મિડલ ઈસ્ટમાં ચાલી રહેલા તણાવ અને યુદ્ધ વચ્ચે, યુએસ રાષ્ટ્રપતિ ડોનાલ્ડ ટ્રમ્પે એક નિવેદન બહાર પાડ્યું છે જે તેમના અગાઉના કટ્ટર વલણથી અલગ જણાય છે. હાલ ટ્રમ્પના સૂર બદલાયેલા દ્ખાય રહ્યા છે. નવાઈની વાત તો એ છે કે તેમણે ઈરાન સાથે ચાલી રહેલા સંઘર્ષ વચ્ચે, હવે યુદ્ધને બદલે વાતચીત તરફ પોતાનો ઝુકાવ દેખાડયો છે. એક ઇન્ટરવ્યુ દરમિયાન, ટ્રમ્પે ઈરાની લોકોની પ્રશંસા કરી, તેમને મજબૂત અને મુશ્કેલ પરિસ્થિતિઓને સંભાળવા માટે સક્ષમ ગણાવ્યા. તેમણે કહ્યું, “હું ઈરાની લોકોનો આદર કરું છું. તેઓ લડવૈયાઓ કરતાં વધુ સારા વાટાઘાટકાર છે.” આ નિવેદન સ્પષ્ટ કરે છે કે ટ્રમ્પ હવે ઈરાન સાથે સીધા સંપર્કમાં રહેવા તૈયાર છે અને ટૂંક સમયમાં કરાર કરવા સંકેત આપી રહ્યા છે.
આ પહેલા ટ્રમ્પનું વલણ ઈરાન સામે ખૂબ આક્રમક રહ્યું છે. તેમણે સંઘર્ષ દરમિયાન અમેરિકા અને ઈઝરાયલ વચ્ચે સંયુક્ત કાર્યવાહી અંગે વારંવાર કઠોર ભાષાનો ઉપયોગ પણ કર્યો હતો. પરંતુ હવે એવું લાગે છે કે તેઓ યુદ્ધ બંધ કરવા અને રાજકીય ઉકેલ તરફ આગળ વધવા માંગે છે. ઈઝરાયલ વિશે બોલતા, ટ્રમ્પે તેઓને “સારી ટીમ પ્લેયર” ગણાવી અને કહ્યું કે ઈઝરાયલ તેમના નિર્દેશો પર કાર્ય કરશે. તેમણે દાવો કર્યો કે બેન્જામિન નેતન્યાહૂના નેતૃત્વ હેઠળ ઈઝરાયલ, યુએસ રણનીતિનું પાલન કરી રહ્યું છે અને જ્યારે તેઓ યુદ્ધ બંધ કરવાનો નિર્ણય લેશે, ત્યારે ઈઝરાયલ લશ્કરી કાર્યવાહી પણ બંધ કરશે. ટ્રમ્પે વધુમાં જણાવ્યું હતું કે ઇઝરાયલ હંમેશા મજબૂત ભાગીદાર રહ્યું છે અને જો ઉશ્કેરવામાં ન આવે તો શાંતિ જાળવવા માટે તૈયાર છે. જોકે, તેમણે એમ પણ કહ્યું હતું કે જો પરિસ્થિતિ વધુ વણસે છે, તો ઇઝરાયલ પાસે બદલો લેવા સિવાય કોઈ વિકલ્પ રહેશે નહીં. સમગ્ર પરિસ્થિતિનું વિશ્લેષણ કરતા, ટ્રમ્પનું નિવેદન તેમના અગાઉના વલણથી વિપરીત લાગે છે. અગાઉ, તેમણે યુદ્ધના અંતને ઇઝરાયલ સાથે સંયુક્ત રીતે લેવામાં આવેલા નિર્ણય તરીકે રજૂ કર્યો હતો, જ્યારે હવે તેઓ તેમાં મુખ્ય ભૂમિકા ભજવવાનો દાવો કરી રહ્યા છે.
યુદ્ધ 28 ફેબ્રુઆરીએ શરૂ થયું હતું, જ્યારે ટ્રમ્પે ઇરાન સામે “ઓપરેશન એપિક ફ્યુરી” શરૂ કર્યું હતું. આજે આ યુદ્ઘને 33 દિવસથી વધારે સમય થયો છે. આ દરમિયાન ત્રણે દેશોએ ભારે નુકસાની પણ વેઠી છે. ટ્રમ્પના તાજેતરના નિવેદનો સૂચવે છે કે તેઓ હવે યુદ્ધ કરતાં વાતચીતને પ્રાથમિકતા આપે છે. જો આ દિશામાં પ્રગતિ થાય છે, તો મિડલ ઇસ્ટમાં તણાવ ઓછો થવાની શક્યતા છે.
