BENGLURU : સેક્સ સીડી ( SEX CD) ના આરોપોથી ઘેરાયેલા કર્ણાટકના મંત્રી રમેશ જરકિહોલીએ રાજ્યના મુખ્ય પ્રધાન બી.એસ. યેદિયુરપ્પાને રાજીનામું સુપરત કર્યું છે. હકીકતમાં એક સીડી બહાર આવી જેમાં ભાજપ સરકારના જળ સંસાધન પ્રધાન રમેશ જરકિહોલી કથિત રીતે કોઈ અજાણી મહિલા સાથે જોવા મળી રહ્યા છે. આ ક્લિપ કન્નડ ન્યૂઝ (KANNAD NEWS) ચેનલો દ્વારા પ્રસારિત કરવામાં આવી હતી.
મુખ્યમંત્રી યેદિયુરપ્પાને આપેલા રાજીનામામાં રમેશ જરકિહોલી ( RAMESH JARKIHOLI) એ કહ્યું હતું કે તેઓ નૈતિક ધોરણે રાજીનામું આપી રહ્યા છે અને આ મામલાની તપાસ થવી જોઇએ. તેમણે કહ્યું, “મારી સામેનો આરોપ સત્યથી દૂર છે. આમાં ન્યાયી તપાસ થવી જોઈએ, હું નૈતિક ધોરણે રાજીનામું આપી રહ્યો છું.”
મુખ્યમંત્રી યેદિયુરપ્પાએ રમેશ જરકિહોલીનું રાજીનામું સ્વીકારીને રાજ્યપાલને મંજૂરી માટે મોકલ્યું છે. કર્ણાટકના મંત્રી જગદીશ શેટ્ટરએ કહ્યું, “તેમણે (રમેશ જરકિહોલી) રાજીનામું આપ્યું છે. કોઈએ કોઈ નિવેદન કે ફરિયાદ આપી નથી. અમારે નિર્ણય લેવો પડશે.”
સૂત્રોના જણાવ્યા અનુસાર જર્કીહોલીએ પાર્ટી હાઈકમાન્ડ ( PARTY HIGH COMMAND) ની સૂચના બાદ રાજીનામું મોકલી દીધું છે. એવું કહેવામાં આવે છે કે ભાજપના રાષ્ટ્રીય મહાસચિવ અને કર્ણાટકના પ્રભારી, અરૂણસિંહે રાજ્યના નેતૃત્વને અન્ય રાજ્યોમાં વિધાનસભાની ચૂંટણીઓ અને રાજ્યમાં પંચાયતની ચૂંટણીને ધ્યાનમાં રાખીને પક્ષના નિર્ણય અંગે માહિતી આપી હતી.
ગુરુવારથી શરૂ થનારા રાજ્ય વિધાનસભાના બજેટ સત્રના પહેલા પ્રધાન વિરુદ્ધ આવા આક્ષેપો, બીએસ યેદિયુરપ્પાની આગેવાનીવાળી ભાજપ સરકાર માટે શરમજનક છે.
રાજ્યમાં વિપક્ષ કોંગ્રેસ અને જેડીએસ પણ મંત્રીના તાત્કાલિક રાજીનામાની માંગ કરી રહ્યા હતા.
સેક્સ કૌભાંડની સીડીએ કર્ણાટકના રાજકારણમાં ખળભળાટ મચાવ્યો છે, અને રાજ્યના જળ સંસાધન પ્રધાન રમેશ જરકિહોલી પર આ કેસમાં જાતીય શોષણનો આરોપ મૂકવામાં આવ્યો છે. સમાજસેવક દિનેશ કલ્લહલ્લીએ સીડી જાહેર કરીને આરોપ લગાવ્યો હતો કે મંત્રીએ નોકરી મેળવવાના નામે મહિલાનું જાતીય શોષણ કર્યું હતું.
દિનેશ કલ્લહલ્લીએ આ અંગે બેંગલુરુ શહેર પોલીસ કમિશનરને ફરિયાદ નોંધાવી છે અને પીડિતની સુરક્ષાની માંગ કરી છે. ફરિયાદી દિનેશ કલ્લહલ્લી એ કહ્યું કે, ‘મેં કર્ણાટકના પ્રધાન રમેશ જરકિહોલી સાથે જોડાયેલા જાતીય કૌભાંડની તપાસની માંગણી સાથે પોલીસમાં ફરિયાદ નોંધાવી છે.’
