નવી દિલ્હી: ભારતના પૂર્વ ક્રિકેટર (Indian Former cricketer) સુરેશ રૈનાએ (Suresh Raina) ક્રિકેટના તમામ ફોર્મેટમાંથી નિવૃત્તિ (Retired) લેવાની જાહેરાત કરી છે. એટલે કે હવે સુરેશ રૈનાએ ક્રિકેટમાંથી સંપૂર્ણપણે નિવૃત્તિ લઈ લીધી છે. મિસ્ટર આઈપીએલ (IPL) તરીકે જાણીતા રૈનાએ આજે એટલે કે મંગળવારે ટ્વિટ કરીને પોતાના નિર્ણયની જાણકારી આપી હતી. તેણે પોતાના ટ્વીટમાં લખ્યું છે કે, “આપણા દેશ અને રાજ્ય યુપીનું પ્રતિનિધિત્વ કરવું ખૂબ જ સન્માનની વાત છે. હું ક્રિકેટના તમામ ફોર્મેટમાંથી નિવૃત્તિ જાહેર કરવા માંગુ છું. હું બીસીસીઆઈ, યુપી ક્રિકેટ એસોસિએશન, ચેન્નાઈ સુપર કિંગ્સ અને રાજીવ શુક્લા સર અને મારા તમામ ચાહકોનો આભાર માનું છું.”
આ પહેલા સુરેશ રૈનાએ 15 ઓગસ્ટ 2020ના રોજ આંતરરાષ્ટ્રીય ક્રિકેટમાંથી નિવૃત્તિ લીધી હતી. પરંતુ તેણે ઉત્તર પ્રદેશ માટે સ્થાનિક ક્રિકેટ રમવાનું ચાલુ રાખ્યું. ઉલ્લેખનીય છે કે રૈનાએ સ્થાનિક ક્રિકેટમાં ખાસ કરીને આઈપીએલમાં ચેન્નાઈ સુપર કિંગ્સ તરફથી રમી રહ્યો હતો. પરંતુ છેલ્લી સિઝનમાં, CSKએ તેને મેગા ઓક્શન પહેલા રિલીઝ કર્યો હતો અને પછી હરાજીમાં પણ તેના માટે બોલી લગાવી ન હતી. આ પછી રૈના પહેલીવાર IPLમાં અનસોલ્ડ રહ્યો.
લિજેન્ડ્સ ક્રિકેટ લીગ રમી શકે છે
રૈનાના રિપોર્ટ્સમાં કહેવામાં આવી રહ્યું છે કે સુરેશ રૈના હવે વિદેશી લીગમાં પણ રમતા જોવા મળી શકે છે. તેણે બીસીસીઆઈ પાસેથી એનઓસી માંગી છે. આ પહેલા પૂર્વ ભારતીય ક્રિકેટર યુવરાજ સિંહ પણ વિદેશી લીગમાં રમી ચૂક્યો છે. એવું પણ કહેવામાં આવી રહ્યું છે કે સુરેશ રૈના પણ આ વર્ષે યોજાનારી લિજેન્ડ્સ ક્રિકેટ લીગમાં રમતા જોવા મળી શકે છે.
સુરેશ રૈનાની આંતરરાષ્ટ્રીય ક્રિકેટ કારકિર્દી
સુરેશ રૈનાએ 15 ઓગસ્ટ 2020ના રોજ આંતરરાષ્ટ્રીય ક્રિકેટમાંથી નિવૃત્તિ લીધી. રૈનાએ 18 ટેસ્ટ મેચમાં સદીની મદદથી 768 રન બનાવ્યા હતા. આ મિડલ ઓર્ડર બેટ્સમેને ટીમ ઈન્ડિયા માટે 226 વન-ડે ઈન્ટરનેશનલ મેચોમાં ભાગ લીધો હતો. આ દરમિયાન રૈનાએ 5615 રન બનાવ્યા જેમાં પાંચ સદી સામેલ છે. તે જ સમયે, 78 T20 આંતરરાષ્ટ્રીય મેચોમાં, રૈનાના નામે 1604 રન છે.
