkim) ક્રાંતિકારી મોરચા એટલે કે SKM ફરી એકવાર પ્રચંડ બહુમતી સાથે સરકાર બનાવવા જઈ રહી છે. રાજ્યની 32 બેઠકોમાંથી SKMએ 31 બેઠકો પર મોટી જીત મેળવી છે જ્યારે સિક્કિમ ડેમોક્રેટિક ફ્રન્ટ એટલે કે SDFએ એક બેઠક જીતી છે. બીજી તરફ અરુણાચલ પ્રદેશમાં વિધાનસભા ચૂંટણીનાં પરિણામોમાં ભાજપને બમ્પર બહુમતી મળી છે અને પાર્ટીએ 60માંથી 46 બેઠકો જીતી છે. અહીં કોંગ્રેસનું પ્રદર્શન નિરાશાજનક રહ્યું છે અને પાર્ટી રાજ્યમાં માત્ર એક બેઠક જીતી શકી છે.
સત્તારૂઢ સિક્કિમ ક્રાંતિકારી મોરચા (SKM)ને સતત બીજી વખત મોટી જીત મળી છે. અહીં ભાજપ, કોંગ્રેસ અને સિટીઝન એક્શન પાર્ટી-સિક્કિમ (CAP-S)ને તેમના ખાતામાં એક પણ સીટ મળી નથી. સિક્કિમની 32 વિધાનસભા બેઠકો માટે પ્રથમ તબક્કામાં 19 એપ્રિલે મતદાન થયું હતું. વિધાનસભાની સાથે સિક્કિમની એક લોકસભા બેઠક માટે પણ મતદાન થયું હતું જેના પરિણામો 4 જૂને જાહેર કરવામાં આવશે.
પ્રેમ સિંહ તમાંગ હાલમાં સિક્કિમના મુખ્યમંત્રી છે. તેઓ 2019માં રાજ્યના છઠ્ઠા મુખ્યમંત્રી તરીકે ચૂંટાયા હતા. પ્રેમ સિંહ તમાંગ પશ્ચિમ સિક્કિમથી આવે છે અને 1990 ના દાયકાની શરૂઆતથી રાજકારણમાં સક્રિય છે. 1993માં પ્રેમ સિંહ તમાંગ સિક્કિમ ડેમોક્રેટિક ફ્રન્ટ (SDF)માં જોડાયા અને 1994માં ચાકુંગ વિધાનસભા બેઠક પરથી ચૂંટણી લડીને વિધાનસભા પહોંચ્યા. આ પછી તેઓ રાજ્ય સરકારમાં મંત્રી પણ બન્યા અને 2009 સુધી કેબિનેટ મંત્રી રહ્યા.
પ્રેમ સિંહ તમાંગ લગભગ 16 વર્ષ સુધી સિક્કિમ ડેમોક્રેટિક ફ્રન્ટ (SDF)માં હતા. આ પછી તેમણે બળવો કર્યો. 2013 માં પ્રેમ સિંહ તમાંગે સિક્કિમ ક્રાંતિકારી મોરચા (SKM) ની રચના કરી અને 2019 માં પ્રથમ વખત વિધાનસભાની ચૂંટણી લડી. 2019 માં સિક્કિમ ડેમોક્રેટિક ફ્રન્ટને રાજ્યની 32 માંથી 17 બેઠકો પર જબરદસ્ત જીત મળી હતી. આ પછી પ્રેમ સિંહ તમાંગ રાજ્યના સીએમ બન્યા. હવે તેમની પાર્ટીને બીજી વાર પ્રચંડ જીત મળી છે.
અરુણાચલ પ્રદેશમાં ભાજપે 60માંથી 46 સીટ પર જીત મેળવી
અરુણાચલ પ્રદેશમાં ભાજપ જંગી બહુમતી સાથે સત્તામાં વાપસી કરી રહી છે પરંતુ દેશની સૌથી જૂની પાર્ટી કોંગ્રેસનું પ્રદર્શન ઘણું નબળું રહ્યું છે અને પાર્ટી અપક્ષ ઉમેદવારો કરતાં પણ પાછળ રહી ગઈ છે. અરુણાચલ પ્રદેશમાં ફરી એકવાર ભાજપની સરકાર બનવા જઈ રહી છે. વિધાનસભા ચૂંટણીમાં અરુણાચલની 60 બેઠકો પર મતગણતરી થઈ હતી જેમાં ભાજપે જીતનો ઝંડો ફરકાવ્યો છે. ભાજપને 60માંથી 46 બેઠકો મળી છે. આ વખતે ફરી ભાજપ પ્રચંડ બહુમતી સાથે સરકાર બનાવવા જઈ રહી છે. જ્યારે નેશનલ પીપલ્સ પાર્ટી (NPEP)ની વાત કરીએ તો આ પાર્ટીને 5 સીટો મળી છે. પીપલ્સ પાર્ટી ઓફ અરુણાચલ પ્રદેશ (PPA)એ રાજ્યમાં 2 બેઠકો જીતી છે. જ્યારે નેશનલ કોંગ્રેસ પાર્ટી (NCP)એ 3 સીટો પર જીત મેળવી છે. આ રાજ્યમાં કોંગ્રેસને માત્ર 1 સીટ મળી છે. ત્રણ અપક્ષ ઉમેદવારો જીત્યા છે.
આ 10 ધારાસભ્યો અરુણાચલમાં બિનહરીફ ચૂંટાયા
મુક્તો વિધાનસભા ક્ષેત્રમાં મુખ્ય પ્રધાન પેમા ખાંડુ સામે કોઈ ઉમેદવાર ઊભો નહોતો તેથી આ બેઠક પહેલેથી જ ભાજપના ખાતામાં હતી. તેવી જ રીતે ભાજપના કુલ 10 ધારાસભ્યો છે જેઓ બિનહરીફ ચૂંટાયા છે. ભાજપમાંથી પ્રથમ વખત ચૂંટાયેલા નિવૃત્ત ઇજનેર ટેચી રોતુ સાગલી વિધાનસભા બેઠક માટે ઉમેદવારી નોંધાવનાર એકમાત્ર ઉમેદવાર હતા, તેમના પહેલા કોઈ ઉમેદવારે ઉમેદવારી નોંધાવી ન હતી. આ ઉપરાંત નાયબ મુખ્યમંત્રી ચૌના મીન ચૌખામ બેઠક પરથી બિનહરીફ ચૂંટાયા છે. જ્યારે બિનહરીફ ચૂંટાયેલા ભાજપના 7 અન્ય ધારાસભ્યોમાં દાસંગલુ પુલ (હ્યુલિયાંગ સીટ – ST), ડોંગરુ સિઓંગજુ (બોમડિલા સીટ પરથી), હેગે અપ્પા (ઝીરો-હાપોલી સીટ પરથી), ઝિક્કે તાકો (તાલી સીટથી), ન્યાતો ડુકામ (તાલિહા સીટ પરથી) મુત્ચૂ મીઠી (રોઈંગ સીટ) અને ટેચી કાસો (ઈટાનગર સીટ) નો સમાવેશ થાય છે.
અગાઉ વર્ષ 2019માં ભાજપે અરુણાચલ પ્રદેશમાં 41 વિધાનસભા બેઠકો જીતીને રાજ્યમાં પોતાની સરકાર બનાવી હતી. તે સમયે જનતા દળ (યુનાઇટેડ) એ સાત વિધાનસભા બેઠકો, એનપીપી (નેશનલ પીપલ્સ પાર્ટી) પાંચ, કોંગ્રેસે ચાર અને પીપીએ (પીપલ્સ પાર્ટી ઓફ અરુણાચલ) એક બેઠક જીતી હતી. આ ઉપરાંત બે અપક્ષ ઉમેદવારોનો પણ વિજય થયો છે. તમને જણાવી દઈએ કે 2 જૂને 60 સભ્યોની વિધાનસભા અને વર્તમાન મુખ્યમંત્રી પેમા ખાંડુનો કાર્યકાળ સમાપ્ત થઈ રહ્યો છે.
