નવસારી: (Navsari) માણેકપોર ગામ પાસે બાઈક (Bike) સ્લીપ થતા સુરતના લીંબાયતના યુવાનનું મોત નીપજ્યાનો બનાવ મરોલી પોલીસ મથકે (Police Station) નોંધાયો છે. હોસ્પિટલમાં સારવાર દરમિયાન યુવાનનું મોત નીપજ્યું હતું.
મળતી માહિતી મુજબ, સુરત લીંબાયત મદીના મસ્જીદ પાસે પદમાવતી સોસાયટીમાં સિદ્દીક અનિક અહેમદ (ઉ.વ. 22) તેના પરિવાર સાથે રહેતો હતો. ગત 26મીએ સિદ્દીક તેના મિત્ર સાથે બાઈક લઈને નવસારી આવ્યો હતો. દરમિયાન પરત સુરત જતી વેળા નવસારીથી સચિન જતા રોડ ઉપર જલાલપોરના માણેકપોર ગામના ક્રિકેટ મેદાનની સામેથી પસાર થઈ રહ્યો હતો. ત્યારે વળાંક પર બાઈક સ્લીપ થતા સિદ્દીકને માથાના ભાગે શરીરે ગંભીર ઈજાઓ થઈ હતી.
ઘટના સ્થળે ભેગા થયેલા લોકોએ તેને તાત્કાલિક સારવાર અર્થે નવસારી સિવિલ હોસ્પિટલમાં ખસેડયો હતો. જ્યાં તેને વધુ સારવારની જરૂરિયાત જણાતા પરિવારજનોએ સુરત નવી સિવિલ હોસ્પિટલમાં રીફર કર્યો હતો. પરંતુ હોસ્પિટલમાં સારવાર દરમિયાન સિદ્દીકનું મોત નીપજ્યું હતું. આ બનાવ અંગે હોસ્પિટલના ડોકટરે ખટોદરા પોલીસ મથકે જાણ કરતા પોલીસે અકસ્માત મોતનો ગુનો નોંધી કાગળો મરોલી પોલીસ મથકે મોકલતા આગળની તપાસ પી.એસ.આઈ. એમ.પી. સોલંકીએ હાથ ધરી છે.
વલસાડ અભયમે વ્યસની પતિ પાસેથી 4 વર્ષના બાળકનો કબજો લઈ માતા સાથે મિલન કરાવ્યું
વલસાડ : વલસાડ તાલુકાના એક ગામમાં રહેતી પરિણીતાનો પતિ સાથે ઝઘડો થતા બાળક સાથે સગાસંબંધીને ત્યાં રહેતી હતી. પતિ બાળકને પરત મૂકી જવા માટે જણાવી બાળક લઈ ગયો હતો પરંતુ મોડી રાત્રિ સુધી બાળક પરત મૂકી નહીં જતા પતિને બાળક પરત મૂકી જવા જણાવ્યું હતું, પરંતુ પતિએ ધમકી આપતા 181 અભયમ ટીમની મદદ માંગી હતી. જેથી વલસાડ 181 ટીમ ઘટના સ્થળે પહોંચી પરિણીતા સાથે વાતચીત કરતા જાણવા મળ્યું કે, પરિણીતાએ આશરે પાંચ વર્ષ પહેલા પ્રેમલગ્ન કર્યા હતા. લગ્નના થોડા સમય પછી પતિ વ્યસન કરીને ખૂબ જ મારઝુડ કરતો અને ખોટી શંકા કરી શારીરિક અને માનસિક ત્રાસ પણ આપતો હતો.
ઘરમાં જરૂરિયાતની ચીજવસ્તુઓ પણ લાવી આપતો નહીં હોવાથી ઝઘડા થતા હતા. પરિણીતાના માતા-પિતા હયાત નહીં હોવાથી મોટી બહેનના ઘરે રહે છે અને ત્યાંથી કંપનીમાં નોકરી કરવા જાય છે. પતિ બાળકને થોડા સમય પછી પરત મૂકી જઈશ એમ કહી લઈ ગયો હતો, પરંતુ રાત્રિનો સમય થઈ જવા છતાં પરત નહીં મૂકી જતા પરિણીતાએ પતિને બાળક મૂકી જવા કહ્યું હતુ. પતિએ અપશબ્દ બોલી બાળકને કોઈપણ હાલતમાં પરત નહીં મૂકી જવા જણાવી ધમકી આપી હતી. જેથી બાળકનો કબજો મેળવવા ૧૮૧ પર ફોન કરી અભયમ ટીમની મદદ માંગી હતી. અભયમ ટીમે પતિને કાયદાકીય સલાહ સૂચન આપી અને સમજાવવાની કોશિષ કરી જણાવ્યું કે, બાળક માત્ર ૪ વર્ષનું છે અને તમે વ્યસન કરેલી હાલતમાં હોવાથી બાળકની સાર સંભાળ રાખી નહીં શકો જેથી બાળકને માતાને સોંપી દેવા જણાવ્યું હતું. ઘણી સમજાવટ બાદ પતિ બાળકને પરત આપવા રાજી થતા પરિણીતાને બાળકનો કબજો મળ્યો હતો. જેથી પરિણીતા અને તેમના સગા સંબંધીઓએ 181 ટીમનો આભાર માન્યો હતો.
