સુરત: (Surat) સુરતના રાંદેર વિસ્તારમાં કોઝવે પાસે ચોંકાવનારી ઘટના બની છે. અહીં સોમવારે રાત્રે ઘરની બહાર પાર્ક કરેલી બાઈકને સળગાવી (Bike Fire) દેવામાં આવી છે. આ ઘટનાનો કોલ મળતા જ ફાયર બ્રિગેડે ઘટના સ્થળે દોડી જઈ આગ પર કાબુ મેળવવાનો પ્રયાસ કર્યો હતો. આગની ઘટનાના પગલે પોલીસ (Police) પણ દોડતી થઈ હતી. દરમિયાન ઘર નજીકના સીસીટીવી (CCTV) ચેક કરતા ચોંકાવનારી હકીકત બહાર આવી છે.
- રાંદેરમાં કોઝવે નજીક બની ઘટના
- જૂના ઝઘડાની અદાવતમાં બાઈક સળગાવી
- પોલીસ અને ફાયરનો કાફલો દોડતો થયો
- યુવકે આગ લગાવી હોવાનું સીસીટીવી ફૂટેજમાં સ્પષ્ટ દેખાય છે
સીસીટીવી ફૂટેજમાં જોવા મળેલા દ્રશ્ય અનુસાર એક યુવકે રાતના અંધારામાં આવી ઈરાદાપૂર્વક બાઈક સળગાવી છે. સીસીટીવી ફૂટેજમાં સ્પષ્ટ જોઈ શકાય છે કે એક યુવક બાઈક પર આવે છે. પોતાની બાઈક પરથી ઉતરી તે બોટલમાંથી પેટ્રોલ જેવું જલદ પ્રવાહી ત્યાં પાર્ક કરેલી બાઈક પર નાંખે છે, ત્યાર બાદ દીવાસળી સળગાવી બાઈક પર ફેંકી દે છે. ક્ષણભરમાં બાઈક ભડભડ સળગવા લાગે છે. બાઈક સળગાવ્યા બાદ યુવક પોતાની બાઈકને ઢસડીને આગળ લઈ જઈ ચાલુ કરે છે, જ્યાં અન્ય એક યુવક તેની સાથે આવી બેસી જાય છે અને પછી બંને ત્યાંથી ભાગી જાય છે.
આ સીસીટીવી ફૂટેજના આધારે રાંદેર પોલીસ દ્વારા બાઈક પર આગ ચાંપનાર બંને તોફાની યુવકોને શોધી રહી છે. અંગત અદાવતમાં બાઈક સળગાવવામાં આવી હોવાનું અનુમાન લગાવવામાં આવી રહ્યું છે, જેની બાઈક સળગાવાઈ છે તે યુવક કેટલાંક શંકાસ્પદોના નામ પોલીસને જણાવ્યા છે, તેના આધારે પોલીસે તપાસ હાથ ધરી છે.
