અમેરિકાના રાષ્ટ્રપતિ ડોનાલ્ડ ટ્રમ્પે હમાસને ચેતવણી આપી છે કે તેઓ બધા બંધકોને હમણાં જ મુક્ત કરે, મોડેથી નહીં. તમે જે લોકોને મારી નાખ્યા છે તેમના મૃતદેહ તાત્કાલિક પાછા આપો નહીંતર તમારું કામ પૂરું થઈ જશે. ફક્ત બીમાર અને વિકૃત લોકો જ મૃતદેહો રાખે છે. તમે બીમાર અને વિકૃત છો.
બુધવારે મોડી રાત્રે વ્હાઇટ હાઉસે જણાવ્યું હતું કે ગાઝા બંધકોના મુદ્દા પર કતારની રાજધાની દોહામાં અમેરિકા અને હમાસ વચ્ચે સીધી વાતચીત થઈ હતી. વ્હાઇટ હાઉસના પ્રેસ સેક્રેટરી કેરોલિન લેવિટે કહ્યું હતું કે વાટાઘાટો પહેલા ઇઝરાયલની પણ સલાહ લેવામાં આવી હતી.
ઇઝરાયલી પીએમ બેન્જામિન નેતન્યાહૂના કાર્યાલયે આ વાતચીત વિશે માહિતી આપી. ઇઝરાયલી અધિકારીઓનું કહેવું છે કે ગાઝામાં હજુ પણ લગભગ 24 જીવંત બંધકો છે. આમાં એક અમેરિકન નાગરિક, એડેન એલેક્ઝાન્ડરનો સમાવેશ થાય છે. આ ઉપરાંત ઓછામાં ઓછા 35 અન્ય લોકોનો પણ સમાવેશ થાય છે.
ગાઝાના આતંકવાદી સંગઠન હમાસે 27 ફેબ્રુઆરીની સવારે ચાર ઇઝરાયલી બંધકોના મૃતદેહ પરત કર્યા. તેમણે આ મૃતદેહો રેડ ક્રોસને સોંપી દીધા. બદલામાં ઇઝરાયલ 600 થી વધુ પેલેસ્ટિનિયન કેદીઓને મુક્ત કરી રહ્યું છે જેમાંથી 97 પહેલાથી જ મુક્ત થઈ ચૂક્યા છે.
હમાસ દ્વારા જે બંધકોના મૃતદેહ પરત કરવામાં આવ્યા હતા તેમની ઓળખ ત્સાચી ઇદાન (49), શ્લોમો મંત્ઝુર (85), ઇત્ઝાક એલ્ગરત (68) અને ઓહદ યાહાલોમી (49) તરીકે થઈ હતી. 19 જાન્યુઆરીથી અમલમાં આવેલા ઇઝરાયલ અને હમાસ વચ્ચેના યુદ્ધવિરામના પ્રથમ તબક્કામાં બંધકોની આ છેલ્લી મુક્તિ હતી.
ઇઝરાયલ અને પેલેસ્ટાઇન વચ્ચે કેદીઓના વિનિમય માટેનો આ સોદો ત્રણ તબક્કામાં પૂર્ણ થશે. આમાં 42 દિવસ માટે બંધકોની આપ-લે કરવામાં આવશે. વાસ્તવમાં હમાસ અને ઇઝરાયલ વચ્ચે યુદ્ધવિરામનો પહેલો તબક્કો 1 માર્ચે સમાપ્ત થયો હતો. પ્રથમ તબક્કામાં હમાસે 8 મૃતદેહો સહિત 33 બંધકોને મુક્ત કર્યા. જ્યારે ઇઝરાયલ 2 હજારથી વધુ પેલેસ્ટિનિયન કેદીઓને મુક્ત કરી રહ્યું છે. પરંતુ બંને વચ્ચે યુદ્ધવિરામના બીજા તબક્કાની વાતચીત હજુ શરૂ થઈ નથી.
28 વર્ષ પછી અમેરિકા અને હમાસ વચ્ચે સીધી વાતચીત
બીબીસીના જણાવ્યા અનુસાર આ ચર્ચાના સમાચાર સૌપ્રથમ મીડિયા હાઉસ એક્સિઓસ દ્વારા આપવામાં આવ્યા હતા. તેમાં કહેવામાં આવ્યું છે કે બંને પક્ષો અમેરિકન બંધકોની મુક્તિ તેમજ યુદ્ધનો અંત લાવવા માટે એક વ્યાપક કરાર પર ચર્ચા કરી રહ્યા છે. વ્હાઇટ હાઉસના પ્રેસ સેક્રેટરી લેવિટે જણાવ્યું હતું કે બંધકો માટેના ખાસ દૂત એડમ બોહલરનું કાર્ય અમેરિકન લોકો માટે યોગ્ય કાર્ય કરવાનો એક સારો પ્રયાસ હતો. 1997માં યુનાઇટેડ સ્ટેટ્સે હમાસને વિદેશી આતંકવાદી સંગઠન જાહેર કર્યું. 28 વર્ષમાં આ પહેલી વાર છે જ્યારે અમેરિકા અને હમાસ વચ્ચે સીધી વાતચીત થઈ છે.
