સુરત: (Surat) પતિના આડાસંબંધના પુરાવા હોવાનું કહીને પતિના મિત્રએ જ મહિલાને પીપલોદના ફાર્મ હાઉસ, ઇચ્છાપોરના ફ્લેટ અને બાદમાં કતારગામના એક ગોડાઉનમાં બોલાવીને બે યુવકોએ ગેંગરેપ કરતા ચકચાર મચી ગઇ હતી. આ મામલે મોડી રાત્રે કતારગામ પોલીસમાં ફરિયાદ નોંધાતા પોલીસે બે યુવકોની સામે ગેંગરેપ (Gang Rape) સહિતની ફરિયાદ નોંધીને તપાસ શરૂ કરી છે. કતારગામમાં રહેતા રત્નકલાકાર મનોજભાઇ (નામ બદલ્યુ છે)નો કતારગામ બાપાસીતારામ ચોક પાસે રૂક્ષ્મણી સોસાયટીમાં રહેતા પ્રકાશ ઉર્ફે પકો વોરાની સાથે મિત્રતા થઇ હતી. દરમિયાન પ્રકાશ મનોજભાઇના ઘરે પણ આવ-જા કરતો હોવાથી મનોજભાઇના પરિવારજનો તેમજ તેની પત્ની હીનાબેન (નામ બદલ્યુ છે)ની સાથે મિત્રતા થઇ હતી.
બે-ત્રણ વર્ષ પહેલા પ્રકાશે હીનાબેનને મનોજભાઇના અન્ય મહિલા સાથેના સંબંધ હોવાનું જણાવ્યું હતું. હીનાબેન માન્યા નહીં ત્યારે પ્રકાશે તેના પુરાવા આપવાનું જણાવીને હીનાબેનને બ્લેકમેઇલ કરી હતી. હીનાબેન પુરાવા મેળવવા માટે તલપાપડ થતી હતી. ત્યારે પ્રકાશે તેણીને પીપલોદના એક ફાર્મ હાઉસનું એડ્રેસ આપીને ત્યાં બોલાવી હતી. ફાર્મ હાઉસમાં હીના અને પ્રકાશ એકલા જ હતા ત્યારે પ્રકાશે પુરાવા આપવાનું કહીને શરીરસંબંધ બાંધવા માટે કહ્યું હતું. બળાત્કાર ગુજારીને પ્રકાશે કહ્યું કે, હું આ વીડિયો વાઇરલ કરી દઇશ તેમ કહીને હીનાબેનને ઘરે મોકલી આપી હતી.
થોડા સમય બાદ ફરીવાર પ્રકાશે હીનાબેનને ફોન કરીને ઇચ્છાપોરના એક ફ્લેટ ઉપર બોલાવી હતી. ત્યાં હીનાબેનને કેફીપીણું પીવડાવીને બળાત્કાર ગુજાર્યો હતો. પરંતુ પતિના આડાસંબંધના કોઇ પુરાવા આપ્યા ન હતા. આખરે પ્રકાશે હીનાબેનને કતારગામમાં પોતાના મિત્ર રમેશના ગોડાઉનમાં બોલાવીને ત્યાં બળાત્કાર ગુજાર્યો હતો. બાદમાં રમેશે પણ હીનાબેનની સાથે બળાત્કાર ગુજાર્યો હતો, આ સાથે જ હીનાબેનને ધમકી આપીને તેનો વીડિયો તેના પતિ મનોજભાઇને બતાવી બદનામ કરી નાંખી હતી. આ સમગ્ર ઘટનામાં કતારગામ પોલીસે પ્રકાશ તેમજ રમેશની સામે ગુનો નોંધીને તપાસ શરૂ કરી છે.
પ્રકાશે હીનાબેનને ગર્ભવતી બનાવવાનું કહી પુત્રની માંગણી કરી હતી
પ્રકાશે હીનાબેનને જ્યારે ઇચ્છાપોરના એક ફ્લેટમાં બોલાવી હતી. ત્યારે કેફીપીણું પીવડાવીને બળાત્કાર ગુજાર્યો હતો. હીનાબેન જ્યારે ભાનમાં આવ્યા ત્યારે પ્રકાશે તેની પાસે ગર્ભ ધારણ કરવાનું કહીને એક પુત્ર આપવાનું દબાણ કર્યું હતું. પ્રકાશની વાત સાંભળીને હીનાબેન પણ ચોંકી ઉઠ્યા હતા અને ડરતા ડરતા ઘરે ચાલ્યા ગયા હતા.
કતારગામમાં ગેંગરેપ કરીને પ્રકાશે મનોજભાઇને ફોન કરીને માહિતી આપી દીધી
કતારગામમાં રમેશના ગોડાઉનમાં પ્રકાશ તેમજ રમેશે હીનાબેન સાથે બળાત્કાર ગુજાર્યા બાદ આ સમગ્ર માહિતી હીનાના પતિ મનોજભાઇને ફોન કરીને કહી દેવામાં આવી હતી. આ વાત સાંભળીને મનોજભાઇએ હીનાબેનને છૂટાછેડા આપી દેવાની તૈયારી પણ કરી દીધી હતી. આખરે હીનાબેને પોતાની સાથે થયેલી ઘટનાને વિગતવાર સમજાવીને મનોજભાઇને વિશ્વાસમાં લીધા હતા અને આખરે કતારગામ પોલીસમાં ફરિયાદ આપી હતી. પોલીસે આ અંગે પ્રકાશ તેમજ મનોજની સામે ગુનો નોંધીને વધુ તપાસ શરૂ કરી છે.
