પાકિસ્તાનમાં ભારે અશાંતિ ફેલાઈ છે. લાહોર અને મુરિદકેમાં તહરીક-એ-લબ્બૈક પાકિસ્તાન (TLP) વિરોધીઓ અને સુરક્ષા દળો વચ્ચે હિંસક અથડામણો ફાટી નીકળી છે. પોલીસે વિરોધીઓ પર ગોળીબાર કર્યો જેમાં 10 થી વધુ લોકો માર્યા ગયા. વિરોધીઓએ સુરક્ષા દળો પર અત્યાધુનિક હથિયારોથી ગોળીબાર કરવાનો આરોપ લગાવ્યો. આ અથડામણમાં 50 થી વધુ પોલીસકર્મીઓ પણ ઘાયલ થયા. કટ્ટરપંથી ઇસ્લામિક પક્ષ તહરીક-એ-લબ્બૈક પાકિસ્તાને દાવો કર્યો કે પોલીસે તેના સમર્થકો પર ગોળીબાર કર્યો. વધુમાં રેન્જર્સે સશસ્ત્ર વાહનથી 70 લોકોને કચડી નાખ્યા જેમાં ઘણા લોકો ઘાયલ થયા. વિરોધીઓના જણાવ્યા અનુસાર મુરીદકેમાં પોલીસ અને રેન્જર્સે અંધાધૂંધ ગોળીબાર કર્યો.
ગાઝા શાંતિ યોજનાને સમર્થન આપવા સામે છેલ્લા પાંચ દિવસથી પાકિસ્તાનમાં વિરોધ પ્રદર્શનો ચાલી રહ્યા છે. મીડિયા અહેવાલો અનુસાર પાકિસ્તાની રાજકીય પક્ષ તહરીક-એ-લબ્બૈક (TLP) એ દાવો કર્યો છે કે પોલીસ ગોળીબારમાં તેના 250 થી વધુ કાર્યકરો અને નેતાઓ માર્યા ગયા છે અને 1,500 થી વધુ ઘાયલ થયા છે.
પાકિસ્તાન સરકારે ટ્રમ્પની શાંતિ યોજનાને સમર્થન આપ્યું છે જેના કારણે ઘણા પક્ષો ગુસ્સે થયા છે. TLP વડા સાદ હુસૈન રિઝવી વિરોધ પ્રદર્શનોનું નેતૃત્વ કરી રહ્યા છે. તેમણે સરકાર વિરોધી, ગાઝા સમર્થક અને ઇઝરાયલ વિરોધી અભિયાનના ભાગ રૂપે લાહોરથી ઇસ્લામાબાદ સુધી લાંબી કૂચનું આયોજન કર્યું હતું. કૂચ દરમિયાન રિઝવીને પણ ત્રણ ગોળી વાગી હતી. પાર્ટીના પ્રવક્તાના જણાવ્યા અનુસાર રિઝવીની હાલત ગંભીર છે. તેમને નજીકના તબીબી કેન્દ્રમાં લઈ જવામાં આવ્યા છે જ્યાં તેમની સારવાર ચાલી રહી છે.
ઘટનાના સ્થળ અથવા ઘાયલોની સંખ્યા અંગે કોઈ સત્તાવાર નિવેદન જારી કરવામાં આવ્યું નથી. TLPના પ્રવક્તાએ જણાવ્યું હતું કે પરિસ્થિતિ તણાવપૂર્ણ છે અને પાકિસ્તાની પંજાબના ઘણા ભાગોમાં અથડામણો ચાલુ છે. ગુરુવારે મોડી રાત્રે પંજાબ પોલીસે TLP મુખ્યાલય પર દરોડો પાડ્યો અને તેના નેતા સાદ રિઝવીની ધરપકડ કરવાનો પ્રયાસ કર્યો ત્યારે વિરોધ પ્રદર્શન શરૂ થયા. સાદ ભાગી ગયા પરંતુ પોલીસ અને સાદ સમર્થકો વચ્ચેની અથડામણમાં ઘણા લોકો ઘાયલ થયા.
પોલીસે શહેરમાં અને બહારના રસ્તાઓ બંધ કરી દીધા. રમખાણો અટકાવવા માટે મુખ્ય રસ્તાઓ પર પોલીસ તૈનાત કરવામાં આવી હતી, અને રેડ ઝોન, જ્યાં સરકારી કચેરીઓ અને વિદેશી દૂતાવાસો આવેલા છે, તેને સંપૂર્ણપણે સીલ કરી દેવામાં આવ્યો હતો.
પાકિસ્તાનના પંજાબ પ્રાંતમાં સોમવારે સુરક્ષા દળો અને તહરીક-એ-લબ્બૈક પાકિસ્તાન (TLP) ના વિરોધીઓ વચ્ચે હિંસક અથડામણ થઈ હતી. બે પોલીસ અધિકારીઓ માર્યા ગયા હતા અને ડઝનેક ઘાયલ થયા હતા. અહેવાલો અનુસાર કાર્યવાહી સવારે 2 વાગ્યે શરૂ થઈ હતી અને સવારે 7 વાગ્યા સુધી ચાલી હતી.
મુરીદકેમાં વિરોધીઓને રોકવા માટે પોલીસે કડક કાર્યવાહી કરી. પાકિસ્તાન રેન્જર્સ સહિત સુરક્ષા દળોએ લાઠીચાર્જ અને ટીયર ગેસનો ઉપયોગ કર્યો. વિરોધીઓએ અનેક સ્થળોએ છાવણીઓ ઉભી કરી હતી, પરંતુ ભારે અવરોધો છતાં હિંસા ફાટી નીકળી હતી.
શનિવારે થયેલા વિરોધ પ્રદર્શન દરમિયાન પોલીસે 170 થી વધુ લોકોની ધરપકડ કરી હતી. વિરોધીઓનો આરોપ છે કે સુરક્ષા દળોએ તેમની સામે હથિયારોનો ઉપયોગ કર્યો હતો. મીડિયા કવરેજ પર પણ પ્રતિબંધ છે. દરમિયાન, TLP નેતા સાદ રિઝવીએ પ્રદર્શનકારીઓને કહ્યું, “ધરપકડ કોઈ સમસ્યા નથી, ગોળીઓ કોઈ સમસ્યા નથી, શહાદત આપણું ભાગ્ય છે.”
TLP ની સ્થાપના 2015 માં કરવામાં આવી હતી
TLP ની સ્થાપના 2015 માં ખાદિમ હુસૈન રિઝવી દ્વારા કરવામાં આવી હતી. તેઓ પંજાબ ધાર્મિક વિભાગમાં કામ કરતા હતા પરંતુ 2011 માં સલમાન તાસીરના હત્યારા મુમતાઝ કાદરીને ટેકો આપવા બદલ તેમને બરતરફ કરવામાં આવ્યા હતા. 2016 માં કાદરીને દોષિત ઠેરવ્યા પછી TLP એ નિંદાના મુદ્દા પર દેશવ્યાપી વિરોધ પ્રદર્શનો શરૂ કર્યા. ખાદિમે ફ્રાન્સ વિરુદ્ધ પણ ભડકાઉ નિવેદનો આપ્યા હતા. 2021 માં તેમના મૃત્યુ પછી તેમના પુત્ર સાદ રિઝવીએ સંગઠનની કમાન સંભાળી.
