મુંબઈઃ બોલિવૂડ અભિનેત્રી મલાઈકા અરોડાના પિતા અનિલ અરોડાનું અવસાન થયું છે. અનિલ અરોડાએ બુધવારે છત પરથી કૂદીને આત્મહત્યા કરી લીધી છે. આ ઘટના સવારે 9 વાગ્યે બની હતી. આ ઘટના બાદ મલાઈકાનો પરિવાર અને તેના પરિચિતો આઘાતમાં છે.
માહિતી મળતાં જ મુંબઈ પોલીસ અભિનેત્રીના ઘરે પહોંચી છે અને માહિતી મેળવી રહી છે. મલાઈકા અને તેના પરિવાર માટે આ ખૂબ જ દુઃખદ અને મુશ્કેલ સમય છે.
દરમિયાન મલાઈકાના ઘરે તેના નજીકના મિત્રો અને ફિલ્મ સ્ટાર્સ પણ પહોંચ્યા છે. મલાઈકા અરોડાની બેસ્ટ ફ્રેન્ડ કરીના કપૂર ખાન તેના ઘરે પહોંચી ગઈ છે. અનન્યા પાંડે અને તેના પિતા ચંકી પાંડે પણ બિલ્ડિંગ પર પહોંચી ગયા છે. આ સિવાય હેલન, સોફી ચૌધરી, કિમ શર્મા અને પ્રોડ્યુસર રિતેશ સિધવાની પણ અહીં પહોંચ્યા છે.
મુંબઈ પોલીસે આ માહિતી આપી
મીડિયા સાથે વાત કરતા મુંબઈ પોલીસ અધિકારીએ આ કેસ અંગે અપડેટ આપી છે. પોલીસે કહ્યું, અનિલ અરોડાનો મૃતદેહ મળ્યો છે. તેઓ છઠ્ઠા માળે રહેતા હતા. અત્યારે અમે તપાસ કરી રહ્યા છીએ. હાલ અમે ઝીણવટભરી તપાસ કરી રહ્યા છીએ. દરેક એંગલથી તપાસ કરવામાં આવી રહી છે.
ફોરેન્સિક ટીમ પણ આવી ગઈ છે અને તપાસ પણ કરી રહી છે. હાલ મૃતદેહને પોસ્ટ મોર્ટમ માટે ખસેડવામાં આવ્યો છે. પ્રાથમિક દૃષ્ટિએ આ આત્મહત્યાનો મામલો હોવાનું જણાય છે. તેણે આવું શા માટે કર્યું તેનું કારણ જાણવાનો પ્રયાસ કરી રહ્યા છીએ.
મલાઈકા ઘરે પહોંચી
પિતાના નિધનના સમાચાર મળતા જ મલાઈકા અરોડા પુણેથી મુંબઈ જવા રવાના થઈ ગઈ હતી. તે પિતાના ઘરે પહોંચી ગઈ છે. તેણીનો વિડિયો સામે આવ્યો જેમાં અભિનેત્રી માસ્ક પહેરીને આઘાત અને ચિંતિત દેખાતી ઇમારતમાં પ્રવેશતી જોવા મળી હતી. તેની સાથે તેની નાની બહેન અમૃતા અરોડા પણ જોવા મળી હતી. અમૃતા રડતી રડતી બિલ્ડીંગમાં પ્રવેશી અને પોતાનો ચહેરો છુપાવતી જોવા મળી.
આ દરમિયાન મલાઈકા અરોરાનો પુત્ર અરહાન ખાન, અમૃતા અરોરાના પતિ શકીલ લડાક, અરબાઝ ખાનના પિતા સલીમ ખાન, ભાઈ સોહેલ ખાન અને સીમા સજદેહ પણ ઘટના સ્થળે પહોંચી ગયા છે. મલાઈકાનો બોયફ્રેન્ડ અર્જુન કપૂર પણ તેની કાળજી લેતો જોવા મળ્યો હતો. અભિનેત્રીના મુશ્કેલ સમયમાં દરેક તેની સાથે ઉભા છે.
અરબાઝ ખાન મલાઈકાના ઘરે પહોંચ્યો
આ મુશ્કેલ સમયમાં મલાઈકાનો પૂર્વ પતિ અરબાઝ ખાન પણ તેના ઘરે પહોંચી ગયો છે. અરબાઝ ખાન મલાઈકાના ઘરની બહાર પોલીસ અને અન્ય લોકો સાથે વાત કરતો જોવા મળ્યો હતો. અભિનેતાનો વીડિયો સોશિયલ મીડિયા પર વાયરલ થઈ રહ્યો છે. મલાઈકા અરોડાના પિતા અનિલ અરોડા પંજાબી હિંદુ પરિવારના હતા. તેનો પરિવાર સરહદ પર આવેલા ફાઝિલ્કા જિલ્લાનો રહેવાસી હતો. અનિલ ઈન્ડિયન મર્ચન્ટ નેવીમાં કામ કરી ચૂક્યા છે. અનિલ અરોડાએ જોયસ પોલીકાર્પ સાથે લગ્ન કર્યા હતા જે મલયાલી ખ્રિસ્તી પરિવારમાંથી આવે છે.
મલાઈકા અરોડા ક્યાં હતી?
કહેવામાં આવી રહ્યું છે કે જ્યારે અનિલ અરોડાએ આત્મહત્યા કરી ત્યારે મલાઈકા અરોડા ઘરે ન હતી. આ ઘટના આજે તા. 11 સપ્ટેમ્બર, સવારે 9 વાગ્યાની આસપાસ બની હતી, જ્યારે અનિલ અરોડાએ બાંદ્રા બિલ્ડીંગમાં તેના ઘરની ટેરેસ પરથી કૂદીને આત્મહત્યા કરી હતી. મલાઈકા તે સમયે પુણેમાં હતી. ઘટનાની જાણકારી મળતા જ અભિનેત્રી મુંબઈથી પૂણે જવા રવાના થઈ ગઈ હતી.
અનિલ અરોડાના મૃતદેહને પોસ્ટમોર્ટમ માટે મોકલવામાં આવ્યો છે. મલાઈકાનો પૂર્વ પતિ અરબાઝ ખાન પરિવાર સાથે બિલ્ડિંગમાં હાજર છે. આ દરમિયાન અરબાઝની બહેન અલવીરા ખાન અગ્નિહોત્રી પણ મલાઈકાના ઘરે પહોંચી ગઈ છે. બિલ્ડિંગની બહાર મુંબઈ પોલીસનો ચુસ્ત બંદોબસ્ત છે.
ફોરેન્સિક ટીમ મલાઈકાના ઘરે પહોંચી
મુંબઈ પોલીસની સાથે ફોરેન્સિક ટીમ ઘટના સ્થળે પહોંચી ગઈ છે. તેમણે ઘટના સ્થળે પોતાનું કામ શરૂ કરી દીધું છે. વિસ્તારની નાકાબંધી કરવામાં આવી છે અને આ મામલે તપાસ આગળ ધપાવવામાં આવી રહી છે. અનિલ અરોડાના મૃતદેહનું પોસ્ટ મોર્ટમ કરવાનું બાકી છે.
ગયા વર્ષે હોસ્પિટલમાં દાખલ કરવામાં આવ્યા હતા
જુલાઈ 2023 માં મલાઈકા અરોડાના પિતા અનિલ અરોડાને મુંબઈની એક હોસ્પિટલમાં દાખલ કરવામાં આવ્યા હતા. ત્યાર બાદ અભિનેત્રી હોસ્પિટલમાં તેની માતા જોયસને મળવા પણ જોવા મળી હતી. જો કે અનિલ અરોડાને કયા કારણોસર હોસ્પિટલમાં દાખલ કરવા પડ્યા તે અંગે કોઈ માહિતી પ્રાપ્ત થઈ નથી. મલાઈકા કે તેના પરિવારે અનિલ અરોડાના સ્વાસ્થ્ય અંગે કોઈ સત્તાવાર નિવેદન જાહેર કર્યું નથી.
