નવી દિલ્હી: ટી-20 વર્લ્ડકપની બાર્બાડોસ ખાતે સાઉથ આફ્રિકા સામે તા. 29 જૂનના રોજ રમાયેલી ફાઈનલ મેચની છેલ્લી ઓવરના પહેલાં બોલ પર મિલરનો બાઉન્ડ્રી પર સૂર્યકુમાર યાદવે પકડેલા કેચ પર વિવાદ ઉઠ્યો છે. સૂર્યકુમારનો પગ બાઉન્ડ્રી લાઈનને ટચ થઈ ગયો હતો તેવો વીડિયો વાયરલ થઈ રહ્યો છે, ત્યારે હવે ખુદ સૂર્યકુમાર યાદવે આ મામલે જવાબ આપ્યો છે.
ભારતે T20 વર્લ્ડ કપ 2024 જીતી લીધો છે. જો કે આ જીતમાં ભારતીય ફાસ્ટ બોલરોના યોગદાન કરતાં પણ વધુ યોગદાન 20મી ઓવરમાં સૂર્યકુમાર યાદવે લીધેલા ડેવિડ મિલરના કેચનું હતું. સૂર્યાએ રમતની જાગૃતિ બતાવી અને લોંગ ઓફ પર 20મી ઓવરના પહેલા બોલ પર બાઉન્ડ્રી પર એક ઉત્તમ કેચ લીધો હતો.
આ કેચની દુનિયાભરમાં પ્રશંસા થઈ રહી છે. જો કે, કેટલાક લોકો એવા છે જે તેના કેચને ખોટો સાબિત કરવાનો પ્રયાસ કરી રહ્યા છે અને કહી રહ્યા છે કે તે કેચ નહીં પરંતુ સિક્સર હતો. સૂર્યાએ આ વિવાદ અને તે કેચ પર નિવેદન આપ્યું છે.
કેચ વિશે પૂછવામાં આવતાં સૂર્યાએ કહ્યું, અમારા ફિલ્ડિંગ કોચ દિલીપ સર કહે છે કે સૂર્યા, વિરાટ, અક્ષર અને જાડેજાએ હંમેશા હોટસ્પોટ એટલે કે જ્યાં બોલ વધુ જતો હોય ત્યાં ફિલ્ડિંગ કરવી જોઈએ. મેં જે કેચ લીધો, તેમાં હવાની પણ મદદ મળી. મેં આવા કેચ પકડવાની પ્રેક્ટિસ કરી છે. હું ગઈકાલે લોંગ ઓફથી થોડો વાઈડ ઉભો હતો. કારણ કે હાર્દિક અને રોહિત ભાઈએ વાઈડ યોર્કર અનુસાર ફિલ્ડિંગ ગોઠવી હતી. પરંતુ મિલરે શોટ સીધો માર્યો હતો. મારે વધારે અંતર કાપવું પડ્યું પરંતુ હું મારા મનથી સ્પષ્ટ હતો કે મારે કોઈપણ રીતે આ કેચ પકડવો છે.
સૂર્યએ વધુમાં કહ્યું કે, રોહિત ભાઈ સામાન્ય રીતે ક્યારેય લોંગ-ઓન પર ઊભા રહેતા નથી, પરંતુ તે સમયે તેઓ ત્યાં હતા. તેથી જ્યારે બોલ આવી રહ્યો હતો, ત્યારે એક સેકન્ડ માટે અમે એકબીજાને જોયા. હું દોડ્યો અને મારો હેતુ બોલને પકડવાનો હતો, જો રોહિત નજીક હોત તો મેં તેની તરફ બોલ ફેંક્યો હોત, પરંતુ તે નજીક ન હતો. એ ચાર-પાંચ સેકન્ડમાં જે કંઈ બન્યું, હું તેનું વર્ણન કરી શકતો નથી. આ માટે મને જેટલો પ્રતિસાદ મળી રહ્યો છે, લોકો ફોન કરી રહ્યા છે, મેસેજ કરી રહ્યા છે, મારા ફોન પર એક હજારથી વધુ મેસેજ છે. આ કેચ આખા સોશિયલ મીડિયા પર વાયરલ થયો છે. હું આભારી છું કે હું રમતની તે પાંચ સેકન્ડમાં ત્યાં હતો.
મેં બાઉન્ડ્રી રોપને સ્પર્શ કર્યો ન હતો- સૂર્યા
જ્યારે મેં બોલને બહાર ધકેલ્યો અને કેચ લીધો ત્યારે મને ખબર હતી કે મેં દોરડાને સ્પર્શ કર્યો નથી. હું માત્ર એક જ બાબતમાં સાવધ હતો કે જ્યારે હું બોલને પાછો પકડું ત્યારે મારા પગ દોરડાને સ્પર્શે નહીં. હું જાણતો હતો કે તે એક સંપૂર્ણ કેચ હતો. અંતે કંઈ પણ થઈ શક્યું હોત. જો બોલ સિક્સ માટે ગયો હોત, તો સમીકરણ પાંચ બોલમાં 10 રન હોત. અમે હજી પણ જીતી શક્યા હોત, પરંતુ પછી માર્જિન અલગ હોત.
સૂર્યા ફિલ્ડિંગની પ્રેક્ટિસ કેવી રીતે કરે છે?
સૂર્યાએ કહ્યું અમે મેચના એક દિવસ પહેલા ટ્રેનિંગ સેશન રાખીએ છીએ. આ 10-12 મિનિટમાં અમારી પાસે 10 થી વધુ ઊંચા કેચ, ફ્લેટ કેચ, ડાયરેક્ટ હિટ, સ્લિપ કેચની પ્રેક્ટિસ કરીએ છીએ. તે એક દિવસની પ્રેક્ટિસ નથી. તમામ સિરિઝ દરમિયાન આવી પ્રેક્ટિસ કરું છું.
ફાઇનલમાં પકડાયેલો કેચ વર્ષોની મહેનતનું પુરસ્કાર હતો. શ્રેષ્ઠ ફિલ્ડર મેડલની રજૂઆત એ સુનિશ્ચિત કર્યું છે કે દરેક વ્યક્તિ મેદાન પર કંઈક વધારાનું કરવા માંગે છે, પછી ભલે તે એક રન બચાવવાનો હોય કે કેચ. આ એક સારી પહેલ છે. જે લોકો મેડલ આપે છે તે અમને વધુ પ્રેરણા આપે છે.
વિરાટને લઈને સૂર્યાનું નિવેદન
વિરાટ કોહલી વિશે પૂછવામાં આવતા સૂર્યાએ કહ્યું- તે મેચમાં એનર્જીનો પાવરહાઉસ છે. જો તમે જોશો તો ફાઈનલ સુધી તે જે રીતે ઈચ્છતો હતો તે રીતે પ્રદર્શન થઈ રહ્યું ન હતું પરંતુ તેણે જે રીતે મેદાન પર પોતાની જાતને સંભાળ્યો તે જોવું એ અદ્ભુત અનુભવ હતો. તે ટીમ ગેટ-ટુગેધર, પ્રેક્ટિસ સેશન, દરેક વસ્તુમાં ભાગ લેતો હતો. જ્યારે મેં 2022 માં મારી કારકિર્દીની શરૂઆત કરી, ત્યારે દ્વિપક્ષીય શ્રેણી અને પછી વર્લ્ડ કપ દરમિયાન મેં મોટાભાગે તેમની સાથે બેટિંગ કરી.
