વડાપ્રધાન નરેન્દ્ર મોદીએ રાજ્યસભામાં મિડલ ઇસ્ટની પરિસ્થિતિ પર સંબોધન કરતા ચેતવણી આપી કે આવનારા સમયમાં મોટું સંકટ આવી શકે છે અને દેશે તેના માટે તૈયાર રહેવું પડશે. તેમણે જણાવ્યું કે મિડલ ઇસ્ટના સંકટને કારણે ભારતમાં સ્થિતિ ચિંતાજનક બની રહી છે, કારણ કે વેપારના માર્ગો પ્રભાવિત થઈ રહ્યા છે અને ગેસ-તેલ જેવી જરૂરી ચીજવસ્તુઓના પુરવઠા પર અસર પડી રહી છે. સંસદના બજેટ સત્રના બીજા તબક્કાના 10માં દિવસે તેમણે આ મુદ્દે વિગતવાર માહિતી આપી અને અગાઉ લોકસભામાં આપેલા પોતાના નિવેદનનો પણ ઉલ્લેખ કર્યો. પીએમ મોદીએ કહ્યું કે આ યુદ્ધના કારણે વિશ્વભરમાં સર્જાયેલી પરિસ્થિતિઓની અસર લાંબા સમય સુધી રહી શકે છે, તેથી દેશે એકજૂટ રહીને તૈયાર રહેવું જરૂરી છે. કોરોનાકાળમાં જેમ એકતા સાથે પડકારોનો સામનો કર્યો હતો, તે જ રીતે હવે પણ દેશવાસીઓએ ધૈર્ય અને શાંતિથી આગળ વધવું પડશે. તેમણે ઉમેર્યું કે સરકાર તેલ-ગેસના સંકટને ટાળવા માટે સતત પ્રયાસ કરી રહી છે અને હવે ભારત 27ના બદલે 41 દેશોમાંથી ઊર્જા આયાત કરી રહ્યું છે.
મિડલ ઇસ્ટમાં વસતા આશરે 1 કરોડ ભારતીયોની સુરક્ષા સરકાર માટે સર્વોચ્ચ પ્રાથમિકતા છે. પીએમએ જણાવ્યું કે યુદ્ધના કારણે ફર્ટિલાઇઝરનો પુરવઠો પણ પ્રભાવિત થઈ રહ્યો છે અને હોર્મુઝ સ્ટ્રેટમાં ભારતીય જહાજો તથા ક્રૂ મેમ્બર્સ ફસાયેલા છે. તેમણે ભારપૂર્વક કહ્યું કે રાજ્યસભાથી શાંતિ અને સંવાદનો સંદેશ વિશ્વ સુધી પહોંચવો જોઈએ. તેઓએ માહિતી આપી કે યુદ્ધ શરૂ થયા બાદથી તેઓ પશ્ચિમ એશિયાના દેશોના નેતાઓ, ગલ્ફ દેશો, અમેરિકા અને ઈઝરાયલ સાથે સતત સંપર્કમાં છે. પીએમ મોદીએ સ્પષ્ટ કર્યું કે હોર્મુઝ સ્ટ્રેટ ખોલવા અંગે ચર્ચા ચાલી રહી છે અને કોમર્શિયલ જહાજો પર હુમલો અસ્વીકાર્ય છે. ભારતે આ સમસ્યાના ઉકેલ માટે સંવાદ અને કૂટનીતિનો માર્ગ સૂચવ્યો છે અને કોઈપણ વ્યક્તિના જીવન પર સંકટ માનવતાના હિતમાં નથી. તેમણે રાજ્યોને પણ અપીલ કરી કે આવા સમયમાં કાળાબજારી અને સંગ્રહખોરી સામે કડક કાર્યવાહી કરવી જોઈએ અને ગરીબ તથા શ્રમિક વર્ગને જરૂરી સહાય મળે તે સુનિશ્ચિત કરવું જોઈએ.
તેમણે જણાવ્યું કે ભારતે છેલ્લા કેટલાક વર્ષોમાં આત્મનિર્ભર બનવા માટે મહત્વપૂર્ણ પગલાં લીધાં છે. રેર અર્થ મિનરલ્સ, હથિયાર ઉત્પાદન અને ઊર્જા ક્ષેત્રમાં દેશની નિર્ભરતા ઘટાડવાનો પ્રયાસ કરવામાં આવ્યો છે. 90 ટકા કરતાં વધુ વૈશ્વિક વેપાર જહાજો દ્વારા થાય છે, જેના કારણે હોર્મુઝ જેવા માર્ગો પર સર્જાતી પરિસ્થિતિ વધુ ગંભીર બની જાય છે. પીએમ મોદીએ દેશને વિશ્વાસ અપાવ્યો કે ભારત પાસે પૂરતો ક્રૂડ ઓઇલ રિઝર્વ છે અને સરકાર સતત પ્રયત્ન કરી રહી છે કે તેલ, ગેસ અને ફર્ટિલાઇઝરથી ભરેલા જહાજો સુરક્ષિત રીતે દેશમાં પહોંચે. છેલ્લા કેટલાક દિવસોમાં અનેક દેશોમાંથી આવી સપ્લાય સફળતાપૂર્વક પહોંચી છે, જોકે તેમણે ચેતવણી આપી કે જો આવી સ્થિતિ લાંબા સમય સુધી રહેશે તો ગંભીર પરિણામો આવી શકે છે.
ભારતીયોની સુરક્ષા અંગે તેમણે જણાવ્યું કે અત્યાર સુધીમાં 3 લાખ 75 હજારથી વધુ ભારતીયોને સુરક્ષિત રીતે પરત લાવવામાં આવ્યા છે, જેમાં ઈરાનમાંથી 1000થી વધુ લોકોનો સમાવેશ થાય છે. કેટલાક ભારતીયોના મોત થયાની પણ તેમણે પુષ્ટિ કરી અને તેમના પરિવારોને સહાય આપવામાં આવી રહી હોવાનું જણાવ્યું. આ દરમિયાન સંરક્ષણ મંત્રી રાજનાથ સિંહે પણ મિડલ ઇસ્ટની પરિસ્થિતિને ચિંતાજનક ગણાવી અને ભારતની રક્ષા તૈયારીઓની સમીક્ષા કરી. તેમણે જણાવ્યું કે આ સંઘર્ષનો ઉકેલ માત્ર વાતચીત અને કૂટનીતિ દ્વારા જ શક્ય છે. પીએમ મોદીએ અંતમાં જણાવ્યું કે આ સંકટ દેશ માટે મોટી પરીક્ષા બનશે અને કેન્દ્ર તથા રાજ્ય સરકારોએ ‘ટીમ ઈન્ડિયા’ બનીને કામ કરવું પડશે.
