નવી દિલ્હીઃ (New Delhi) AAPના રાજ્યસભા સાંસદ સ્વાતિ માલીવાલ (Swati Malival) પર હુમલાના મામલાની તપાસ કરવા દિલ્હી પોલીસ સીએમ હાઉસ પહોંચી છે. પોલીસે મારામારીના સમયના સીસીટીવી ફૂટેજ અને ડીવીઆર એકત્ર કર્યા છે. હુમલાના આરોપી અને મુખ્યમંત્રી અરવિંદ કેજરીવાલના અંગત સહાયક વિભવ કુમારને 5 દિવસના પોલીસ રિમાન્ડ પર મોકલવામાં આવ્યો છે. દિલ્હી પોલીસે વિભવની 7 દિવસની કસ્ટડી માંગી હતી. વિભવને 23 મેના રોજ કોર્ટમાં રજૂ કરવામાં આવશે.
AAP સાંસદ સ્વાતિ માલીવાલ પર હુમલાના મામલામાં દિલ્હી પોલીસની તપાસ ચાલી રહી છે. આ મામલે વધુ તપાસ માટે રવિવારે બપોરે દિલ્હી પોલીસ સીએમ આવાસ પર પહોંચી હતી. પહેલા એવી અટકળો હતી કે દિલ્હી પોલીસ બિભવ કુમારને પણ તેમની સાથે સીએમ આવાસ પર લઈ જશે પરંતુ જ્યારે દિલ્હી પોલીસની ટીમ સીએમ આવાસ પર પહોંચી તો બિભવ કુમાર તેમની સાથે ત્યાં હાજર નહોતો. પોલીસની ટીમ સીએમ આવાસ પર ગઈ હતી અને અંદરથી કેટલીક મહત્વની વસ્તુઓ સાથે લઈ ગઈ હતી.
તમને જણાવી દઈએ કે દિલ્હી પોલીસ સ્વાતિ માલીવાલ કેસની સતત તપાસ કરી રહી છે. ગઈકાલે શનિવારે દિલ્હી પોલીસે આ મામલામાં આરોપી અરવિંદ કેજરીવાલના પીએની સીએમ આવાસથી ધરપકડ કરી હતી. તેની ધરપકડ બાદ દિલ્હી પોલીસ સતત બિભવ કુમારની પૂછપરછ કરવાનો પ્રયાસ કરી રહી છે પરંતુ પોલીસનું કહેવું છે કે બિભવ કુમાર પૂછપરછમાં સહકાર આપી રહ્યો નથી અને તે માત્ર હા કે નામાં જ જવાબ આપી રહ્યો છે. આ સિવાય દિલ્હી પોલીસને પેન ડ્રાઈવમાં એક સીસીટીવી ક્લિપ સોંપવામાં આવી છે જે કોરી નીકળી છે.
પૂરતી માહિતી ન મળતાં દિલ્હી પોલીસની ટીમ આજે ફરી સીએમ હાઉસ પહોંચી અને તેમની તપાસ આગળ ધપાવી હતી. બિભવ કુમાર અહીં દિલ્હી પોલીસ સાથે હાજર ન હતા. દિલ્હી પોલીસ સીધી સીએમ આવાસની અંદર પહોંચી અને થોડી વાર પછી સામાન લઈને બહાર આવી હતી. દિલ્હી પોલીસ સીએમ આવાસમાંથી સીસીટીવી ડીવીઆર, પ્રિન્ટર અને લેપટોપ જપ્ત કરીને પોતાની સાથે લઈ ગઈ છે. આ સાથે દિલ્હી પોલીસ એવિડન્સ બોક્સ પણ સાથે લઈ ગઈ હતી. આપને જણાવી દઈએ કે AAP સાંસદ સ્વાતિ માલીવાલે બિભવ કુમાર પર મારપીટનો આરોપ લગાવ્યો હતો જે બાદ પોલીસ આ મામલાની તપાસ કરી રહી છે.
