અમેરિકાના રાષ્ટ્રપતિ ડોનાલ્ડ ટ્રમ્પના નિર્ણય બાદ આજે સતત છઠ્ઠા દિવસે શુક્રવારે તા. 26 સપ્ટેમ્બરે ભારતીય શેરબજારમાં ભારે કડાકો જોવા મળ્યો. ટ્રમ્પે 1 ઓક્ટોબર, 2025 થી બ્રાન્ડેડ અને પેટન્ટ દવાઓની આયાત પર 100% સુધીના મોટા ટેરિફની જાહેરાત કરી. આના કારણે ફાર્માસ્યુટિકલ શેરોમાં તીવ્ર ઘટાડો થયો.
ટ્રેડિંગ દરમિયાન BSE સેન્સેક્સ 800 થી વધુ પોઇન્ટ ઘટીને 80,400 ના સ્તરથી નીચે પહોંચી ગયો. નિફ્ટી 50 પણ 250 થી વધુ પોઇન્ટ ઘટીને 24,650 ના સ્તરથી નીચે સરક્યો. સેન્સેક્સ આખરે 733.22 પોઇન્ટ ઘટીને 80,426.46 પર બંધ થયો એટલે કે 0.90%. નિફ્ટી પણ 238.35 પોઇન્ટ ઘટીને 24,652.50 પર બંધ થયો.
ટ્રમ્પે “બ્રાન્ડેડ અને પેટન્ટ” દવાઓ પર 100% ટેરિફ લાદવાના નિર્ણય લેતા ભારતીય ફાર્માસ્યુટિકલ કંપનીઓના શેર ઘટ્યા જેના કારણે રોકાણકારો નકારાત્મક પ્રતિક્રિયા આપી રહ્યા છે. નિફ્ટી ફાર્મા સેક્ટર 590 પોઈન્ટ અથવા 2.7% ઘટીને 21,390.25 ના ઇન્ટ્રાડે નીચા સ્તરે પહોંચ્યું. આ સેક્ટરના 20 શેરોમાંથી 17 શેર ઘટ્યા હતા, જ્યારે ફક્ત ત્રણ શેર લીલા નિશાનમાં બંધ થયા હતા. લૌરસ લેબ્સ, બાયોકોન , ઝાયડસ લાઇફસાયન્સ અને નેટકો ફાર્મા સહિતના મુખ્ય શેરોના શેર 7% સુધી ઘટ્યા હતા.
વૈશ્વિક બજારોમાં ઘટાડો
શુક્રવારે એશિયન બજારોમાં પણ તીવ્ર ઘટાડો જોવા મળ્યો. જાપાનનો નિક્કી 0.9%, હોંગકોંગનો હેંગ સેંગ 1.4% અને ચીનનો શાંઘાઈ કમ્પોઝિટ 0.7% નીચે હતો. દરમિયાન, વિદેશી સંસ્થાકીય રોકાણકારો દ્વારા ભારે વેચાણને કારણે સ્થાનિક બજાર પણ પ્રભાવિત થયું છે.
ગુરુવારે તેમણે 4,995.42 કરોડ રૂપિયાના શેર વેચ્યા. સપ્ટેમ્બરમાં અત્યાર સુધીમાં તેમણે 13,450 કરોડ રૂપિયાના શેર વેચ્યા છે. વર્ષ 2025માં અત્યાર સુધીમાં તેમણે 1,44,085 કરોડ રૂપિયાના સ્થાનિક શેર વેચ્યા છે. આ દર્શાવે છે કે વિદેશી રોકાણકારો ભારતીય બજારમાંથી પૈસા ઉપાડી રહ્યા છે.
ઘટાડા પાછળ ત્રણ મુખ્ય કારણો
ફાર્મા સેક્ટર પર ટેરિફનો પ્રભાવ: યુએસ પ્રમુખ ડોનાલ્ડ ટ્રમ્પે બ્રાન્ડેડ ફાર્માસ્યુટિકલ્સની આયાત પર 100% ટેરિફની જાહેરાત કરી. વધુમાં, તેઓ કિચન કેબિનેટ અને બાથરૂમ વેનિટી પર 50%, અપહોલ્સ્ટર્ડ ફર્નિચર પર 30% અને ભારે ટ્રક પર 25% ટેરિફ લાદવાની યોજના ધરાવે છે. આ નવા ટેરિફ 1 ઓક્ટોબરથી અમલમાં આવશે. આ જાહેરાત બાદ, ભારતીય ફાર્માસ્યુટિકલ કંપનીઓમાં વેચાણનું દબાણ વધ્યું. નિફ્ટી ફાર્મા ઇન્ડેક્સ 2% થી વધુ ઘટ્યો.
IT શેરોમાં નબળાઈ ચાલુ છે: H-1B વિઝા ફીમાં વધારાને કારણે પહેલાથી જ દબાણ હેઠળ રહેલા ભારતીય IT ક્ષેત્રને એક્સેન્ચરના નબળા ત્રિમાસિક પરિણામોથી વધુ મંદીનો સામનો કરવો પડ્યો. નિફ્ટી IT ઇન્ડેક્સ 1.3% ઘટ્યો. બીજું કારણ H-1B વિઝા ફીમાં વધારાનો ભય છે, જે ભારતીય કંપનીઓ માટે ખર્ચમાં વધારો કરી શકે છે.
વિદેશી રોકાણકારોનું વેચાણ ચાલુ છે: 25 સપ્ટેમ્બરના રોજ વિદેશી રોકાણકારોએ ભારતીય શેરબજારમાંથી 4995 કરોડ પાછા ખેંચી લીધા. આ મહિનામાં અત્યાર સુધીમાં કુલ વેચાયેલી રકમ 24454 કરોડ થઈ ગઈ છે. રોકાણકારો કમાણી વૃદ્ધિ અંગે પણ ચિંતિત છે. વધુમાં ટેરિફના નિર્ણયોને પગલે એશિયન શેરબજારોમાં પણ ઘટાડો થયો.
જાપાનનો નિક્કી, ચીનનો CSI 300 અને હોંગકોંગનો હેંગ સેંગ ઇન્ડેક્સ નીચા સ્તરે બંધ થયો. યુએસ બજારો પણ નીચા સ્તરે બંધ થયા. આ નકારાત્મક વૈશ્વિક લહેરોએ ભારતીય બજાર પર દબાણ બનાવ્યું.
