તાપસી પન્નુ અભિનીત ‘રશ્મિ રોકેટ’ રજૂ થવામાં છે. સાવ નાનકડા ગામની છોકરી એથ્લેટ તરીકે રાષ્ટ્રીય સ્તરે કેવી રીતે નામ કાઢે છે તેની આ કહાણી છે પણ કહાણી હજુ ત્યાં અટકતી નથી કારણ કે તેણે સિસ્ટમ અને પ્રોસેસ સામે લડવાનું આવે છે. ફિલ્મના દિગ્દર્શક આકર્ષ ખુરાનાએ આ ફિલ્મ કનિકા ઢીલ્લોલ અને લીસા બજાજ પાસે લખાવડાવી છે અને સ્ત્રી-પુરુષ જાતિના મામલે એક પ્રતિભાને તોલવામાં આવે તો કેવા પ્રશ્નો ઉભા થાય તેની વાત છે. તેણે ડોકટર, વકીલ અને રમતના ફેડરેશન સાથે વાત કરવી પડે છે. ફિલ્મનો મુદ્દો માણસના જંગનો છે.
આકર્ષ ખુરાના કહે છે કે તાપસીએ એકદમ સમર્પિતભાવે આ ફિલ્મમાં કામ કર્યું છે. તેને તાપસી સાથે કામ કરતાં ‘કારવાં’ના ઇરફાન ખાનની ખૂબ યાદ આવી હતી. ‘કારવાં’ પણ આકર્ષના દિગ્દર્શનમાં જ બની હતી અને ઇરફાને એવા જ સમર્પણથી કામ કરેલું. તાપસીએ જયારે ‘રશ્મિ રોકેટ’ની વાત સાંભળી કે તરત હા પાડેલી. સેટ પર પણ તે નાની નાની વાતો પૂછતી રહેતી. આ કારણે ફિલ્મ ખૂબ સારી રીતે પુરી થઇ છે. દિગ્દર્શકને લાગે છે કે તાપસી આ ફિલ્મ માટે પર્ફેકટ ચોઇસ હતી. ‘રશ્મિ રોકેટ’માં તાપસીને પૂછાય છે કે તું છોકરીથી વધુ છોકરો છે ને તેને મળેલો એવોર્ડ પાછો લેવાનો વિવાદ ઉભો થાય છે. તાપસી સાથે પ્રિયાંશુ પેનુલી, અભિષેક બેનરજી, સુપ્રિયા પાઠક, શ્વેતા ત્રિપાઠી કામ કરે છે. 15મી ઓકટોબરે આ ફિલ્મ ઝી 5 પર દર્શાવાશે.
