મહારાષ્ટ્રમાં 20મી નવેમ્બરે યોજાનારી વિધાનસભાની ચૂંટણી પહેલા સોમવારે પાલઘરમાં ભારે હંગામો થયો હતો. બહુજન વિકાસ આઘાડીએ ભાજપના રાષ્ટ્રીય મહાસચિવ વિનોદ તાવડે પર પૈસાની વહેંચણીનો આરોપ લગાવ્યો હતો. એવો દાવો કરવામાં આવ્યો હતો કે નાલાસોપારામાં તેમણે લોકોને લાલચ આપવા માટે પૈસા વહેંચ્યા હતા. જો કે ભાજપે આરોપોને નકારી કાઢતા કહ્યું કે મહા વિકાસ અઘાડી (MVA) આ આરોપો કરી રહી છે કારણ કે તે હાર તરફ આગળ વધી રહી છે. વિપક્ષના આરોપો બાદ ચૂંટણી પંચે વિનોદ તાવડે અને નાલાસોપારાથી ભાજપના ઉમેદવાર રાજન નાઈક વિરુદ્ધ FIR દાખલ કરી છે.
મહારાષ્ટ્રમાં વિધાનસભા ચૂંટણી માટે મતદાનના એક દિવસ પહેલા ભાજપના રાષ્ટ્રીય મહાસચિવ વિનોદ તાવડે પર પૈસાની વહેંચણીનો આરોપ લાગ્યો છે. વિવાદ ત્યારે શરૂ થયો જ્યારે BVA પ્રમુખ હિતેન્દ્ર ઠાકુર અને તેમના પુત્ર ક્ષિતિજ 19 નવેમ્બર, મંગળવારના રોજ વિરારની હોટલમાં પહોંચ્યા. અહીં તાવડે નાલાસોપારાથી ભાજપના ઉમેદવાર રાજન નાઈક અને પાર્ટી કાર્યકર્તાઓ સાથે બેઠક કરી રહ્યા હતા.
બહુજન વિકાસ આઘાડી (BVA)એ આરોપ લગાવ્યો હતો કે તાવડે 5 કરોડ રૂપિયા લઈને હોટલમાં પહોંચ્યા હતા અને પૈસા અહીંના મતદારોને વહેંચવામાં આવી રહ્યા હતા. હોટલમાં ભાજપ અને બીવીએના કાર્યકરો વચ્ચે ઉગ્ર બોલાચાલી થઈ હતી. હોટલમાં હંગામાના કેટલાક વીડિયો પણ સામે આવ્યા છે. વીડિયોમાં કેટલાક લોકો હાથમાં નોટો પકડેલા જોવા મળે છે. એક યુવાનના હાથમાં ડાયરી પણ દેખાય છે. આ ડાયરીમાં પૈસાનો હિસાબ હોવાનો આરોપ છે.
વિપક્ષના આરોપો બાદ ચૂંટણી પંચે વિનોદ તાવડે અને નાલાસોપારાથી ભાજપના ઉમેદવાર રાજન નાઈક વિરુદ્ધ FIR દાખલ કરી છે. જાણકારી અનુસાર ચૂંટણી પંચના અધિકારીઓએ તાવડેના રૂમમાંથી 9 લાખ રૂપિયા અને દસ્તાવેજો જપ્ત કર્યા છે. તેનો વીડિયો સામે આવ્યો છે. જોકે ચૂંટણી પંચે માત્ર એટલું જ કહ્યું છે કે કેટલીક જપ્તી કરવામાં આવી છે.
તાવડેએ કહ્યું- હું કાર્યકર્તાઓની બેઠકમાં ગયો હતો, ચૂંટણી પંચે તપાસ કરે
વિનોદ તાવડેએ કહ્યું કે નાલાસોપારા વિધાનસભા ક્ષેત્રમાં કાર્યકર્તાઓની બેઠક ચાલી રહી હતી. હું ચૂંટણીના દિવસે આચારસંહિતા વિશે 12 બાબતો જણાવવા ત્યાં પહોંચ્યો હતો. અમારી સામેના પક્ષકારોએ વિચાર્યું કે હું ત્યાં પૈસા વહેંચવા આવ્યો છું. ચૂંટણી પંચ અને પોલીસે આ આરોપોની તપાસ કરવી જોઈએ. હું 40 વર્ષથી પાર્ટીમાં છું. બધા મને ઓળખે છે. હું પણ ઇચ્છું છું કે ચૂંટણી પંચ નિષ્પક્ષ તપાસ કરે.
રાહુલ ગાંધીએ સોશિયલ મીડિયા પર લખ્યું કે મોદીજી, કોની તિજોરીમાંથી આ 5 કરોડ રૂપિયા નીકળ્યા? જનતાના પૈસા લૂંટીને તમને ટેમ્પોમાં કોણે મોકલ્યા? તો બીજી તરફ મહારાષ્ટ્ર કોંગ્રેસના અધ્યક્ષ નાના પટોલેએ કહ્યું કે વિરારની એક હોટલમાં પૈસાની વહેંચણી કરતી વખતે રંગે હાથ ઝડપાયેલા ભાજપના કેન્દ્રીય મહાસચિવ વિનોદ તાવડેનો વીડિયો વાયરલ થઈ રહ્યો છે. ચૂંટણી પંચે વિનોદ તાવડે સામે આચારસંહિતાના ભંગ બદલ કડક કાર્યવાહી કરવી જોઈએ. અમે માંગ કરીએ છીએ કે લોકશાહીમાં લોકોનો વિશ્વાસ જાળવી રાખવા અને પારદર્શક રીતે ચૂંટણી કરાવવા માટે વિનોદ તાવડેની ધરપકડ કરવામાં આવે.
શિવસેના ઉદ્ધવ જૂથના સાંસદ સંજય રાઉતે કહ્યું કે ગૃહ વિભાગે વિનોદ તાવડે પર નજર રાખી હતી. ભાજપના કેટલાક લોકો આજે ખુશ રહેશે. આ કોઈ કાવતરું તો નથી. ભવિષ્યમાં તાવડા મોટા ન બને તે માટે આ કરવામાં આવ્યું હતું. મારી પાસે 18 લોકોના નામ છે જેઓ પૈસાની વહેંચણી કરી રહ્યા હતા પરંતુ વિનોદ તાવડે પોતે પૈસા વહેંચી રહ્યા છે, આ આશ્ચર્યજનક છે.
AAP સાંસદ સંજય સિંહે કહ્યું કે અદાણી કરોડો રૂપિયામાં ધારાસભ્યોને ખરીદીને મહારાષ્ટ્ર સરકારને પાડે છે. ભાજપ સરકાર બનાવીને મહારાષ્ટ્રમાં લાખો કરોડો રૂપિયાનો બિઝનેસ અદાણીને આપે છે આ પછી તે અદાણીના કાળા નાણાથી ચૂંટણી લડે છે. ભાજપના નેતાના હાથમાં નોટોના આ બંડલ અદાણીના છે. ભાજપ મહારાષ્ટ્રને અદાણી રાષ્ટ્ર બનાવવા માંગે છે.
