સુરત: (Surat) કામરેજના (Kamrej) વાવ ખાતે આવેલા વશિષ્ઠ વિદ્યાલયના તેજસ્વી વિદ્યાર્થીઓએ JEE ADVANCE – 2023માં ઉત્કૃષ્ઠ પરિણામ પ્રાપ્ત કરીને સુરત જિલ્લાનું ગૌરવ વધારીને ડંકો વગાડ્યો છે. તાજેતરમાં JEE ADVANCEનું પરિણામ જાહેર થયું. જેમાં શાળાના તેજસ્વી વિદ્યાર્થી રાઠોડ ક્રિશ દીપકકુમારે ઓલઈન્ડિયામાં 44મો રેન્ક મેળવ્યો છે. ઉપરાંત અણઘણ ઓમને AIR. 454, કાછડીયા ઋત્વિકે AIR. 834, મૈસૂરિયા મહેકે AIR. 851, ચૌધરી ક્રિષ્નાકુમારીએ AIR. 946, વેકરીયા પ્રીતે AIR. 953 અને ચૌધરી મેશ્વાકુમારીએ AIR. 1000 પ્રાપ્ત કર્યો છે. શાળાનાં સાત વિદ્યાર્થીઓએ ટોપ 1000 માં પોતાનું સ્થાન સુનિશ્ચિત કર્યું છે જ્યારે 15 વિદ્યાર્થીઓએ ટોપ 2000માં સ્થાન મેળવ્યું છે. શાળામાં કુલ 46 વિદ્યાર્થીઓ JEEની તૈયારી કરતા હતા. જેમાંથી 20 વિદ્યાર્થીએ ક્વોલિફાઇ થઈને IITમાં પોતાનું સ્થાન સુનિશ્ચિત કર્યું છે. જે શાળા માટે ખૂબ જ ગૌરવની બાબત છે.
વાવના વશિષ્ઠનાં વિદ્યાર્થીઓ હંમેશા પોતાના ઉત્તમ પરિણામ વડે સુરત શહેર અને જિલ્લાને ગૌરવ અપાવતાં રહ્યાં છે. આ જ પરંપરા સાંપ્રત વર્ષે પણ જળવાઈ રહી. તે બાબત ખૂબ જ સરાહનીય છે. શાળાનું કાર્ય વિદ્યાર્થીઓ જ્યાં સુધી સ્કૂલે હોય ત્યાં સુધી સીમિત નથી હોતું. પરંતુ તે પોતાના ધારેલા લક્ષ્યને પામે ત્યાં સુધી તેની પડખે ઉભા રહીને જે તે વિદ્યાર્થીને સપોર્ટ આપવાનું, માર્ગદર્શન આપવાનું અને હૂંફ આપવાનું હોય છે. વસિષ્ઠ પોતાની આ ફરજ નિષ્ઠાપૂર્વક નિભાવે છે તેનું સાક્ષી આ ઉત્કૃષ્ટ પરિણામ આપે છે. સામાન્ય પરીવારમાંથી આવતા આ વિદ્યાર્થીઓએ પોતાની અથાગ મહેનત વડે સફળતા પ્રાપ્ત કરી છે. તે બાબત ખૂબ જ સરાહનીય છે.આ ઉત્તમ પરીણામ પ્રાપ્ત કરવા બદલ શાળાના ચેરમેન રમણીકભાઈ ડાવરીયા, ડાયરેકટર વિજયભાઇ ડાવરીયા, રવિભાઈ ડાવરીયા, એજયુકેશનલ એડવાઇઝર ડૉ. પરેશભાઇ સવાણી તેમજ શાળાના આચાર્ય મેહુલભાઇ વાડદોરીયાએ વિદ્યાર્થીઓ, વાલીઓ અને સમગ્ર ટીમને ખૂબ ખૂબ અભિનંદન પાઠવ્યા છે.
