બાંગ્લાદેશમાં વિરોધીઓએ ભૂતપૂર્વ વડા પ્રધાન શેખ હસીનાના આવામી લીગ પક્ષના અનેક નેતાઓના ઘરોમાં તોડફોડ કરી અને ઢાકામાં દેશના સ્થાપક નેતા શેખ મુજીબુર રહેમાનના સ્મારકમાં તોડફોડ કરી, તેમના ભીંતચિત્રોને નુકસાન પહોંચાડ્યું. મુજીબુર રહેમાનની પુત્રી અને પદભ્રષ્ટ વડા પ્રધાન હસીના ડિજિટલ માધ્યમથી લોકોને સંબોધિત કરવાના હતા ત્યારે વિરોધીઓએ તોડફોડ અને આગચંપી કરી હતી.
આ દરમિયાન શેખ હસીનાએ પોતાના સંબોધનમાં કહ્યું કે તેઓ ઇમારત તોડી શકે છે, પરંતુ ઇતિહાસને નહીં. તેમણે એ પણ યાદ રાખવું જોઈએ કે ઇતિહાસ તેનો બદલો લે છે. હસીનાના ઘરની બાજુમાં આવેલા પ્લોટ પર આવેલા આવામી લીગ સાથે જોડાયેલા અનેક સંગઠનોના કાર્યાલયો પણ તોડી પાડવામાં આવ્યા છે. વિરોધીઓએ ધનમંડીમાં રોડ 5 પર સ્થિત હસીનાના સ્વર્ગસ્થ પતિ વાજિદ મિયાના નિવાસસ્થાન ‘સુધા સદન’ને પણ આગ ચાંપી દીધી. ગયા વર્ષે 5 ઓગસ્ટે વડા પ્રધાન પદ પરથી રાજીનામું આપ્યા બાદ હસીનાએ દેશ છોડી દીધો ત્યારથી આ નિવાસસ્થાન ખાલી પડ્યું હતું.
ઢાકાની ઘટના બાદ બાંગ્લાદેશના અન્ય ભાગોમાં પણ વિરોધીઓ તોડફોડ અને આગચંપીમાં વ્યસ્ત જોવા મળ્યા હતા. અહેવાલો અનુસાર ખુલના શહેરમાં હસીનાના સંબંધીઓ શેખ હેલાલ ઉદ્દીન અને શેખ સલાઉદ્દીન જ્વેલના ઘરોમાં પણ પ્રદર્શનકારીઓએ તોડફોડ કરી હતી. આ દરમિયાન તેઓએ “દિલ્હી કે ઢાકા-ઢાકા, ઢાકા” અને “મુજીબવાદ મુર્દાબાદ” જેવા નારા લગાવ્યા. શેખ હલાલ બાગરહાટ-1 થી સાંસદ રહી ચૂક્યા છે, જ્યારે શેખ સલાઉદ્દીન ખુલના-2 થી સાંસદ રહી ચૂક્યા છે.
વિરોધીઓએ ઢાકા યુનિવર્સિટીના “બંગબંધુ શેખ મુજીબુર રહેમાન હોલ” પરથી રહેમાનનું નામ ભૂંસી નાખ્યું. ‘પ્રોથોમ આલો’ અખબારના અહેવાલ મુજબ ચટગાંવમાં વિરોધીઓએ હસીનાના ભાષણ સામે મશાલ સરઘસ કાઢ્યું. મૈમનસિંઘમાં, વિરોધીઓએ સર્કિટ હાઉસ મેદાન પાસે ‘બંગબંધુ’ મુજીબુર રહેમાનના ચિત્રને હથોડાથી નુકસાન પહોંચાડ્યું. રંગપુરમાં, ગુરુવારે બેગમ રુકૈયા યુનિવર્સિટીમાં વિરોધીઓએ મુજીબુર રહેમાનના ચિત્રને બગાડ્યું હતું.
