શનિવારે સાંજે તમિલનાડુના કરુરમાં અભિનેતા વિજયની રેલીમાં ભાગદોડ મચી ગઈ. મુખ્યમંત્રી સ્ટાલિનના જણાવ્યા અનુસાર, આ અકસ્માતમાં 16 મહિલાઓ અને 10 બાળકો સહિત 40 લોકોના મોત થયા. 51 લોકો ICUમાં છે. મૃત્યુઆંક વધુ વધવાની આશંકા છે.
તમિલનાડુ પોલીસના જણાવ્યા અનુસાર વિજયની રેલી માટે 10,000 લોકોને મંજૂરી આપવામાં આવી હતી. જોકે 120,000 ચોરસ ફૂટ વિસ્તારમાં 50,000 થી વધુ લોકો એકઠા થયા હતા. અભિનેતા છ કલાક મોડા પહોંચ્યા હતા. રેલી દરમિયાન વિજયને જાણ કરવામાં આવી કે 9 વર્ષની બાળકી ગુમ થઈ ગઈ છે. તેમણે સ્ટેજ પરથી તેને શોધવા માટે અપીલ કરી, જેના કારણે ભાગદોડ મચી ગઈ હતી.
દુર્ઘટના મામલે તમિલનાડુના મુખ્યમંત્રી એમકે સ્ટાલિને રાત્રે એક ઉચ્ચ સ્તરીય બેઠક યોજી હતી અને મોડી રાત્રે કરુર પહોંચ્યા હતા. સ્ટાલિને મૃતકોને શ્રદ્ધાંજલિ આપવા માટે હોસ્પિટલની મુલાકાત લીધી હતી અને ઘાયલોને મળ્યા હતા. દરમિયાન ગૃહ મંત્રાલયે રાજ્ય સરકાર પાસેથી રિપોર્ટ માંગ્યો છે. ઘટના બાદ વિજય ઘાયલોને મળ્યા ન હતા. તેઓ ચાર્ટર્ડ ફ્લાઇટ દ્વારા સીધા ચેન્નાઈ ગયા હતા.
અકસ્માત બાદ અભિનેતા વિજય કરુરથી સીધા ત્રિચી એરપોર્ટ ગયા અને ત્યાંથી ચેન્નાઈ જવા રવાના થયા. તેઓ ઘાયલોને મળ્યા ન હતા કે ન તો કોઈ જાહેર શોક વ્યક્ત કર્યો. જોકે તેમણે X પર લખ્યું, “મારું હૃદય તૂટી ગયું છે. મને ખૂબ જ દુઃખ થાય છે. હું કરુરમાં જીવ ગુમાવનારાઓના પરિવારો પ્રત્યે મારી સંવેદના વ્યક્ત કરું છું અને ઘાયલોના ઝડપથી સ્વસ્થ થવા માટે પ્રાર્થના કરું છું.”
આ કારણે થઈ ભાગદોડ
અભિનેતા વિજય કરુરમાં નિર્ધારિત સમય કરતાં લગભગ છ કલાક મોડા પહોંચ્યા, જેના કારણે તેમને જોવા માટે મોટી ભીડ એકઠી થઈ ગઈ. સાંજે લગભગ 7:45 વાગ્યે, કેટલાક લોકો વિજયની બસ તરફ આગળ વધવા લાગ્યા, જેના કારણે ભાગદોડ મચી ગઈ. ગરમી અને ભીડને કારણે ઘણા લોકો બેભાન થઈ ગયા અને શ્વાસ લેવામાં તકલીફ પડી. ભાગદોડમાં ઘણા બાળકો તેમના પરિવારોથી અલગ થઈ ગયા, અને અન્ય લોકો ભીડથી કચડાઈ ગયા. વિજયના સ્ટેજ પાસે વધતી ભીડને નિયંત્રિત કરવા માટે પોલીસ કે સ્વયંસેવકો હાજર નહોતા. પરિણામે ભીડ બેકાબૂ થઈ ગઈ. વહીવટીતંત્રે ૩૦,૦૦૦ લોકોના આવવાની અપેક્ષા રાખી હતી પરંતુ ૬૦,૦૦૦ થી વધુ લોકો પહોંચ્યા. બમણા લોકોને સંભાળવા માટે વ્યવસ્થા નહોતી.
