હોળી અને અને રમઝાનની જુમ્માના અવસરે 4 રાજ્યોમાં હિંસક ઘટનાઓ બની હતી. બિહારના મુંગેરમાં ગ્રામજનોના હુમલામાં એક ASIનું મોત થયું છે. પટનામાં બે જૂથો વચ્ચે હોલિકા દહન પરનો વિવાદ હોળીના દિવસે પથ્થરમારા સુધી વધી ગયો હતો. પોલીસ વાહનના કાચ તૂટી ગયા હતા. અહીં ગોળીબારના પણ સમાચાર છે. બીજી તરફ ઝારખંડના ગિરિડીહમાં હોળી પર બે જૂથો વચ્ચે પથ્થરમારો થયા બાદ બદમાશોએ દુકાનો અને બાઇકોને આગ ચાંપી દીધી. વિવાદ શેના પર હતો તે સ્પષ્ટ નથી. પોલીસ આ અંગે તપાસ કરી રહી છે.
પંજાબના લુધિયાણામાં બે સમુદાયો વચ્ચે ઈંટો, પથ્થરો અને બોટલો ફેંકવામાં આવી હતી. આ અથડામણમાં 11 લોકો ઘાયલ થયા છે. એક ખાસ સમુદાયના લોકોનું કહેવું છે કે નમાજ અદા કરતી વખતે પથ્થરમારો કરવામાં આવ્યો હતો. બીજી બાજુના લોકો કહે છે કે ઈંટ પહેલા મસ્જિદ તરફ ફેંકવામાં આવી હતી. ઘણા વાહનોમાં તોડફોડ પણ કરવામાં આવી હતી.
પશ્ચિમ બંગાળમાં પણ હિંસા થઈ છે. ભાજપે નંદીગ્રામમાં મૂર્તિ તોડવાનો આરોપ લગાવ્યો છે. ભાજપ આઈટી સેલના વડા અમિત માલવિયાએ તસવીરો પોસ્ટ કરી છે. માલવિયાએ આરોપ લગાવ્યો કે બરુઈપુર, જાદવપુર અને મુર્શિદાબાદ સહિત રાજ્યભરમાં સમાન ઘટનાઓ નોંધાઈ છે. બંગાળના બીરભૂમ જિલ્લામાં 17 માર્ચ સુધી ઇન્ટરનેટ બંધ કરી દેવામાં આવ્યું છે. અધિકારીઓના મતે અફવાઓને રોકવા માટે આ પગલું લેવામાં આવ્યું છે. જિલ્લામાં પથ્થરમારાની ઘટના બાદ સંવેદનશીલ વિસ્તારોમાં ભારે પોલીસ બંદોબસ્ત ગોઠવી દેવામાં આવ્યો છે.
શુક્રવારે બિહારના મુંગેરમાં ASI સંતોષ કુમાર બે પક્ષો વચ્ચેના વિવાદને ઉકેલવા ગયા ત્યારે ગ્રામજનોએ તેમના પર હુમલો કર્યો. સારવાર દરમિયાન તેમનું મોત નીપજ્યું. તેમના મગજમાં 7-8 જગ્યાએ તીક્ષ્ણ ઈજાઓ હતી. તીક્ષ્ણ હથિયારથી તેમની હત્યા કરવામાં આવી હતી. આ પહેલા અરરિયામાં ગ્રામજનોના હુમલામાં એક ASIનું મોત થયું હતું. તે એક વોન્ટેડ વ્યક્તિને પકડવા ગયા હતા.
શુક્રવારે પટણાના NTPC પોલીસ સ્ટેશન વિસ્તાર હેઠળના સહનૌરા ગામમાં હોલિકા દહનને લઈને બે પક્ષો વચ્ચે અથડામણ થઈ હતી. એક પક્ષે રસ્તા પર હોલિકાનું દહન કર્યું જેનો બીજા પક્ષે વિરોધ કર્યો. બપોરે 1 વાગ્યાની આસપાસ પરિસ્થિતિ વધુ વણસી ગઈ અને બંને પક્ષો વચ્ચે ભારે પથ્થરમારો થયો. લોકોએ ઘટનાસ્થળે પહોંચેલી પોલીસ ટીમને પણ ભગાડી દીધી. પોલીસ વાહન પર પણ પથ્થરમારો કરવામાં આવ્યો હતો.
પંજાબના લુધિયાણાના મિયાં માર્કેટમાં હોળી અને જુમ્માને લઈ બે જૂથો વચ્ચે અથડામણ થઈ હતી. બંને પક્ષે ઈંટો, પથ્થરો અને બોટલો ફેંકવામાં આવી હતી. આ અથડામણમાં બંને પક્ષના 11 લોકો ઘાયલ થયા હતા. વરિષ્ઠ પોલીસ અધિકારીઓ ઘટનાસ્થળે પહોંચી ગયા હતા. ઘટના સ્થળે CIA સહિત ઘણા પોલીસ સ્ટેશનના પોલીસ હાજર છે.
ચોક્કસ સમુદાયના લોકોનું કહેવું છે કે નમાઝ અદા કરતી વખતે કેટલાક બદમાશોએ પથ્થરમારો શરૂ કરી દીધો હતો. આ દરમિયાન ઘણા વાહનોમાં તોડફોડ પણ કરવામાં આવી હતી. બીજી બાજુ કહે છે કે ઈંટ પહેલા મસ્જિદ તરફ ફેંકવામાં આવી હતી. પથ્થરમારો અને મસ્જિદની બારીઓના કાચ તોડવાના વીડિયો પણ સામે આવ્યા છે.
ઝારખંડના ગિરિડીહ જિલ્લાના ઘોરથંભામાં ગઈકાલે રાત્રે બે જૂથો વચ્ચે અથડામણ થઈ હતી. હોળીના અવસર પર થયેલી આ અથડામણ દરમિયાન બંને પક્ષો વચ્ચે ભારે પથ્થરમારો થયો હતો. આ દરમિયાન માત્ર પથ્થરમારો જ નહીં પરંતુ ઘણી દુકાનોમાં આગ પણ લગાવવામાં આવી હતી. દુકાનોમાં આગ લગાવવાની સાથે એક બાઇકને પણ આગ લગાવવામાં આવી હતી. બંને પક્ષના લોકો એકબીજા સાથે કેમ અથડાયા તે જાણી શકાયું નથી.
