અમેરિકાના રાષ્ટ્રપતિ ડોનાલ્ડ ટ્રમ્પે ગુરુવારે કહ્યું હતું કે તેઓ ચીન પર આયાત શુલ્ક (ટેરિફ) વધુ વધારવા માંગતા નથી કારણ કે તેનાથી બંને દેશો વચ્ચેનો વેપાર અટકી શકે છે. બ્લૂમબર્ગના અહેવાલ મુજબ, ટ્રમ્પે એવો પણ દાવો કર્યો હતો કે ચીન તરફથી વાતચીત શરૂ કરવા માટે ઘણી વખત પ્રયાસો કરવામાં આવ્યા છે.
ઓવલ ઓફિસમાં પત્રકારો સાથે વાત કરતા ટ્રમ્પે કહ્યું, ચીનના રાષ્ટ્રપતિ શી જિનપિંગ અને મારા ખૂબ સારા સંબંધો છે અને મને લાગે છે કે આ સંબંધ એવો જ રહેશે. ચીન તરફથી ઘણી વખત સંપર્ક થયો છે. જોકે, તેમણે એ પ્રશ્ન ટાળ્યો કે તેમણે શી સાથે સીધી વાત કરી હતી કે નહીં.
જ્યારે તેમને પૂછવામાં આવ્યું કે શું શી જિનપિંગે પોતે સંપર્ક કર્યો હતો કે કોઈ અન્ય અધિકારીએ ત્યારે ટ્રમ્પે કહ્યું, મારા માટે પણ આ જ વાત છે. ચીનમાં ઉચ્ચ સ્તરના લોકોએ વાત કરી છે અને જો તમે શીને જાણો છો, તો તમે જાણો છો કે જો તેમના તરફથી કોઈ તેમનો સંપર્ક કરે છે, તો તેઓ તેની જાણ કરે છે.
- ટ્રમ્પ ટેરિફ પર નરમ વલણ, TikTok ડીલ પર વિશ્વાસ
આયાત જકાતને લઈને અમેરિકા અને ચીન વચ્ચે તણાવ ચાલુ છે. અમેરિકાએ ચીની માલ પર 145% સુધીનો સંયુક્ત ટેરિફ લાદ્યો છે, જ્યારે ચીને 125% સુધીનો બદલો લેનારો ટેરિફ લાદ્યો છે. પરંતુ ટ્રમ્પે કહ્યું કે તેઓ આ ટેરિફમાં વધુ વધારો કરવાના પક્ષમાં નથી. તેમણે કહ્યું, “લોકો ચોક્કસ મર્યાદા પછી ખરીદી કરવાનું બંધ કરી દેશે. તેથી શક્ય છે કે હું તેને વધુ ન વધારીશ, પણ ઘટાડીશ.
ટ્રમ્પે વિશ્વાસ વ્યક્ત કર્યો કે બંને દેશો વચ્ચે વેપાર કરાર થઈ શકે છે, જેમાં ટિકટોકના યુએસ યુનિટનું વેચાણ પણ સામેલ હોઈ શકે છે. અમારી પાસે TikTok સોદો તૈયાર છે, પરંતુ તે ચીનની મંજૂરી પર નિર્ભર છે. જ્યાં સુધી તે મામલો ઉકેલાય નહીં ત્યાં સુધી તે સોદો મુલતવી રાખવામાં આવશે એમ ટ્રમ્પે કહ્યું.
તેમણે કહ્યું કે ટિકટોક ડીલ ચીન માટે પણ ફાયદાકારક છે અને તે આ કરારને મંજૂરી આપી શકે છે. આ સોદો વિશ્વની કેટલીક શ્રેષ્ઠ કંપનીઓ સાથે છે, અને મને લાગે છે કે ચીન તેને બનતું જોવા માંગશે. જ્યારે તેમને પૂછવામાં આવ્યું કે શું TikTok ડીલના બદલામાં ટેરિફના મુદ્દા પર કોઈ છૂટછાટ આપી શકાય છે, ત્યારે ટ્રમ્પે કહ્યું, જો કોઈ ડીલ થાય છે, તો અમે TikTok વિશે 5 મિનિટ વાત કરીશું. તેમાં વધુ સમય લાગશે નહીં.
