નવી દિલ્હીઃ રતન ટાટાના અવસાન બાદ તેમની સંપત્તિ અને વસિયતને લઈને ઘણી ચર્ચા ચાલી રહી છે. લોકોના મનમાં પ્રશ્ન હતો કે તેમની મિલકતનો વારસો કોને મળશે? આવી સ્થિતિમાં હવે દિગ્ગજ ઉદ્યોગપતિની અંતિમ ઈચ્છા સામે આવી છે. ઓગસ્ટમાં જાહેર કરાયેલા હુરુન ઈન્ડિયા રિચ લિસ્ટ મુજબ ટાટા સન્સમાં રતન ટાટા લગભગ 0.83% હિસ્સો ધરાવતા હતા અને તેમની કુલ સંપત્તિ રૂ. 7,900 કરોડ હતી. જ્યારે અન્ય સંપત્તિ સહિત તેમના નામે અંદાજિત કુલ 10,000 કરોડ રૂપિયાની સંપત્તિ હતી.
રતન ટાટાના વિલને અમલમાં મૂકવાની જવાબદારી તેમની સાવકી બહેનો શિરીન અને ડાયના જેજીભોયની સાથે વકીલ ડેરિયસ ખંબાટા અને તેમના નજીકના મિત્ર મેહલી મિસ્ત્રીને આપવામાં આવી છે. અહેવાલ મુજબ, રતન ટાટાના વિલની તમામ વિગતો જાહેર કરવામાં આવી નથી પરંતુ એ નક્કી છે કે તેમની મિલકતનો મોટો હિસ્સો ચેરિટી રતન ટાટા એન્ડોમેન્ટ ફાઉન્ડેશન (RTEF)ને જશે.
ટાટા સન્સના ચેરમેન એન ચંદ્રશેખરન ફાઉન્ડેશનનું નેતૃત્વ કરશે અને સામાજિક કલ્યાણ અને સેવા માટે ટાટાના વિઝનને ચાલુ રાખશે. રતન ટાટાની ઇચ્છા મુજબ ફાઉન્ડેશનને RNT એસોસિએટ્સ અને RNT સલાહકારો દ્વારા તેમના સ્ટાર્ટઅપ રોકાણોના લિક્વિડેશનથી પણ ફાયદો થશે, જે તેની સખાવતી પહેલને નોંધપાત્ર રીતે વેગ આપશે.
રતન ટાટાના રસોઈયાનું પણ વસિયતનામામાં નામ
અહેવાલ અનુસાર રતન ટાટાની વસિયતમાં તેમના ભાઈ જીમી ટાટા અને સાવકી બહેનો શિરીન અને ડીના જેજીભોય સહિત તેમના નજીકના પરિવારના સભ્યો માટે જોગવાઈઓ કરવામાં આવી છે. તેમાં રતન ટાટાના વફાદાર ડોમેસ્ટિક સ્ટાફનો પણ સમાવેશ થાય છે, જેમ કે તેમના રસોઈયા રાજન શો અને બટલર સુબ્બિયા. આ બંને કર્મચારીઓ રતન ટાટાની દાયકાઓથી સેવા કરતા રહ્યાં છે.
વિશ્વાસુ શાંતનુનું પણ વસિયતમાં નામ
રતન ટાટાના કાર્યકારી સહાયક અને વિશ્વાસુ શાંતનુ નાયડુને પણ વસિયતમાં હિસ્સો મળ્યો છે. અહેવાલ મુજબ, ટાટાએ શાંતનુ નાયડુની એજ્યુકેશન લોનને માફ કરી છે અને નાયડુના તમામ વ્યવસાયો, ગુડફેલોમાં પોતાનો હિસ્સો છોડી દીધો છે. નાયડુને આપવામાં આવેલી આ મોટી રાહત દર્શાવે છે કે શાંતનુ રતન ટાટાના ખૂબ નજીક હતા.
પાલતું કૂતરાં માટે પણ વસિયતમાં જોગવાઈ
રતન ટાટાના પાલતુ જર્મન શેફર્ડ ટીટોની આજીવન સંભાળ માટે પણ વસિયતમાં જોગવાઈ કરાઈ છે. વિલમાં જણાવવામાં આવ્યું છે કે 5-6 વર્ષ પહેલા દત્તક લીધેલા ટીટોની દેખરેખ ચાલુ રાખવામાં આવે. રતન ટાટાના કોલાબા નિવાસસ્થાન અને તાજ વેલિંગ્ટન મ્યુઝ ખાતે રાખેલી 20-30 લક્ઝરી કારનો સંગ્રહ હરાજી અથવા જાહેર પ્રદર્શન જેવા વિકલ્પો સાથે હજુ ફાળવવાનો બાકી છે. તેમનો પ્રખ્યાત અલીબાગ બીચ બંગલો અને જુહુ તારા રોડ પરનો બંગલો પણ મિલકતનો એક ભાગ છે. આ અંગે પણ હજુ નિર્ણય આવ્યો નથી.
