ગાંધીનગર : રાજયમાં દક્ષિણ – પશ્વિમ દિશામાં પ્રતિ કલાકના 9.3 કિમીની ઝડપે પવન ફૂંકાઈ રહ્યો છે. બીજી તરફ રાજયમાં કંડલા એરપોર્ટ પર ગરમીનો પારો 46 ડિગ્રી નોંધાયો હતો. જયારે આગામી 72 કલાક દરમિયાન ગુજરાતમાં ગરમીના પ્ર્માણમાં 2થી 4 ડિગ્રીની રાહત મળે તેવી સંભાવના રહેલી છે. 72 કલાક પછી ગરમીના પ્રમાણમાં 2થી 3 ડિગ્રીનો વધારો થશે. 72 કલાક દરમિયાન ગુજરાતમાં ગરમીનો પારો 40થી 45 ડિગ્રી વચ્ચે રહેશે.
હવામાન વિભાગના વૈજ્ઞાનિકોના જણાવ્યા અનુસાર રાજયમાં આજે પોરબંદર, કચ્છ, રાજકોટ, જુનાગઢ, બનાસકાંઠા, ગાંધીનગર, આણંદ અને સુરતમાં હીટ વેવની અસર જોવા મળી હતી. કચ્છમાં તો રાત્રે પણ તાપમાનનો પારો ઊંચે ગયો હતો. જયારે આગામી 24 કલાક દરમિયાન રાજયમાં રાજકોટ અને કચ્છમાં હિટ વેવનું ઓરેન્જ એલર્ટ જારી કરાયુ છે. જયારે મોરબી બનાસકાંઠા અને સાબરકાંઠામાં હિટ વેવનું યલો એલર્ટ જારી કરાયુ છે. છેલ્લા એક સપ્તાહથી રાજયમાં કાતિલ ગરમીના કારણે જન જીવનને અસર થવા પામી છે. પશુ – પંખીઓને પણ ગરમીની અસર થઈ છે. બપોરના સમયે મહાનગરોમાં ટ્રાફિક સાવ નહીંવત જોવા મળી રહ્યો છે. કામ વિના લોકો ઘરની બહાર નીકળવાનું ટાળી રહ્યાં છે.
હવામાન વિભાગના જણાવ્યા અનુસાર રાજયના અન્ય શહેરો પૈકી અમદાવાદમાં 43 ડિ.સે., ડીસામાં 44 ડિ.સે., ગાંધીનગરમાં 43 ડિ.સે., વલ્લભ વિદ્યાનગરમાં 43 ડિ.સે.,વડોદરામાં 43 ડિ.સે., સુરતમાં 41 ડિ.સે., ભૂજમાં 43 ડિ.સે., નલિયામાં 38 ડિ.સે., કંડલા પોર્ટમાં 41 ડિ.સે., કંડલા એરપોર્ટ પર 46 ડિ.સે., અમરેલીમાં 44 ડિ.સે.,ભાવનગરમાં 41 ડિ.સે.,રાજકોટમાં 45 ડિ.સે.,સુરેન્દ્રનગમાં 44 ડિ.સે., મહુવા 38 ડિ.સે., અને કેશોદમાં 44 ડિ.સે. જેટલું મહત્તમ તાપમાન નોંધાવવા પામ્યુ હતું.
