બુધવારે ચોથી ટેસ્ટના પહેલા દિવસે ઈંગ્લેન્ડના ફાસ્ટ બોલર ક્રિસ વોક્સના બોલને રિવર્સ સ્વીપ કરવાનો પ્રયાસ કરતી વખતે ‘રિટાયરિંગ હર્ટ’ બાદ ભારતીય વિકેટકીપર બેટ્સમેન ઋષભ પંતને મેદાનની બહાર લઈ જવામાં આવ્યો હતો. પંતને જમણા પગમાં ઈજા થઈ હતી. તે સમયે તે 48 બોલમાં 37 રન બનાવ્યા બાદ રમી રહ્યો હતો.
શરૂઆતમાં તેની સારવાર મેદાન પર જ કરવામાં આવી હતી પરંતુ બાદમાં તેને એમ્બ્યુલન્સ જેવા વાહનમાં મેદાનની બહાર લઈ જવામાં આવ્યો હતો. હવે એવું કહેવામાં આવી રહ્યું છે કે ઋષભ પંતના જમણા પગના અંગૂઠામાં ફ્રેક્ચર થયું છે. ડોક્ટરોએ તેને ઓછામાં ઓછા 6 અઠવાડિયા આરામ કરવાની સલાહ આપી છે.
ઋષભ પંતના પગમાં ઈજા બાદ ઈંગ્લેન્ડના ભૂતપૂર્વ કેપ્ટન માઈકલ વોને ટેસ્ટ ક્રિકેટના નિયમોમાં ફેરફારની માંગ ઉઠાવી છે. જ્યારે ઈંગ્લેન્ડના અન્ય ભૂતપૂર્વ કેપ્ટન એલિસ્ટર કૂક વોનની વાત સાથે સહમત નથી. માઈકલ વોને કહ્યું કે આ કમનસીબ ઈજા હવે ટેસ્ટ મેચને અસંતુલિત બનાવશે.
માઈકલ વોને શું કહ્યું?
વોને ટેસ્ટ મેચ સ્પેશિયલ પર કહ્યું, મને એ વાત પસંદ નથી કે મેચના ચાર દિવસ બાકી છે અને આ મહાન શ્રેણીના આગામી ચાર દિવસ 10 વિરુદ્ધ 11 ખેલાડીઓ વચ્ચે રમાશે. તેમણે સૂચન કર્યું કે ઈજાના કિસ્સામાં ખેલાડીઓને બદલવાની મંજૂરી આપવી જોઈએ.
વોને આગળ કહ્યું, જ્યારે માથામાં ઈજા થવા પર સબસ્ટિટ્યુટ ખેલાડીઓને મંજૂરી આપવામાં આવી હતી ત્યારે હું હજુ પણ કહી રહ્યો હતો કે પહેલી ઇનિંગમાં કોઈ સ્પષ્ટ ઈજાના કિસ્સામાં સબસ્ટિટ્યુટ ખેલાડીઓને કેમ મંજૂરી ન આપવી.
સબસ્ટીટ્યુટના મુદ્દા પર માઈકલે કહ્યું, જો આવું બીજી ઇનિંગમાં થાય છે તો ટીમો દ્વારા નિયમોનો દુરુપયોગ થઈ શકે છે. પરંતુ જો ઈજા સ્પષ્ટપણે દેખાય છે જેમ કે કોઈનો હાથ કે પગ તૂટી ગયો છે અથવા સ્નાયુમાં તીવ્ર ખેંચાણ છે તો તે સ્પષ્ટ છે કે ખેલાડી આગળ રમી શકશે નહીં. આવા કિસ્સામાં સબસ્ટીટ્યુટ ખેલાડીઓને મંજૂરી આપવી જોઈએ.
એલિસ્ટર કૂકે માઈકલના સૂચનનો વિરોધ કર્યો
બીજી બાજુ એલિસ્ટર કૂકે આ સૂચન પર સવાલ ઉઠાવ્યા. તેમણે એક કાલ્પનિક ઉદાહરણ રજૂ કર્યું, હું હજુ પણ નક્કી કરી શકતો નથી કે શું સાચું છે. પરંતુ ધારો કે પંતને દુખાવો થાય છે અને તે બહાર જાય છે. પછીથી સ્કેન કંઈ બતાવતું નથી. ફક્ત એક નાનો ઉઝરડો. તો શું તેણે ફરીથી રમવું જોઈએ?
કૂકે કહ્યું, જો પગ તૂટી ગયો હોત, તો વાત અલગ હોત… પરંતુ ક્યારેક કોઈને બોલ વાગ્યો હોય છે, હાથ હલતો નથી અને ખૂબ દુખાવો થાય છે. પરંતુ વાસ્તવમાં ફક્ત સોજો જ હોય છે. તો શું તેને ફક્ત પીડાના આધારે બદલી શકાય છે, ભલે ઈજા ગંભીર ન હોય?
પંતને ઈજા કેવી રીતે થઈ?
વાસ્તવમાં વોક્સનો ફુલ લેન્થ બોલ પંતના પગના અંગૂઠા પર જોરથી વાગ્યો. ઇંગ્લેન્ડના ખેલાડીઓએ LBW માટે અપીલ કરી પરંતુ રિવ્યૂમાં જોવા મળ્યું કે બેટની થોડી કટ લાગી હતી, જેના કારણે પંત બચી ગયો. ઈજા પછી પંતના પગમાંથી લોહી નીકળતું જોવા મળ્યું અને તે ભાગમાં સોજો પણ આવી ગયો.
આ શ્રેણીમાં પંતની આ બીજી વાર ઈજા થઈ છે. આ અગાઉ લોર્ડ્સ ટેસ્ટ દરમિયાન વિકેટકીપિંગ કરતી વખતે તેની આંગળીમાં ઈજા થઈ હતી, જેના કારણે તે ઈંગ્લેન્ડની બીજી ઇનિંગમાં વિકેટકીપિંગ કરી શક્યો ન હતો.
