ભરૂચ: થામ ગામે પશુ ચોરીના કિસ્સામાં પોલીસની નેમ પ્લેટવાળી કાર સાથે બે શખ્સો ઝડપાયા હતા. ઝડપાયેલા બંને શખ્સોમાં એક ભૂતપૂર્વ GRD જવાન અને બીજો હાલમાં TRB જવાન તરીકે નોકરી કરતો હતો.
થામ ગામના સુમિત આહીર જ્યારે તેમના કાકાના દીકરા જીલુ સાથે પશુઓને ચરાવવા બુલેટ ટ્રેનનું કામ ચાલતું હોવાની જગ્યાએ ગયા હતા. ત્યારે વાદળી કલરની કારમાં આવેલા બે શખ્સોએ તેમને જમવાનું પૂછ્યું હતું. સુમિતે ના પાડ્યા બાદ તેઓ ગામ તરફ જવા નીકળ્યા, પરંતુ આ શખ્સોએ તેમની નજર ચૂકવીને એક બકરીના બચ્ચાને કારમાં પાછળની સીટમાં છુપાવી દીધું હતું.
સમગ્ર ઘટના અંગે શંકા જતાં સુમિતે તેમની પાછળ દોટ મૂકી હતી, પરંતુ કાર પગુથણ ગામ તરફ ભાગી ગઈ. સુમિતે ત્રાલસા ગામના ઓળખીતાઓને જાણ કરતાં, સ્થાનિકોએ દયાદરા અને ત્રાલસા ગામ વચ્ચે કારને રોકી લીધી હતી. કારની તપાસ કરતાં ડેશબોર્ડ પર POLICE લખેલું લાલ-વાદળી કલરનું બોર્ડ અને પાછળની સીટમાંથી ચોરાયેલું બકરીનું બચ્ચું મળી આવ્યું હતું.
પોલીસ તપાસમાં આરોપીઓની ઓળખ દિનેશ ગણપતભાઇ મકવાણા અને ભુપેન્દ્ર સુરેશભાઈ વસાવા તરીકે થઈ હતી. દિનેશ મકવાણા અગાઉ GRDમાં અને ભુપેન્દ્ર વસાવા હાલમાં TRBમાં નોકરી કરતો હતો. પોલીસે બંને આરોપીઓને પકડીને વધુ તપાસ આદરી હતી.
