આવતીકાલે રવિવારે તા. 21 સપ્ટેમ્બર 2025 એશિયા કપમાં ભારત અને પાકિસ્તાન વચ્ચે રમાનારી સુપર ફોર મેચ પર બધાની નજર છે. આ મેચ ફક્ત ક્રિકેટ વિશે નહીં પણ લાગણીઓ અને દબાણ વિશે પણ હશે. આ મેચ દુબઈના દુબઈ ઇન્ટરનેશનલ ક્રિકેટ સ્ટેડિયમ ખાતે રાત્રે 8:00 વાગ્યે શરૂ થશે. જોકે, આ મેચ પહેલાં ભારતીય ટીમના કેપ્ટન સૂર્યાએ ખેલાડીઓને એક વિચિત્ર સલાહ આપી છે.
આ મોટી મેચ પહેલા ભારતીય કેપ્ટન સૂર્યકુમાર યાદવે એક પ્રેસ કોન્ફરન્સમાં હાજરી આપી હતી. પ્રેસ કોન્ફરન્સ દરમિયાન એક પત્રકારે સૂર્યાને પૂછ્યું કે તેઓ ભારત-પાકિસ્તાન મેચની આસપાસના બહારના અવાજને કેવી રીતે હેન્ડલ કરે છે. ભારતીય કેપ્ટને રમુજી જવાબ આપ્યો. તેમણે કહ્યું કે મેચ પહેલા તમારો ફોન બંધ કરીને સૂઈ જવું શ્રેષ્ઠ છે.
સૂર્યકુમાર યાદવે પત્રકાર પરિષદમાં કહ્યું, “તમારો રૂમ બંધ કરો, તમારો ફોન બંધ કરો અને સૂઈ જાઓ. મને લાગે છે કે તે શ્રેષ્ઠ રસ્તો છે. તે કહેવું સહેલું છે, પરંતુ ક્યારેક તે મુશ્કેલ હોય છે કારણ કે તમે મિત્રોને મળો છો, બહાર ડિનર માટે જાઓ છો, અને ઘણા ખેલાડીઓ એવા છે જે આ બધું માણે છે. તેથી સંપૂર્ણપણે દૂર રહેવું અશક્ય છે.”
ભારતીય કેપ્ટને સ્પષ્ટપણે કહ્યું કે તે દરેક ખેલાડી પર આધાર રાખે છે કે તેઓ શું સાંભળવા માંગે છે અને શું અવગણવા માંગે છે. તેમણે કહ્યું, તમે શું સાંભળવા માંગો છો અને તમે શું ધ્યાનમાં રાખવા માંગો છો તે તમારા પર નિર્ભર છે.
મેં ખેલાડીઓને કહ્યું છે કે જો આપણે આ ટુર્નામેન્ટ અને તે પછી સારા પરિણામો ઇચ્છતા હોઈએ છીએ, તો આપણે બહારના અવાજને અવગણવાની જરૂર છે અને ફક્ત તે જ અપનાવવાની જરૂર છે જે આપણા માટે કામ કરે છે. હું એમ નથી કહેતો કે આપણે અવાજને સંપૂર્ણપણે બંધ કરી દેવો જોઈએ. આપણે ચોક્કસપણે સારી સલાહ લેવી જોઈએ, કારણ કે ક્યારેક આપણને એવી ટિપ્સ મળે છે જે મેદાન પર ઉપયોગી થઈ શકે છે.”
ટીમનું વાતાવરણ પોઝિટિવઃ સૂર્ય
સૂર્યકુમાર યાદવે એમ પણ કહ્યું કે ટીમનું વાતાવરણ સંપૂર્ણપણે સકારાત્મક છે અને આ મોટી મેચ પહેલા ખેલાડીઓ આત્મવિશ્વાસથી ભરપૂર છે. તેમણે કહ્યું, મને લાગે છે કે દરેક વ્યક્તિ યોગ્ય માનસિકતા ધરાવે છે. ખેલાડીઓ જાણે છે કે આ ફક્ત એક મેચ નથી પરંતુ એક મોટી ટુર્નામેન્ટમાં આગળ વધવાની તક પણ છે. દરેક વ્યક્તિ સારું પ્રદર્શન કરવા પર ધ્યાન કેન્દ્રિત કરે છે.
નો હેન્ડશેક કોન્ટ્રવર્સી વચ્ચે રવિવારે મેચ રમાશે
એશિયા કપ 2025 માં ભારત અને પાકિસ્તાન વચ્ચેની ગ્રુપ-સ્ટેજ મેચ ખૂબ જ ચર્ચામાં રહી છે. મેચ પછી ભારતીય ખેલાડીઓએ પાકિસ્તાની ટીમ સાથે હાથ મિલાવવાનો ઇનકાર કર્યો. આનાથી પાકિસ્તાની ટીમ નારાજ થઈ અને તેમણે એવોર્ડ સમારોહનો બહિષ્કાર કર્યો.
પાકિસ્તાન ક્રિકેટ બોર્ડ (PCB) એ મેચ રેફરી એન્ડી પાયકોટ અને ભારતીય ટીમ વિરુદ્ધ આંતરરાષ્ટ્રીય ક્રિકેટ કાઉન્સિલ (ICC) માં ઔપચારિક ફરિયાદ પણ નોંધાવી. જોકે, ICC એ પાકિસ્તાનની દલીલોને ફગાવી દીધી.
