પાકિસ્તાનના રક્ષામંત્રી ખ્વાજા આસિફના એક નિવેદનને ભારે ચર્ચા જગાવી છે. એક ટીવી ચેનલના ઈન્ટરવ્યુમાં આસિફે કહ્યું કે જો પાકિસ્તાન પર કોઈ દેશ હુમલો કરે અને યુદ્ધ થાય તો સાઉદી અરેબિયા પાકિસ્તાનની રક્ષા કરશે.
જોકે, આ સાથે આસિફે સ્પષ્ટતા કરી હતી કે સાઉદી અરેબિયા સાથે પાકિસ્તાનનો રક્ષાત્મક કરાર છે, આક્રમક નહીં. તેનો અર્થ એ કે સાઉદી અરેબિયા પાકિસ્તાન સાથે મળી કોઈ ત્રીજા દેશ પર હુમલો નહીં કરે પરંતુ જો કોઈ દેશ પાક. પર અથવા કોઈ દેશ સાઉદી પર હુમલો કરે તો બંને દેશો એકબીજાની રક્ષા માટે એકમેકની સાથે ઉભા રહી હુમલાખોર દેશ સામે લડશે. આ સાથે આસિફે સુરક્ષા કરારમાં ભારત કે કોઈ અન્ય દેશનો અલગથી ઉલ્લેખ કરાયો હોવાનો ઈનકાર કર્યો હતો.
પાકિસ્તાનના સંરક્ષણ પ્રધાન ખ્વાજા આસિફે ઇસ્લામાબાદમાં પત્રકારોને જણાવ્યું હતું કે જો ભારત પાકિસ્તાન સામે યુદ્ધ જાહેર કરશે તો સાઉદી અરેબિયા પાકિસ્તાનનો બચાવ કરશે. તેમણે ઉમેર્યું હતું કે પાકિસ્તાન અને સાઉદી અરેબિયા વચ્ચે આ અઠવાડિયે થયેલા કરારમાં વ્યૂહાત્મક પરસ્પર સહાયની જોગવાઈ શામેલ છે.
પાકિસ્તાની ચેનલ જીઓ ટીવી સાથે વાત કરતા ખ્વાજા આસિફે આ કરારની તુલના નાટો કરારની કલમ 5 સાથે કરી, જે “સામૂહિક સંરક્ષણ” ના સિદ્ધાંતને દર્શાવે છે. આનો અર્થ એ છે કે એક સભ્ય પર હુમલો એ બધા સભ્ય દેશો પર હુમલો માનવામાં આવે છે.
જોકે, પાકિસ્તાની સંરક્ષણ પ્રધાને સ્પષ્ટતા કરી કે સાઉદી અરેબિયા સાથેનો આ કરાર આક્રમક નથી પણ રક્ષણાત્મક છે. નાટોનું ઉદાહરણ આપતા તેમણે જિયો ટીવીને કહ્યું કે જો કોઈ હુમલો થાય છે પછી ભલે તે સાઉદી અરેબિયા પર હોય કે પાકિસ્તાન પર અમે સાથે મળીને તેનો સામનો કરીશું.
રોઇટર્સના અહેવાલ મુજબ, ખ્વાજા આસિફે કહ્યું, “અમે આ કરારનો ઉપયોગ કોઈપણ આક્રમણ માટે કરવાનો ઇરાદો ધરાવતા નથી. પરંતુ જો બંને પક્ષો પાકિસ્તાન અને સાઉદી અરેબિયા, ધમકી આપે છે, તો આ વ્યવસ્થા સ્પષ્ટપણે લાગુ કરવામાં આવશે.”
‘પાકિસ્તાનના પરમાણુ શસ્ત્રો સાઉદી અરેબિયા પાસે ઉપલબ્ધ’
ખ્વાજા આસિફે એવો પણ દાવો કર્યો હતો કે પાકિસ્તાનના પરમાણુ શસ્ત્રો સાઉદી અરેબિયા દ્વારા ઉપયોગ માટે ઉપલબ્ધ છે. તેમણે કહ્યું કે “આ કરાર હેઠળ અમારી ક્ષમતાઓ ચોક્કસપણે ઉપલબ્ધ રહેશે.” તેમણે ઉમેર્યું કે પાકિસ્તાને હંમેશા તેના પરમાણુ સુવિધાઓના નિરીક્ષણની મંજૂરી આપી છે અને ક્યારેય કોઈ ઉલ્લંઘન કર્યું નથી.
આ કરાર તમામ લશ્કરી માધ્યમોને આવરી લે છે
રોઇટર્સના અહેવાલ મુજબ, જ્યારે એક વરિષ્ઠ સાઉદી અધિકારીને પૂછવામાં આવ્યું કે શું આ કરારોનો અર્થ એ છે કે પાકિસ્તાન હવે પરમાણુ સુરક્ષા પૂરી પાડવા માટે બંધાયેલું છે, ત્યારે તેમણે કહ્યું કે આ એક વ્યાપક રક્ષણાત્મક કરાર છે, જેમાં તમામ લશ્કરી માધ્યમોનો સમાવેશ થાય છે.
ભારતે આ કરાર મામલે જવાબ આપ્યો
આ “પરસ્પર સંરક્ષણ” કરાર પર આ અઠવાડિયે પાકિસ્તાનના વડા પ્રધાન શાહબાઝ શરીફની રિયાધ મુલાકાત દરમિયાન હસ્તાક્ષર કરવામાં આવ્યા હતા. ભારત સરકારે જવાબમાં કહ્યું હતું કે પાકિસ્તાન-સાઉદી કરાર બંને દેશો વચ્ચે લાંબા સમયથી ચાલતી વ્યવસ્થાને ઔપચારિક બનાવે છે. તેના પરિણામો પર વિચારણા કરવામાં આવી રહી છે. દરમિયાન લશ્કરી અને રાજકીય નિષ્ણાતોએ રોઇટર્સને જણાવ્યું હતું કે આ કરાર રિયાધના ભંડોળને ઇસ્લામાબાદના પરમાણુ શસ્ત્રો સાથે જોડે છે અને બંને દેશો માટે એક મોટી સફળતા છે.
